ދިވެހިރާއްޖޭގެ އަށްވަނަ ރައީސް، އަދި ދިވެހިރާއްޖޭގެ ދެވަނަ ޖުމްހޫރިއްޔާގެ ހަތްވަނަ ރައީސް ކަމަށް، ދިވެހިންގެ ރުހުމާއި ގަބޫލުކުރުމާއެކު ދިން ވޯޓަކުން ހޮވިވަޑައިގެން، މިއަދު 17 ނޮވެމްބަރ 2023 ގައި ގާނޫނީ ހުވައި ކުރެއްވި ޑޮކްޓަރ މުޙައްމަދު މުއިއްޒު އުފަންވެ ވަޑައިގަތީ ޖޫން 15، 1978 ގައެވެ. އުމުރުފުޅުން މިހާރު 45 އަހަރެވެ.
ޑރ މުއިއްޒުގެ ބައްޕާފުޅަކީ ރާއްޖޭގައި މަޝްހޫރު ދީނީ އިލްމުވެރިޔެއް އަދި ގާޒީއެއް ކަމުގައިވާ ހުސައިން އަބްދުއްރަހްމާން އެވެ. ރައީސް ޑރ މުއިއްޒު އަކީ ޝައިހް ހުސައިންއަށް ލިބިވަޑައިގެންނެވި ހަމައެކަނި ދަރިކަލުންނެވެ.
ޑރ. މުއިއްޒު ސިޔާސީ ހަޔާތްޕުޅު ފެއްޓެވީ އަދާލަތު ޕާޓީންނެވެ. އެމަނިކުފާނު އާންމުންނަށް ފާހަގަވީ ރައީސް ޑރ. މުހައްމަދު ވަހީދުގެ ވެރިކަމުގައި ފެބްރުއަރީ 7، 2012 ގައި ހައުސިން މިނިސްޓަރަކަށް އައްޔަންކުރެއްވުމުންނެވެ.
ރައީސް ޑރ މުހައްމަދު މުއިއްޒުގެ އަނބިކަނބަލުން ރާއްޖޭގެ ފަސްޓްލޭޑީ އަކީ ސާޖިދާ މުހައްމަދުއެވެ. ރައީސްގެ ދެމަފިރިކަނބަލުންނަށް ލިބިވަޑައިގެންފައި ވަނީ އަންހެން ބޭފުޅަކާއި ދެ ފިިރިހެން ބޭފުޅުންނެވެ.
ސިވިލް އިންޖީނިއަރިންގގެ ދާއިރާއިން، ޑޮކްޓަރ އޮފް ފިލޯސަފީ (ޕީއެޗްޑީ) އެމަނިކުފާނު ޙާޞިލްކުރައްވާފައިވަނީ އިނގިރޭސިވިލާތުގެ ލީޑްސް ޔުނިވަރސިޓީގައެވެ. ތަޢުލީމީ ޙަޔާތުގައި، އިބްތިދާއީ މަރުޙަލާއިން ފެށިގެން ޕީއެޗްޑީ ޙާޞިލްކުރެއްވުމާ ހަމަޔަށްވެސް އެމަނިކުފާނު ވަނީ މަތީ ނަތީޖާތަކެއް ޙާޞިލްކުރައްވައިފައެވެ. މަޝްރޫޢުތައް ރާވައި ހިންގުމުގައި ދުނިޔޭގެ ފެންވަރުގައި އެންމެ އިތުބާރުހުރި ސަނަދުދޭ އެއް މުއައްސަސާކަމުގައިވާ އެމެރިކާގެ ޕްރޮޖެކްޓް މެނޭޖްމަންޓް އިންސްޓިޓިއުޓުން، ޕްރޮޖެކްޓް މެނޭޖްމަންޓް ޕްރޮފެޝަނަލް (ޕީއެމްޕީ) ސެޓްފިކެޓްވެސް އެމަނިކުފާނު ވަނީ ޙާޞިލްކުރައްވައިފައެވެ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދިވެހި ސަރުކާރަށް ޚިދުމަތްކުރައްވަން ފެށްޓެވީ 1998 ވަނަ އަހަރުގެ މާރިޗްމަހުއެވެ. އަދާކުރެއްވި ފުރަތަމަ ވަޒީފާއަކީ މިނިސްޓްރީ އޮފް ކޮންސްޓްރަކްޝަން އެންޑް ޕަބްލިކް ވޯކްސްގެ ޕްލޭނިންގ ޓެކްނީޝަން ޓްރޭނީއެއްގެ މަޤާމެވެ. ސަރުކާރަށް ޚިދުމަތްކުރެއްވުމުގެ އިތުރުން، ރާއްޖޭގެ އަމިއްލަ ބައެއް ކުންފުނިތަކުގައިވެސް އިސް މަޤާމުތަކެއްގައި ޚިދުމަތްކުރެއްވިއެވެ. އަދި ސިޔާސީ ބައެއް ޕާޓީތަކުގެ އިސް މަޤާމުތައްވެސް ފުރުއްވާފައިވެއެވެ.
