ދުނިޔޭގެ އެންމެ ބޮޑު އެއް މަހުޖަނުކަމަށްވާ އީލަން މަސްކުގެ ސްޓާލިންކު މެދުވެރިކޮށް ޣައްޒާގައި ހަރަކާތްތެރިވާ އިންސާނީ އެހީ ފޯރުކޮށްދޭ ޖަމްއިއްޔާތަކަށް އިންޓަނެޓުގެ ޚިދުމަތް ފޯރުކޮށްދޭނެކަމަށް އޭނާ ވިދާޅުވެއްޖެއެވެ.
ރޭ ޣައްޒާއިން އިންޓަނެޓުގެ ޚިދުމަތް ކަނޑައިލުމަށްފަހު އިސްރާއީލުން އަންނަނީ ވަރަށް ވަރުގަދައަށް ޣައްޒާއަށް ވައިގެ މަގުންނާއި އެއްގަމު މަގުން ހަމަލާތައް ދެމުންނެވެ. އެ ހަމަލާތަކުގައި ލިބޭ ގެއްލުމާއި އާންމުންނަށް ލިބެމުންދާ އަނިޔާތައް ޣައްޒާއިން ބޭރަށް ފޯރުކޮށްދިނުން އެކީހެން ހުއްޓިފައިވަނީ މުވާސަލާތީ ހުރިހާ ޚިދުމަތެއް ޞަހުޔޫނީން ކަނޑައިލުމާ ގުޅިގެންނެވެ.
އިންސާނީ ޙައްޤުތަކަށް މަސައްކަތްކުރާ ޖަމްއިއްޔާތައްކަމުގައިވާ ހިއުމަން ރައިޓްސް ވޮޗާއި ޓްރާންސްޕޭރެންސީ އިންޓަނޭޝަނަލުންވަނީ މުވާސަލާތީ ޚިދުމަތާއި އިންޓަނެޓުގެ ޚިދުމަތް ޣައްޒާއިން މެދުކަނޑައިލުމަކީ ޣައްޒާގައި ހިންގާ ލާއިންސާނީ އަމަލުތައް ފޮރުވުމަށް ބޭނުންކުރާ ފަރުދާއެއްކަމަށް ސިފަކޮށް، އެކަމުގެ ސަބަބުން ހަނގުރާމައިގެ ޖަރީމާތް ހިންގި ނަމަވެސް އެކަންކަން ރެކޯޑުނުކުރެވި ދޫވެގެން ހިނގައިދާނެކަމުގެ ބިރު އޮތްކަން ފާހަގަކޮށްފައެވެ.
އަދި ޣައްޒާގައި އިންސާނީ އެހީތެރިކަން ފޯރުކޮށްދިނުމަށް މަސައްކަތްކުރާ އދ.ގެ އިދާރާތަކާއި ރެޑް ކްރެސެންޓުން ބުނެފައިވަނީ އިންޓަނެޓާއި މުވާސަލާތީ އެހެނިހެން ޚިދުމަތްތައް މެދުކެނޑިފައި އޮތުމުގެ ސަބަބުން އިންސާނީ އެހީތެރިކަން އެކަށީގެންވާ ގޮތެއްގައި ފޯރުކޮށްދިނުމުގއި ބޮޑެތި ހުރަސްތަކާއި ދަތިތައް ކުރިމަތިވަމުން އަންނަ ކަމަށެވެ.
މިކަމާ ގުޅިގެން އެމެރިކާގެ ހައުސް އޮފް ރިޕްރެޒެންޓޭޓިވްގެ މެންބަރު އެލެގްޒެންޑްރިއާ އޮކާޒިއޯ ކޯޓެޒް ކުރެއްވި ޓުވީޓަކަށް ޖަވާބުދެއްވަމުން މަސްކު ވިދާޅުވީ ޣައްޒާގައި ހަރަކާތްތެރިވާ ބައިނަލްއަޤުވާމީ ގޮތުން ބަލައިގަނެފައިވާ ހުރިހާ އެހީ ފޯރުކޮށްދޭ ޖަމްއިއްޔާ ޖަމާއަތްތަކަށް ސްޓާލިންކުން މުވާސަލާތީ ޚިދުމަތް ފޯރުކޮށްދޭނެ ކަމަށެވެ.
ޣައްޒާއިން އިންޓަނެޓުގެ ޚިދުމަތާއި މުވާސަލާތީ އެހެނިހެން ޚިދުމަތްތައް މެދުކެނޑުނުކަން އެނގުމާއެކު މީސްމީޑިއާގެ މަންސަތަކުގައި ޚާއްޞަކޮށް އީލަން މަސްކު ގަނެފައިވާ ޓުވިޓާ/އެކްސްގައި ގިނަ ބަޔަކު އަންނަނީ އޭނާގެ ސްޓާލިންކު މަޝްރޫޢުގެ ތެރެއިން ޣައްޒާއަށް އިންޓަނެޓު ފޯރުކޮށްދިނުމަށް ގޮވައިލަމުންނެވެ.
މީގެ ކުރިން ޔޫކުރެއިން ހަނގުރާމާގައި ޔޫޫކުރެއިނުގެ ބައެއް ހިސާބުތަކުން އިންޓަނެޓުގެ ޚިދުމަތް މެދުކެނޑުމާއެކު، އީލަން މަސްކުވަނީ އޭނާގެ ކުންފުނި މެދުވެރިކޮށް އެ ސަރަހައްދުތަކަށް އިންޓަނެޓުގެ ޚިދުމަތް ފޯރުކޮށްދީފައެވެ.