ހެޔޮ ޢަމަލު ގިނަކުރުމަކީ ގަސްދަކާ ނުލައި ކުރެވޭ ފާފައިން ސަލާމަތްކޮށްދޭނެ ކަމެއް ކަމަށް ހުކުރު ޚުޠުބާގައި ވިދާޅުވެއްޖެއެވެ. މިއަދުގެ ޚުޠުބާގެ މަޢުޟޫއަކީ “ޝަޢުބާން މަހާއި ހެޔޮ ޢަމަލުކުރުން”އެވެ.
ޚުޠުބާގައި ވަނީ ލިބޭތާ ފެން ނަގާށޭ ބުނާ ފަދައިން ލިބިފައި އޮތް ފުރުޞަތުގެ ބޭނުން ފުރިހަމަ ގޮތުގައި ހިފުމަށް އެންމެހާ ފަރާތްތަކަށް ނަޞޭހަތްތެރިވެފައެވެ. އަދި ހެޔޮ ޢަމަލުތައް އޭގެ އެންމެ ފުރިހަމަ ގޮތުގައި ކުރެވޭނީ ގައިގައި ބާރުހުއްޓާ ކަމަށާއި މުސްކުޅިވެ ގައިން ބާރުދެރަވުމުން ފުރިހަމަކަމާއިއެކު އެއްވެސް ކަމެއް ނުކުރެވޭނެ ކަމަށް ޚުޠުބާގައި ވިދާޅުވިއެވެ. ހަމައެއައިއެކު، ކޮންމެ ޢަމަލަކީ ވެސް އިސްލާމްދީނުގެ ތަރަހައިގެ ތެރޭގައި ކުރަންޖެހޭ ޢަމަލެއްކަން ޚުޠުބާގައި ފާހަގަކުރައްވާފައިވެއެވެ.
ޚުޠުބާގައި ވިދާޅުވީ ޝަޢުބާން މަހުގެ ދުވަސްތައް ގުނަމުންދާއިރު، މިފަދަ ދުވަސްވަރެއްގައި ކީރިތަ ރަޞޫލާ ދައްކަވާފައިވާ މަގުގައި ކަސިޔާރުނުވެ ހިފެހެއްޓޭތޯ ބެލުމަކީ ކޮންމެހެން ބޭނުންކަމެއް ކަމަށެވެ. އަދި މާތް ނަބިއްޔާގެ ޢަމަލުފުޅުތަކަށް ތަބާވުމަކީ، އަޅުގަނޑުމެންނަށް ފައިދާއާއި މަންފާކުރާނެ ކަމެއްކަމަށް ވެސް ޚުޠުބާގައި ވިދާޅުވެފައިވެއެވެ.
“ހެޔޮ ޢަމަލުކުރުން އިތުރުކުރުމަކީ، ގަޞްދަކާ ނުލައި ކުރެވޭ ފާފައިން މާތް الله އަޅަމެން ސަލާމަތް ކުރައްވާނެ ކަމެއް. މިފަދަ މޫސުމެއްގައި މާތް ނަބިއްޔާ ޞައްލަﷲ ޢަލައިހި ވައްސަލަމަ ދައްކަވާފައިވާ މަގުގައި ކަސިޔާރުނުވެ ހިފެހެއްޓޭތޯ ބެލުމަކީ ކޮންމެހެން ބޭނުން ކަމެއް. އެކަލޭގެފާނުގެ ޢަމަލުފުޅުތަކަށް ތަބަޢަވުމަކީ އެކަމުން އަހުރެމެންނަށް ފައިދާއާއި މަންފާ ކުރާނެ ކަމެއް.” ޚުޠުބާގައި ވިދާޅުވިއެވެ.
