މިއަހަރަށް ރައްޔިތުންގެ މަޖިލީހުން ފާސްކޮށްފައިވާ ބަޖެޓުގެ އިތުރުން، އެ ބަޖެޓުގެ ބައެއްގެ ގޮތުގައި ހަ ބިލިއަން ރުފިޔާ ރުފިޔާގެ ސަޕްލިމަންޓްރީ ބަޖެޓެއް މިއަދު ހުށައަޅާން ސަރުކާރުން ނިންމައިފިއެވެ.
އެނގިފައިވާގޮތުގައި 6 ބިލިއަން ރުފިޔާގެ ސަޕްލިމަންޓްރީ ބަޖެޓެއް ފާސްކުރުމަށް ނިންމީ އިންތިޚާބީ ރައީސްގެ އޮފީހާވެސް މަޝްވަރާކުރުމަށްފަހުއެވެ. މިއަހަރަށް ރައްޔިތުންގެ މަޖިލީހުން ފާސްކުރީ 42.6 ބިލިއަން ރުފިޔާއެވެ. ސަރުކާރުން އަންނަނީ މިއަދުގެ ވަގުތެއްގައި ސަޕްލިމަންޓްރީ ބަޖެޓު ހުށައެޅުމަށް މަސައްކަތްކުރަމުންނެވެ.
ސަރުކާރުން ސަޕްލިމަންޓްރީ ބަޖެޓެއް ހުށައެޅުމަސް ނިންމި ސަބަބުތަކުގެ ތެރޭގައި، މިއަހަރަށް ކަނޑައަޅާފައިވާ ފިއުލް ސަބްސިޑީއަށް ވުރެ އިތުރަށް ހަރަދުކުރަން ޖެހުމާއި، އާސަންދައިގެ ބަޖެޓު ހުސްވުން ހިމެނެއެވެ. އަދި ސްޓޫޑެންޓް ލޯނާއި ހިލޭ ޑިގްރީގެ ސްކީމަށް ހަރަދުތައް އިތުރުވުންވެސް ހިމެނެއެވެ.
އަންނަ އަހަރަށް ލަފާކުރާ ބަޖެޓުވެސް މަޖިލީހަށް ހުށައެޅުމަށް ސަރުކާރުން އަންނަނީ މަސައްކަތްކުރަމުންނެވެ. އަންނަ އަހަރަށް ލަފާކުރަނީ 50.6 ބިލިއަން ރުފިޔާގެ ބަޖެޓެކެވެ. ނަމަވެސް ބަޖެޓުގެ އަސްލު ޢަދަދު އިނގޭނީ މަޖިލީހަށް ހުށައެޅުމުންނެވެ.