ފަލަސްތީނުގެ މިހާރުގެ ހާލަތާއި ގުޅޭގޮތުން އިންތިޚާބީ ރައީސް ޑރ. މުހައްމަދު މުއިއްޒުއާއި ތުރުކީގެ ރައިސް ޡައްޔިބު އެރެދޮގާން މަޝްވަރާ ކުރައްވައިފިއެވެ. ދެބޭފުޅުން މަޝްވަރާ ކުރައްވާފައިވަނީ ފޯނުން ގުޅުއްވައެވެ.
ދުނިޔޭގެ ޚަބަރުތައް ގެނެސްދޭ ޓީއާރުޓީ ވާރލްއިން ކުރިން ޓުވީޓެއްގައި ބުނެފައިވަނި ފަލަސްތީނުގައި މިހާރު ހިނގަމުންދާ ހަމަނުޖެހުންތަކާ ގުޅޭ އެންމެ ފަހުގެ މައުލޫމާތު ހިއްސާ ކޮށްފައިވާ ކަމަށާއި، ފަލަސްތީނުގައި ސުލްހަ ގާއިމު ކުރުމަށް ކުރެވެންހުރި ހުރިހާ މަސައްކަތެއްގައި ތުރުކީން އެހީތެރިކަން ފޯރުކޮށް ދެމުންދާކަމަށް އެރެދޮގާން ވިދާޅުވި ކަމަށެވެ. އަދި ޣައްޒާއަށް ބޭނުންވާ އިންސާނީ އެހީތެރިކަން ފޯރުކޮށް ދިނުމަށްވެސް ތުރުކީން އެހީތެރިކަން ފޯރުކޮށްދެމުންދާކަމުގެ މައުލޫމާތުވެސް މި ފޯންކޯލްގައި ތުރުކީގެ ރައީސް ޑރ. މުއިއްޒަށް އަރުވާފައިވާކަމަށްވެސް ޓުވީޓުގައި ބުނެފައި ވެއެވެ.
އިސްރާއީލުން ޣައްޒާއަށް ދެމުންދާ އުދުވާނީ ހަމަލާތަކުގައި ފަލަސްތީނުން މިހާތަނަށް 4،137 މީހުން ޝަހީދުވެފައިވާ އިރު، އޭގެ ތެރޭގައި 1،661 ކުޑަކުދިން ހިމެނެއެވެ. އަދި 13،260 މީހުން ޒަޚަމްވެފައިވާ ކަމަށް ފަލަސްތީނުން ބުނެފައިވެއެވެ. ހަމާސްގެ ހަމަލާތަކުގައި އިސްރާއީލުން މަރާލާފައި ވަނީ 1،403 މީހުންނެވެ. އަދި 4،932 މީހުން ވަނީ ޒަހަމްކޮށްލައިފައެވެ.
މި ހަމލާތަކާއެކު ޣައްޒާގެ އެތައް ލައްކަ އާންމު ރައްޔިތުން ހާލުގައި ޖެހިފައިވާއިރު، އިސްރާއީލުން ގާޒާއަށް ބޮންއަޅާާ އެސިޓީ ހިސޯރު ކުރިތާާ 2 ހަފްތާފަހުން، ގާޒާއާއި މިސްރު ގުޅޭ ރަފާ ބޯޑަރު ހުޅުވާ، މިސްރުން ޢައްޒާއަށް އިންސާނީ އެހީ ފޯރުކޮށްދޭން މިހާރުވަނީ ފަށާފައެވެ.
ރަފާ ބޯޑަރު ހުޅުވުމާއެކު އިންސާނީ އެހީއަށް ބޭނުންވާ ތަކެތިން ބަރާކޮށްފައިވާ، ރެޑް ކުރެސެންޓުގެ ލޮރީތައް ވަނީ ޢައްޒާއަށް އިއްޔެވެނީ ވަންނަން ފަށާފައެވެ. އެހެންނަމަވެސް އެހީދޭ ޖަމިއްޔާތަކުން ބުނެފައިވަނި މިއީ އަދި ޢައްޒާއަށް ބޭނުންވާ އެހީގެ ޒައްރެއްގެ މިންވަރު ކަމުގައެވެ.