ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރު ޢަބްދުލް ޢަފޫރު މޫސާ އިންތިޚާބީ ރައީސް ޑރ. މުހައްމަދު މުއިއްޒު ނިސްބަތްވާ ޕީއެންސީއާއި ގުޅިވަޑައިގެންފިއެވެ.
ޣަފޫރު ޕީއެންސީއާއި ގުޅިވަޑައިގެންފައިވާއިރު އޭނާ މިހާތަނަށް ހުންނެވީ އެމްޑީޕީގައެވެ. އޭނާ ސޮއި ކުރިއިރު ކައިރީގައި ރައްޔިތުންގެ މަޖިލީހުގެ ނޮޅުވަރަމް ދާއިރާގެ މެމްބަރު މޮސްޓަރވެސް އިންނެވިއެވެ.
ޣަފޫރަކީ ނިމިދިޔަ ރިޔާސީ އިންތިޚާބުގައި ރައީސް ޞާލިހަށް އިންތިޚާބު ކާމިޔާބު ކުރުމަށް ވަރަށް ބޮޑަށް މަސައްކަތް ކުރެއްވި ބޭފުޅެކެވެ. ނަމަވެސް އިންތިޚާބަށްފަހު ޣަފޫރު މާބޮޑަށް އެމްޑީޕީގެ ހަރަކާތްތަކުން ފެނިގެން ނުދެއެވެ. ޣަފޫރު ޕީއެންސީއާއި ގުޅިވަޑައިގެންނެވިއިރު ކުރިއަށް އޮތް މަޖިލިސް އިންތިޚާބުގައި ހަނިމާދޫ ދާއިރާއަށް ވާދަ ކުރުމުގެ ޝައުގުވެރިކަން ޣަފޫރު ވަނީ ފާޅު ކުރައްވާފައެވެ.
ގަބޫލު ކުރެވޭ ގޮތުގައި ޣަފޫރު ޕީއެންސީއާއި ގުޅިވަޑައިގެންނެވީ އެޕާޓީގެ ޓިކެޓްގައި އިންތިޚާބުގައި ވާދަ ކުރެއްވުމަށެވެ.
ޣަފޫރަކީ އެމްޑީޕީގެ ދެފެކްޝަން އުފެދި ރައީސް ނަޝީދާއި، ރައީސް ޞާލިހުގެ ފެކްޝަން އުފެދިގެން ދިޔައިރު، ރައީސް ޞާލިހަށް ތާއީދުކޮށް ވަރަށް ވަރުގަދަ ގަޔަށް މަޖިލިސް ތެރޭގައިވެސް މަސައްކަތް ކުރެއްވި މެމްބަރެކެވެ.