ދުވަސްފެށެނީ ކިތަންމެ ގިނަ އަމިއްލަ ޒިންމާތަކެއް ހުރިނަމަ އެކަންތައްތައް ފަހަށް ޖައްސާލާފައި ހިނިތުންވެލުމަކާއެކު މަރުހަބާގެ ބަސްތަކަކުންނެވެ. ބޮޑުފަތިހާ ތެދުވެ ގެއާއި އާއިލާގެ ހުރިހާ ކަމެއްހެން ތާވަލުކޮށް ހަމަޖައްސައި ތައްޔާރު ވެގެން ތާޒާކަމާއެކު ދުވަހުގެ މަސައްކަތަށް ނުކުމެއެވެ. ކިތަންމެ ބޮޑު ވޭނެއް އުފުލަމުން އަންނަކަމަށްވިޔަސް އަދި އަމިއްލަ ދިރިއުޅުމުގައި ކޮންމެފަދަ ތަކުލީފެއް އޮތަސް އެމީހުންގެ މޫނުމަތިން ފެންނަނީ ހިނިތުންވުމެވެ.
އެމީހުންގެ ދުވަސް ފެށެނީ "ބާއްޖަވެރި ދުވަހެއް، ދަރިވަރުން ހާލު ކިހިނެއް،" މިފަދަ ބަސްތަކަކުންނެވެ. އާދެ! އެއީ މިއަދު ދުނިޔެ ފާހަގަ ކުރަމުން އަންނަ ދުވަހުގެ ތަރިންނެވެ. "ޓީޗަރުން" "މުދައްރިސުން" "އުސްތާޒުން، އުސްތާޒާއިން،"ގެ ދުވަހެވެ. އެކަމަކު ސުވާލަކީ އަހަރަކު އެއްދުވަހު ގަދަކޮށް ފާހަގަކޮށްލުމުން މި ހާއްސަ ފަރާތުގެ ހިދުމަތްތަކުގެ އަގު ވަޒަން ކުރެވުނީތޯ އުފެދޭ ސުވާލެވެ.
އަމިއްލަ ތަޖުރިބާވެސް ހުރުމާއެކު ޓީޗަރަކަށް ވުމަކީ ކިހާވަރެއްގެ ކަމެއްކަން އިހުސާސްކުރެވެއެވެ. އަހަރަކު އެއްފަހަރު ކުލަގަދަކޮށް ފާހަގަކުރާ ޓީޗަރުންގެ ދުވަހުވެސް ޓީޗަރުންނަށް މުހިންމު ވަނީ ދަރިވަރުންގެ ކަންތައްތަކެވެ. އާއެކެވެ. މިދުވަސް ފާހަގަކުރުމަށް ޖަލްސާއެއް ނޫނީ ޑިނަރނައިޓެއް ނުވަތަ ކޮންމެވެސް ހަފްލާއެއް ބާއްވަފާނެއެވެ. އެކަމަކު ހަމައެންމެ ހަފްލާއަކުން ނުވަތަ ޖަލްސާއަކުން ނުވަތަ ކެއުމަކުން މި ބުރަ ޒިންމާގެ އަގުވަޒަން ކުރެވޭބާވައެވެ.
އެންމެ ބުރަ އެންމެ ގިނަ ވަގުތު ހޭދަވާ އެއް މަސައްކަތަށް ވެފައިވާ ޓީޗަރުންގެ ވަޒީފާގައި އާއިލާއަކަށް ވަގުތެއް ނުދެވެއެވެ. ރެއާއި ދުވާލުގެ ބޮޑު ބައި ހޭދަވަނީ ދަރިވަރުންގެ ކަންކަމުގައެވެ. ފިލާވަޅު ޕްލޭން ހެދުމުގައެވެ. އިމްތިހާނު ޕޭޕަރ ތައްޔާރުކުރުމުގައެވެ. ފޮތްތައް ބަލައި މާކް ކުރުމުގައެވެ. ޕޭޕަރތައް ޗެކްކޮށް މާކްސް ދިނުމުގައެވެ. ސުކޫލުގައި ދަރިވަރުންނަށް ހާއްސަކޮށްގެން ހިންގާ އެކި ކަންކަމުގެ ޕްލޭންތައް ކުރުމުގައާއި އެކަންކަން ހިންގުމުގައެވެ.
ޓީޗަރުންނަކީ މުސާރަ ބޮޑު ބައެކޭ ބައެއްމީހުން ބުނެއެވެ. އެކަމަކު ހަގީގަތުގައި އެމީހުންގެ ޒިންމާތަކާއި އެމީހުންގެ މަސައްކަތްތަކާ އަޅާބަލާއިރު އެމުސާރަ ބޮޑޭ ނުބުނެވޭނެއެވެ. ސަބަބަކީ ޓީޗަރުންގެ ދުވަހުގެ ތިންބައިކުޅަ ދެބައި އެމީހުން ހޭދަކުރަނީ އެމީހުންގެ މަސައްކަތުގައި ކަމަށްވާތީއެވެ. ހަގީގީ ޓީޗަރުންނަކީ އަމިއްލަ އުފަން ދަރިންނަށް ހިދުމަތް ކުރާ އުސޫލުން ދަރިވަރުންނަށް ކަމޭހިތާ އުނގަންނައިދޭ ބަޔަކަށް ވާތީއެވެ.