ވެރިކަން ބަދަލުވުމާ ގުޅިގެން ނިމިގެން ދިޔަ ލޯކަލް ކައުންސިލް އިންތިހާބުގަ ވާދަކުރެއްވީ އެމްޑީޕީގެ ކިއްލާއެއްގެ ގޮތުގައި އޭރު އޮތް މާލޭގެ މޭޔަރު ކަމަށެވެ. އެންމެން ހައިރާންކޮށްލުމަށްފަހު ބޮޑު އަގުލަބިއްޔަތަކުން މާލޭގެ މޭޔަރުގެ މަގާމުވެސް އިދިކޮޅު ޕީޕީއެމް ޕީއެންސީއަށް ފުރަތަމަ ފަހަރަށް ހޯއްދަވައިދެއްވީ މުއިއްޒުއެވެ. އަދި މާލެ ސިޓީ ކައުންސިލްގެ ސާފު އަގުލަބިއްޔަތުވެސް ހޯއްދެވި އެވެ. މާލޭގެ މޭޔަރު ކަމަށް އޭޕްރީލް، 2021 ގައި އިންތިހާބުވުމަށްފަހު މުއިއްޒު މިއަދުވެސް ހުންނެވީ އެ މަގާމު ގައެވެ.
2012 ވަނަ އަހަރުގެ ފެބްރުއަރީމަހުން ފެށިގެން 2018 ވަނަ އަހަރުގެ ނޮވެމްބަރު މަހަށް، ދިވެހިރާއްޖޭގެ ބޯހިޔާވަހިކަމާ ޢުމްރާނީ ތަރައްޤީގެ ދާއިރާގެ ވަޒީރުކަމުގެ މަޤާމު އެމަނިކުފާނު ފުރުއްވި އަހަރުތަކަކީ، ރާއްޖޭގެ ތާރީޚުގައި މިހާތަނަށް އެންމެ ގިނަ ގެދޮރުވެރިކަމުގެ މަޝްރޫޢުތައް ކާމިޔާބުކަމާއެކު ހިންގުނު ދުވަސްތަކެވެ. އަދި އެންމެ އުސް ޢިމާރާތްތަކާ އެންމެ ބިޔަ ޢުމްރާނީ މަސައްކަތްތައް ރާއްޖޭގައި ކުރިއަށްދިޔަ ދުވަސްތައްވެސް މެއެވެ.
އަދި އެންމެ ގިނަ މަގު ތާރު އަޅައިގެން ހެދުމާ، ބިން ހިއްކުމުގެ އެންމެ ބޮޑެތި މަޝްރޫޢުތައް ފަށައި، ކާމިޔާބުކަމާއެކު ނިންމި ދުވަސްތައްވެސް މެއެވެ. މީގެ ތެރެއިންވެސް ވަކީން ޚާއްޞަކޮށް، ސިނަމާލެ ބްރިޖް، ދަރުމަވަންތަ ހޮސްޕިޓަލް، ހިޔާ ފްލެޓްތައް، ހައްދުންމަތީ ބޮޑުމަގު، މާލޭ ރިންގް ރޯޑް، މާލޭ އިންޑަސްޓްރިއަލް ވިލެޖް، ހުޅުމާލެ 2 ވަނަ ފިޔަވަހި ބިން ހިއްކުން ފާހަގަކޮށްލެވެއެވެ. މާލެ ސިޓީގައި އެންމެ ގިނަ ޕާކްތަކާ ބަގީޗާތައް ނިންމައި ހުޅުވާލާފައިވަނީވެސް އެމަނިކުފާނުގެ ބެއްލެވުމުގެ ދަށުންނެވެ. މީގެ އިތުރުން، ރާއްޖޭގެ ވަރަށް ގިނަ ރަށްތަކާ ސިޓީތަކުގައި ބިން ހިއްކުމާ، ބަނދަރުހެދުމާ، ފެނާ ނަރުދަމާގެ ޚިދުމަތް ފަދަ ތަރައްޤީގެ މަޝްރޫޢުތައް އެމަނިކުފާނުގެ މިނިސްޓަރުކަމުގައި ވަނީ ހިންގައިފައެވެ.
