ކުޑަކުއްޖަކަށް އަނިޔާކުރާ ވީޑިއޯއެއް ސޯޝަލް މީޑިއާގައި ދައުރުވަނީ، ޖެންޑާއިން މައްސަލަ ބަލަންފަށައިފި

ފޭސްބުކް ޕޭޖް ”މިނިސްޓްރީ އޮފް ޖުހާ“ގައި އާންމުކޮށްފައިވާ ވީޑިއޯއެއްގައި ފެންނަނީ އަންހެނަކު ކުޑަކުއްޖަކަށް ކާންދޭން އިނދެ އަނިޔާކުރަމުންދާ މަންޒަރެވެ. އަދި ކުއްޖާއާއި ދިމާލަށް ހަޅޭއްލަވާ އަޑުގަދަ ކުރާ މަންޒަރު ފެނެއެވެ. ވީޑިއޯއާއިއެކު އާންމުކޮށްފައިވާ މަޢުލޫމާތަށް ބަލާއިރު ބެލެވޭގޮތުގައި އަނިޔާ ކުރަނީ ކުއްޖާގެ މަންމައެވެ.

އާންމުވެފައިވާ ވީޑިއޯއާއިއެކު ހިއްސާ ކޮށްފައިވާ މަޢުލޫމާތަކީ ކުއްޖާގެ ބައްޕަގެ ފަރާތުން ހިއްސާކޮށްފައިވާ މަޢުލޫމާތުކަމަށް ދޭހަވެއެވެ.

އޭގައި ބުނެފައިވަނީ ދަރިންގެ މަންމައަކީ އަބަދުވެސް ދަރިންނަށް އެކިކަހަލަ ޖިސްމާނީ އަނިޔާ އާއި ނަފްސާނީ އަނިޔާދޭ މީހެއްކަމަށާއި، އަދި ވީޑިއޯ ކޮށްފައިވަނީ ދަރިންނަށް އަނިޔާ ކުރާތީ އެކަމުގެ ހެއްކެއްގެ ގޮތުން މުއައްސަސާތަކަށް ހުށަހެޅުމަށް ކަމަށެވެ.

ހިއްސާ ކޮށްފައިވާ މަޢުލޫމާތުގައި ވާގޮތުން އެ މަންމަ އަކީ ދަރިންނަށް އަނިޔާ ކުރާ މީހެއް ކަމަށާއި، ދެމަފިރިންގެ ކައިވެެނި ރޫޅުމަށްފަހު ބައްޕައަށް ދަރިން ނުދައްކާ ފޮރުވައިގެން ގެންގުޅޭ ކަމަށާއި، ބައްޕައަށް ދަރިންގެ ހާލު ބަލާ ހެދުމުގެ ފުރުސަތުވެސް ދީފައިނުވާކަމަށް ވަނީ ބުނެފައެވެ. އަދި މިކަމުގެ ޝަކުވާ އާއި ކަންބޮޑުވުންތައް ހދ. ކުޅުދުއްފުށި ސިޓީގެ ޖެންޑަރ މިނިސްޓްރީއާއި މީގެ ކުރިން ހިއްސާކޮށްފައިވާ ކަމާއި، މިއަދާއި ހަމަޔަށްވެސް އެއްބާރުލުން ދީފައިނުވާކަމަށް ބުނެފައިވެއެވެ.

ދައުރުވަމުންދާ އެ ވީޑިއޯގައި ކުޑަކުއްޖާގެ ހަށިގަނޑުން ފެންނަންހުރި އަނިޔާގެ ނިޝާނަކީ އެކުއްޖާ އެންމެފަހުން ބައްޕަ އަށް ފެނުނުއިރު ހުރި ޙާލަތުކަމާއި، ކުދިން ގެންގޮސްފައިވަނީ ފިރިހެންމީހާ ރަށުންބޭރު ވަޒީފާއެއްގައި ހުއްޓައި އޭނާއަށް އެންގުމަކާނުލާ ކަމަށާއި، އަދި ކުދިން ސްކޫލުން ވަކިކޮށްގެން ރަށުން ފިލައިގެން އަންހެންމީހާގެ ރަށަށް ދިރިއުޅުން ބަދަލުކޮށްފައިވާކަން ފާހަގަކޮށްފައިވެއެވެ. ވީޑިއޯގައި ކުއްޖާގެ ގައިން ފެނުން ނިޝާންތަކަކީ ކުއްޖާގެ މަންމަ ކުދިން ގެންދިޔަތާ 3 މަސް ފަހުން ކުދިންގެ މަންމަ ކައިރިން ވަރިވުމަށް ފިރިހެން މީހާ އެރަށަށް ދިޔައިރު ހުރި ޙާލަތު ކަމަށް ބަޔާންކޮށްފައިވެއެވެ.

އަނިޔާތަކާއި ގުޅިގެން ތަކުރާރުކޮށް ދަރިފުޅާއި ސުވާލުކުރުމުންވެސް އެއީ މަންމަ ދީފައިވާ އަނިޔާތަކެއް ކަމަށާއި މަންމަދެކެ ބިރު ގަންނަކަމަށް ކުއްޖާ ބުނެފައިވާކަމަށްވެސް ހާމަކޮށްފައިވެއެވެ. ދަރިންގެ މަންމަ ދަރިން ގޮވައިގެން ދިޔަތާ މިހާރު 8 މަސްދުވަސް ވެފައިވާ ކަމަށާއި، މި މުއްދަތުގައި ދަރިން ސްކޫލަށްވެސް ގެންގޮސްފައި ނުވާކަމަށް، އަދި ދަރިންނަށް އިހުމާލު ވެފައިވާ ކަން އެނގޭއިރުވެސް މިއަދާ ހަމަޔަށްވެސް ޖެންޑަރ މިނިސްޓްރީ އިން މިކަމަށް އެކަށީގެންވާ އެއްބާރުލުމެއް ދީފައިނުވާކަމަށް ތަފްސީލްގައިވެއެވެ.