ވީހާވެސް ގިނަ އާންމުނަށް ބައިވެރިވެވޭ ގޮތަށް ހުވާކުރުމުގެ ރަސްމިއްޔާތު ޖުމްހޫރީ މައިދާނުގައި ބޭއްވުމަށް ރައްޔިތުންގެ މަޖިލީހުގައި އެދިފައިވާ ކަމަށް އިންތިހާބީ ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ޑރ. މުއިއްޒު ވިދާޅުވީ ވަގުތު ނޫހަށް ދިން އިންޓަވިއުއެއްގައެވެ. މުއިއްޒު ވިދާޅުވީ ހުވާ ކުރެއްވުމުގެ ރަސްމިއްޔާތު ރައްޔިތުންގެ މަޖިލީހުން ބާއްވަން އޮންނަ އިރު، މިހާރު ނިންމަވާފައި އޮތީ މަޖިލީހުގެ އިދާރާގައި ރަސްމިއްޔާތު ބޭއްވުމަށް ކަމަށެވެ. އެކަމަކު، އެމަނިކުފާނު ބޭނުންފުޅުވަނީ ޖުމްހޫރީ މައިދާނުގައި ހުވާ ކުރުމުގެ ރަސްމިއްޔާތު ބާއްވަންކަމަށާއި އެވާހަކަ ރައީސް މުހައްމަދު ނަޝީދާ ބައްދަލު ކުރެއްވި ދުވަހު ނަޝީދު އަރިހުގައިވެސް ވިދާޅުވިކަމަށް މުއިއްޒު ވިދާޅުވިއެވެ.
ޑރ. މުއިއްޒު ވިދާޅުވި ގޮތުގައި ޖުމްހޫރީ މައިދާނުގައި ހުވާ ކުރެއްވުމުގެ ރަސްމިއްޔާތު ބޭއްވުމަށް ބޭނުންފުޅުވާ ސަބަބަކީ ވީހާވެސް ގިނަ ރައްޔިތުންނަށް ފެންނާނެ ގޮތަށް އަދި ރައްޔިތުންނަށް ބައިވެރިވެވޭ ގޮތަށް ހުވާ ކުރުމުގެ ކަންކަން ކުރިއަށް ގެންދިއުމަށް އެމަނިކުފާނު ބޭނުންފުޅުވާތީ ކަމަށެވެ.
“އެއީ ވީހާވެސް ގިނަ ރައްޔިތުންނަށް ފެންނަ ގޮތަށް އަދި ބައިވެރިވެވޭ ގޮތަށް. ދައުވަތު ދެވޭ ބޭފުޅުންގެ އިތުރުން ކަނޑައެޅޭ ހިސާބެއްގައި ވީހާވެސް ގިނަ ރައްޔިތުންނަށް ބައްލަވަން ވަޑައިގެންނެވޭ ގޮތަށް ފުރުސަތު ދެވެން އޮތް، ފުޅާ ދާއިރާއެއްގައި ލިބޭނީ އެ ތަނުން ކަމަށްވީމަ،” ޑރ. މުއިއްޒު ވިދާޅުވި އެވެ.
ޖުމްހޫރީ މައިދާން ހިޔާރުކުރައްވަން ނިންމެވި އަނެއް ސަބަބަކީ ވެރިކަން ކުރާ ރަށުގައި އެންމެ މުހިންމު މައިދާނަށް އެއް ތަން ވުމާއި ދިވެހި ގައުމީ ބޮޑު ދިދަ ވެސް ފެންނަން ހުރުމުން ކަމަށް މުއިއްޒު ވިދާޅުވިއެވެ.
“އެހެންވީމަ ދިވެހިންގެ ރާއްޖެ އަނބުރާ ހޯދަން މަސައްކަތް ކުރާ އިރުގައި ދިވެހި ދިދައިގެ ހިޔަލުގައި ހުވާ ކުރުމުގެ ރަސްމިއްޔާތު ބާއްވަން ބޭނުން ވަނީ.”
ޑރ. މުއިއްޒު ވެރިކަމުގެ ހުވާ ކުރައްވާނީ އަންނަ މަހު 17 ގަ އެވެ.