ވެރިކަންކުރާ މާލެ ސިޓީގެ ރައްޔިތުންގެ ސީދާ ވޯޓަކުން، މާލެ ސިޓީއަށް އިންތިޚާބުކުރި ފުރަތަމަ މޭޔަރަކީވެސް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒެވެ. 17 މެއި 2021 ން 17 ނޮވެމްބަރު 2023 ށް މާލެ ސިޓީގެ މޭޔަރުކަމުގައި އެމަނިކުފާނު ހޭދަކުރެއްވި 2 އަހަރާ 6 މަސްދުވަހުގެ ތެރޭގައި މާލެ ސިޓީ ފެހިކޮށް ޗާލުކޮށް، ރައްޔިތުން އެދޭ އަމާޒަށް ހެޔޮ ބަދަލުތަކެއް ގެނަސްދެއްވުމުގައި މަޤްބޫލު މަސައްކަތްތަކެއް ވަނީ ކުރައްވައިފައެވެ. އަދި މޭޔަރުކަމުގައި ހުންނަވައިގެން ސީދާ ރައްޔިތުންގެ ގޭގެއަށް ސިލްސިލާކޮށް ޒިޔާރަތްކުރައްވައި، ހާލުބައްލަވައި، އެކި ކަންކަމުގައި ސީދާ ރައްޔިތުންނާ މަޝްވަރާކުރެއްވުމުގައި އެމަނިކުފާނު ވަނީ ނަމޫނާ ދައްކަވައިފައެވެ. ލާމަރުކަޒީ ނިޒާމު ނަގަހައްޓައި ކައުންސިލްތައް ބާރުވެރިކުރުވުމަށް އެމަނިކުފާނުގެ މޭޔަރުކަމުގައި ވަނީ އަޑުއުފުއްލަވައި ވަކާލާތު ކުރައްވައިފައެވެ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އެމަނިކުފާނުގެ ރިޔާސީ ދައުރުގައި ދިވެހީންގެ މިނިވަންކަން ކަށަވަރުކޮށްދެއްވައި، ރައްޔިތުންގެ މެދުގައި އިންސާފާ ހަމަހަމަކަން ޤާއިމުކުރައްވައި، އިސްލާމްދީނާ ދިވެހި ޤައުމިއްޔަތުގެ އަސާސްތައް ނަގަހައްޓަވައި، ގެދޮރުވެރިކަން ޔަޤީންކޮށްދެއްވައި، ތަރައްޤީގެ އައު ޒަމާނެއް ދިވެހި ޤައުމަށް ގެނެސްދެއްވުމުގެ މަސައްކަތް ކުރައްވާނެކަމަށް ވަނީ ރިޔާސީ ކެމްޕޭނުގައި އިޢުލާނުކުރައްވައިފައެވެ.
މިއަދު ހުވާ ކުރެއްވި ވަގުތު ރައީސް ޑރ މުއިއްޒު ގައުމާއި ދިވެހީންނާ މުހާތަބު ކުރައްވައި ދެއްވީ ޔަގީންކަމެވެ. އެމަނިކުފާނަށް ކުރާ އިތުބާރު ދަމަހައްޓާނެ ކަމާއި ދިވެހިންނަށްޓަައި ގައުމުގެ ހާލަތު ބަދަލުކޮށްދެއްވައި ﷲގެ އިރާދައާއި މިންވަރުފުޅުން، އޮޔާ ބެހެމުންދާ ދިވެހިރާއްޖެ، ހުޅިލާ ނަގާ ބިޔަ ބޮޑެތި ނުރައްކަލުގެ ރާޅުތަކުން ސަލާމަތްކޮށްދެއްވައި ހަމަޖެހޭ އަމާން އޮމާން ފާގަތިކަމުގެ އައްސޭރިއަކަށް ގެންގޮސްދެއްވާނެ ކަމުގެ ޔަގީންކަން ދިވެހިންނަށް އެވަނީ ދެއްވާފައެވެ. އެމަނިކުފާނު ވަނީ ދިވެހި ދިދައަށް ވެސް ވައުދެއް ވެވަޑައިގެންފައެވެ. ދިވެހި ދިދައަށް އެވިދާޅުވި ބަސްފުޅުތައް އިވުނު ކޮންމެ ފަރާތެއްގެ އަތް އެމަނިކުފާނަށް ސަލާމަށް އުފުލޭނެއެވެ. ޔަގީނެވެ. ދިވެހިރާއްޖެއަށް ފާގަތި އަމާން ފަހި މުސްތަގްބަލެއް ގެނެސްދެއްވުމުގައި ރައީސުލްޖުމްހޫރިއްޔާ ޑރ މުހައްމަދު މުއިއްޒަށް ކާމިޔާބުކޮށްދެއްވާށި! އާމީން!