ސިކުނޑީގެ ކެންސަރުގެ ނުރައްކާތެރި ވައްތަރަކާ ހަނގުރާމަ ކުރި 13 އަހަރުގެ ފިރިހެން ކުއްޖަކު ބަލިން މުޅިން ރަނގަޅުވެއްޖެ އެވެ.
ބެލްޖިއަމް އަށް ނިސްބަތްވާ ލޫކަސް ހަމެލަނޯވާ އަށް ސިކުނޑީގެ ކެންސަރުގެ ބާވަތެއް ކަމަށްވާ ޑިފިއުސް އިންޓްރިންސިކް ޕޮންޓީން ގްލައޯމާ (ޑީއައިޕީޖީ) ޖެހުނީ އުމުރުން އެންމެ ހަ އަހަރުގަ އެވެ.
ލޫކަސް ކެންސަރަށް ޑައިގްނޯޒް ވުމުން އޭނާގެ އާއިލާ އިން ކެންސަރުގެ ފަރުވާ އަށް ލޫކަސް ގެންދިޔައީ ފްރާންސް އަށެވެ. ފްރާންސްގައި ކުރިއަށްދިޔަ ކްލިނިކަލް ޓްރަޔަލް އެއްގައި ލޫކަސް ބައިވެރިކޮށްގެން ކީމޯތެރަޕީ ދިނެވެ. ލޫކަސް އަށް ފަރުވާ ދިން ޓްރަޔަލްގައި ބޭނުންކުރި ބޭހަކީ " އެވެރޯލިމަސް" ގެ ނަމުން ނަން ދީފައިވާ މުޅިން އާ ކީމޯތެރަޕީ ބޭހެކެވެ. އެ ޓްރަޔަލްގައި އެތައް ސަތޭކާ ކެންސަރު ޕޭޝަންޓުންނަށް ފަރުވާދިންއިރު އެތަނުން ކީމޯތެރަޕީ އަށް އެންމެ ރަނގަޅަށް ރިއެކްޓު ކުރީ ލޫކަސްގެ ހަށިގަނޑުންނެވެ.
ކީމޯތެރަޕީ ނަގަން ފެށިތާ އެންމެ ނުވަ މަސް ތެރޭގައި ލޫކަސްގެ ސިކުނޑި ވަނީ އެ ޓިއުމަރުން މުޅިންހެން ސަލާމަތްވެފަ އެވެ. ކެންސަރު ޖެހުނުތާ ހަތް އަހަރު ފަހުން ލޫކަސް އެ ބަލިން މުޅިން ރަނގަޅުވެފައިވާ ކަމަށް އޭނާ ބެލި ޑޮކްޓަރުންގެ ޓީމުން ވަނީ ބުނެފައެވެ. ކެންސަރުގެ ފަރުވާ އަށް ހޭދަކުރި ނުވަ މަހަށްފަހު މިދިޔަ ފަސް އަހަރު ލޫކަސް ހުރީ ރެމިޝަންގަ އެވެ. ރެމިޝަން މުއްދަތުގައި ވެސް ލޫކަސްގެ ހަށިގަނޑުން ކެންސަރުގެ އެއްވެސް އަސަރެއް ފެނިފައިނުވާ ކަމަށް އޭނާގެ ޑޮކްޓަރުންގެ ޓީމުން ބުނެފައިވެއެވެ.
ލޫކަސްގެ ޑރ. ޖެކްސް ގްރިލް ބުނިގޮތުގައި ލޫކަސް ނުވަ މަސްދުވަހުގެ ތެރޭ ކެންސަރުގެ މިހާ ނުރައްކާތެރި ވައްތަރަކުން ސަލާމަތްވީ ކީމޯ ބޭހަށް އޭނާގެ ހަށިގަނޑުން ރިއެކްޓު ކުރި ގޮތުންނެވެ.