ހުކުރު ޚުޠުބާގައި ވަނީ ރަމަޟާން މަހު ރޯދަހިފުމަކީ ކޮންމެ ދުވަހަކު ކުރާ އަޅުކަމަކަށް ވެފައި، އެ އަޅުކަމަށް ތައްޔާރުވުމަށް ހަށިގަނޑާއި ނަފްސު ހޭނުވުމަކީ ކޮންމެހެން ބޭނުންކަމެއް ކަމަށް ވިދާޅުވެފައެވެ. މިހެންވެ، ޝަޢުބާން މަހު ސުންނަތް ރޯދަ ހިފުމަކީ އެދެވިގެންވާ ކަމެއް ކަން ޚުޠުބާގައި ފާހަގަކުރައްވާފައިވެއެވެ. އަދި ކީރިތި ރަސޫލާއާއި އެކަލޭގެފާނުގެ ޞަޙާބީންނާއި އެބޭކަލުންނަށް ތަބަޢަވީ ބޭކަލުން ހެޔޮ ޢަމަލުކުރެއްވުން މިފަދަ ދުވަސްތަކުގައި އިތުރުކޮށްފައިވާކަން ވެސް ޚުޠުބާގައި ވަނީ ފާހަގަކުރައްވާފައިވެއެވެ.
މިއަދުގެ ޚުޠުބާގައި ސުވަރުގެއަށް ދިޔުމަށް އެދޭނަމަ ކީރިތި ޤުރްއާނާއި މާތް ނަބިއްޔާ ޞައްލަﷲ ޢަލައިހި ވައްސަލަމަގެ ސުންނަތަށް ޢަމަލުކުރުމަށް ގޮވާލައްވާފައިވެއެވެ. އަދި ތިމަންނައަށް ނޭނގެއޭ ބުނެ، ޝަޢުބާން މަހުގެ ބަރަކާތާއި ރަޙްމަތުގެ ދުވަސްތައް ނަގާނުލުމަށް ވެސް ޚުޠުބާގައި ވަނީ އިލްތިމާސްކުރައްވާފައެވެ. އަދި ދީނުގެ ކަންކަން ދަންނަ މީހުން ކުރެން އޮޅުން ފިލުވުމަށާއި ދީނުގެ ޙުކުމްތަކާއި ދަރުސްތައް އަޑުއަހައި އަމިއްލަ ނަފްސު އިސްލާމީ ޢިލްމުން މުއްސަނދިކޮށް، ޒީނަތްތެރިކުރުމަށް ވެސް ޚުޠުބާގައި ވަނީ ގޮވާލައްވާފައެވެ.
“މާތް الله ގެ އަޅުތަކުންނޭވެ! ސުވަރުގެއަށް ދިޔުމަށް މަގުކޮށާކަމުގައި ވާނަމަ، ކީރިތި ޤުރްއާނާއި މާތް ނަބިއްޔާ ޞައްލަﷲ ޢަލައިހި ވައްސަލަމަ ގެ ސުންނަތަށް ޢަމަލު ކުރާށެވެ! ތިމަންނައަށް ނޭނގެއޭ ބުނެ ބަރަކާތާއި ރަޙްމަތުގެ ދުވަސްތައް ނަގައި ނުލާށެވެ! ދަންނަ މީހުންކުރެ އަހައި އޮޅުންފިލުވާށެވެ! އިސްލާމްދީނުގެ ޙުކުމްތަކާއި ދަރުސްތައް އަޑުއަހައި ތިމާގެ އަމިއްލަ ނަފްސު އިސްލާމީ ޢިލްމުން މުއްސަނދިކޮށް، ޒީނަތްތެރި ކުރާށެވެ!” ޚުޠުބާގައި ވިދާޅުވިއެވެ.
މިއަދުގެ ހުކުރު ޚުޠުބާގައި އަޅުކަންތައް ކުރުމަށާއި، ހެޔޮ ޢަމަލުކުރުމަށް ހަނދާންކޮށްދިނުމަށް ވެސް ވަނީ އިލްތިމާސްކުރައްވާފައެވެ. އަދި ހަނދާންކޮށްދިނުމަކީ ފައިދާކުރާނެ ކަމެއް ކަމަށް ޚުޠުބާގައި ބަޔާންކުރައްވާފައިވެއެވެ.