ކްރޭން ލޮރީއެއް ޖެހި ހިގި އެކްސިޑެންޓެއްގައި އަނިޔާވެ ތިނަދޫ ސިޓީ ކައުންސިލުން މެމްބަރު މުހައްމަދު ޒަލީފް އަބްދުﷲ އަށް ފަރުވާ ދޭން ފަށައިފިއެވެ.
މައުލޫމާތު ލިބޭގޮތުގައި މި އެކްސިޑެންޓް ހިނގީ މިއަދު ހެނދުނު 11 ޖެހި އިރު ތިނަދޫ ގައި ހުންނަ މޯލްޑިވްސް ނޭޝަނަލް ޔުނިވަސިޓީ އަކުން އާއި އެމްޓީސީސީ ސައިޓް ކަންމަތިންބެވެ. މި އެކްސިޑެންޓް ހިނގާފައި ވަނީ ކްރޭން ލޮރީ އާއި ޒަލީފް ދުއްވަން އިން ސައިކަލް ޖެހިގެން ކަމަށް ވެސް މައުލޫމާތު ލިބެއެވެ.
ތިނަދޫ ބަނދަރު ސަރަހައްދު މަގުގެ ދެކުނު، ނިމޭ ހިސާބުގައި ހިގައި ދިޔަ މި ހާދިސާގައި އަނިޔާ ލިބުނު ކައުންސިލް މެމްބަރު ޒަލީފް ވަނީ ކައިރީގައި ހުރި ޑރ އަބްދުއްސަމަދު މެމޯރިއަލް ހޮސްޕިޓަލުގެ އަވަސް ފަރުވާދޭ ބަޔަށް ގެންދެވި ފަރުވާ ދޭން ފަށާފައެވެ.
އެ ހޮސްޕިޓަލުން ހުވަދޫ މީޑިއާ އަށް މައުލޫމާތު ދެމުން ބުނީ އެކްސިޑެންޓެއްގައި އަނިޔާ ލިބުނު ޒަލީފް އަށް ދަނީ ފަރުވާ ދެމުން ކަމަށް ފަޔަށް ކޮންމެވެސް ވަރެއްގެ ޒަޚަމް ތަކެއް ވެފައިވާ ކަމަށާއި މާބޮޑު ސީރިއަސް ކަމެއް ނެތް ކަމަށެވެ.