" ‘ އެވެރޯލިމަސް ‘ މިއީ މުޅިން އަލަށް ކެންސަރުގެ ފަރުވާ އަށް ބޭނުންކުރަން ފެށި ބޭހެއް. މި ބޭހުން އެމްޓޯ ނަމަކަށް ކިޔާ ކެންސަރު ސެލް ތެރޭގައި ހިމެނޭ ޕްރޮޓީން އެއް ބްލޮކް ކޮށްލަނީ. މި ޕްރޮޓީން އަކީ ކެންސަރު ސެލްތައް ޓިއުމަރުގެ ތެރޭގައި ޑިވައިޑް ވާން އެހީވެދޭ ޕްރޮޓީން. އެވެރޯލިމަސްގެ ބޭހުގެ ސަބަބުން މި ޕްރޮޓީން އަށް ލޭ ލިބުން ބްލޮކްވެ ކެންސަރު ސެލްތައް އިތުރަށް ޑިވައިޑްނުވެ މަރުވެގެންދޭ. ލޫކަސްގެ ހަށިގަނޑު ވަރަށް ރަނގަޅަށް މި ބޭހަށް ރިއެކްޓު ކޮށްފި. އަހަރުމެންވެސް މިތިބީ އަޖައިބުވެފައި އެހާ ކާމިޔާބުކަމާއެކީ ނުރައްކާތެރި ކެންސަރެއް ހަށިގަނޑުން ނައްތާލެވުނީމަ، " ޑރ. ގްރިލް ބުންޏެވެ.
ލޫކަސް އަށް ޖެހުނު ވައްތަރުގެ ކެންސަރު އުފެދެނީ ސިކުނޑީގެ އެންމެ އެތެރޭގައި ސިކުނޑީގެ މެދަށްވާ ހިސާބުގައެވެ. މި ހިސާބަށް ކިޔަނީ ޕޮންސް އެވެ. މިއީ އިންސާނާގެ ނޭވާލުމުގެ ނިޒާމާއި، ނިދުން އަދި ބްލަޑް ޕްރެޝަރު ފަދަ މައިގަނޑު ފަންކްޝަންސް ތަކުގެ ބެލެނިވެރި ސަރަހައްދު ކަމަށްވުމުން މިތަނަށް ކެންސަރު ޖެހުމުން ހަށިގަނޑު ވަރަށް އަވަހަށް ވީކްވެ އަވަހަކަށް މީހާގެ ހިތުގެ ވިންދާއި، ލޮލުގެ ފެނުން އަދި ބެލެންސް ކުރުން ފަދަ ކަންކަމަށް ނޭދެވޭ އަސަރު ކޮށް ފުރާނައަށް ނުރައްކާކޮށްދެ އެވެ.
ޑރ. ގްރިލްގެ ޓީމުން ބުނިގޮތުން ލޫކަސްގެ ހަށިގަނޑުން އެހާ އަވަހަށް މިހާ ނުރައްކާތެރި ވައްތަރެއްގެ ކެންސަރު ނައްތާލެވުނު ނުވަތަ ލޫކަސްގެ ހަށިގަނޑުން އެހާ ރަނގަޅަށް ރިއެކްޓު ކުރި ހަގީގީ ސަބަބު އަދިވެސް ދެނެގަނެވިފައިނުވާ ކަމަށެވެ. ލޫކަސްއާއެކު ކްލިނިކަލް ޓްރަޔަލްގައި އެ ޓީމުން ފަރުވާ ދިން ސިކުނޑީގެ ކެންސަރު ޖެހިފައިވާ ހަތް ކުދިންތަކުގެ ތެރެއިން ޓިއުމަރު އެއްކޮށް ނައްތާލެވުނީ ލޫކަސްގެ ހަށިގަނޑުން އެކަންޏެވެ.
ޑީއައިޕީޖީ އަށް އަހަރަކު 300 އެއްހާ ކުޑަ ކުދިން ޑައިގްނޯޒްވެ އެވެ. މި ވައްތަރުގެ ކެންސަރު ޖެހުމުން އާންމުގޮތެއްގައި ޕޭޝަންޓުންނަށް ދެނީ ނުވަ މަސްދުވަހުގެ ސަވައިވަލް މުއްދަތެކެވެ. އަދި 5 އަހަރުގެ ސަވަވައިލް ރޭޓަކީ 98 ޕަސެންޓެވެ.