ފޮޓޯ: އެޑިޝަން
ސުކޫލެއްގެ ހަތަރުފާރަކީ އެމީހުންގެ ދިރިއުޅުމުގެ ބޮޑުބައި ހޭދަވާ ތަނެވެ. މަސައްކަތުގެ ޕްރެޝަރު ވެސް އެހާ ބޮޑެވެ. ދަރިވަރުންގެ އާއިލާތަކުން ކުރާ ޕްރެޝަރ ވަކިކުޑައެއް ނޫނެވެ. މޮޅުކަމެއް ދަރިވަރަކަށް ވެއްޖެނަމަ އެއީ ދަރިވަރުގެ މޮޅުކަމެވެ. ދެރަކަމެއް ދަރިވަރަކަށް ވެއްޖެނަމަ އެއީ ޓީޗަރުގެ ކުށެވެ. ފާސްނުވިޔަސް ޒިންމާ ނަގަންވީ ޓީޗަރުންނެވެ. މީގެ އަނެއްކޮޅުވެސް އޮންނަކަން ޔަގީނެވެ. ބައެއް ޓީޗަރުންނަކީ ހަމައެކަނި ލިބޭ މުސާރައަށް އަށްގަޑިއިރުގެ ވަޒީފާއަދާ ކުރާ މީހުންނެވެ. އެހެންނަމަވެސް މިއީ މަދު ބައެކެވެ. ސަބަބަކީ ހަގީގީ ޓީޗަރުންނަކީ ހިތުން، އެ ވަޒީފާ އަދާ ކުރާ މީހުންކަމަށް ވާތީއެވެ. އެމީހުންގެ އެންމެ މުހިންމު ވަގުތުތައް ހޭދަވަނީ ދަރިވަރުންނާއެކުގައެވެ. އެމީހުންނަށް ދަރިވަރުންނަކީ އަމިއްލަ އުފަން ދަރިންނެވެ. މިއަދަކީ އެފަދަ ޓީޗަރުންގެ ނަން އާލާ ކޮށްލެވޭ އަހަރަކު އެއްފަހަރު އަންނަ "ޓީޗަރުންގެ ދުވަހެވެ."
"އަޅުގަނޑުމެން ބޭނުންވާ ތައުލީމަށް ބޭނުންވާ ޓީޗަރުން: ޓީޗަރުންގެ ދަތިކަން ފަހަތަށް ޖެއްސުމަށް ދުނިޔޭގެ ފެންވަރުގައި ލާޒިމުކުރުން". މިއީ 2023 ގެ ދުނިޔޭގެ ޓީޗަރުންގެ ދުވަހަށް ކަނޑައަޅާފައިވާ ޝިއާރެވެ. މި ޝިއާރުން ދޭހަވަނީ ޓީޗަރުންނަކީ ދަތިކޮށް އުޅޭ ބައެއްކަމެވެ. އަދި އެދަތިކަން ދުރުކުރުވުމަށް ދުނިޔޭގެ ފެންވަރުގައި އެކަން ލާޒިމުކުރަން ޖެހޭކަމެވެ.
ރެއާދުވާލު، އަތްވަކަށް ވާރޭއަކަށް ނުބަލާ އަމިއްލަ އާއިލާއާއި އަމިއްލަަ އުފާތައް ފަހަށް ބާއްވާފައި ޓީޗަރުން އެމީހުންގެ ޒިންމާ ފުރިހަމަކުރުމުގައި ވަގުތު ހޭދަ ކުރާ ގޮތް އިހުސާސް ކުރެވޭނެ ކަމެއް ނޭނގެއެވެ. ދަަރިވަރުންގެ ތެރެއިން އަންނަ ބައެއްކަހަކަ އުނދަގޫ ހާލަތްތައްވެސް އެމީހުން ތަހައްމަލުކޮށްލަނީ އުފަލާއެކުގައެވެ.
ކަންމިހެން އޮތްއިރު އެންމެ ދުވަހަކުން ޓީޗަރެއްގެ އަގު ވަޒަންކޮށްލެވޭ ބާވައެވެ. ހަމައެކަނި ސާބަހެއް ދިނުމަކުން ފުދޭބާވައެވެ. ހިދުމަތުގެ އަގު ކުރެވޭބާވައެވެ. އަހަރަށް ކަނޑައަޅާފައިވާ ޝިއާރާއެކު މި ހިދުމަތްތެރި އަގުހުރި މީހާ "ޓީޗަރ"ގެ އަގު ވަޒަން ކުރުމަށް އާ ހިތްވަރެއް ކުރަމާހިނގާށެވެ. މިއީ އަޅުގަނޑުމެންގެ ދަރިންގެ ހަގީގީ އެކުވެރިއެކެވެ. އެއްވެސް އަގަކަށް ޝަރުތަކަށް ނޭދި އަޅުގަނޑުމެންގެ ކުދި ދަރިންގެ މުސްތަގްބަލް އުޖާލާކުރުމަށް އެހީވާ، އަޅުގަނޑުމެންގެ ދަރިންގެ ކުރިމަގު ރޯޝަން ކުރުމަށް ރޭދުވާ ހޭބޯނާރާ ހިތްވަރު ކުރާ މި ޓީޗަރުންގެ ހަގީގީ އަގު ވަޒަން ކުރުމަށް އެންމެން ތެދުވަމާ ހިނގާށެވެ. މިއީ ފަރުދީ ޒިންމާއެކެވެ. އެންމެން އެއްގޮތަކަށް މިޒިންމާ އަދާ ކުރާނަމަ ޓީޗަރުންގެ އަގުވަޒަން ކުރެވި އެމީހުންނަށް ހައްގު ޝުކުރު އަދާ ކުރެވިދާނެއެވެ.