މަސްވެރިން މިފްކޯއަށް ކިރި މަހަށް ނުދީ ހުރި ފައިސާގެ ތެރެއިން 70 މިލިއަން ރުފިޔާ މިއަދާއި މާދަމާ މަސްވެެރިންނަށް ދޫކުރާނެ ކަމަށާއި އާދިއްތަ އަދި ހޯމަ ދުވަހު 30 މިލިއަން ދޫކުރާނެ ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެއެވެ.
މިނިސްޓަރު ޝިޔާމް ވަނީ، އަންނަ ހޯމައިގެ ކުރިން މަސްވެރިންނަށް 100 މިލިއަން ދޫކުރާނެ ކަމަށް ރައްޔިތުންގެ މަޖިލީހުގައި ވިދާޅުވެފައެވެ.
ފިޝަރީޒް މިނިސްޓަރީއާއި ފިނޭންސް މިނިސްޓްރީއާ މިފްކޯއިން މިއަދު ވަނީ މަސްވެރިންނަށް ފައިސާ ދޫކުރުން އަވަސްކުރުމަށް ބައްދަލުވުމެއް ބާއްވައިފައެވެ.
މިއަދު މަސްވެރިންނަށް ފައިސާ ދޫކުރަން ފެށޭނެ. މިއަދާ މާދަމާ 70 މިލިއަން ދޫކުރާނެ. ދެން އާދިއްތަ ހޯމައިގައި 30 މިލިއަން ދޫކުރާނެ” މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ، ކޫއްޑޫ އޮޕަރޭޝަނަށް ގެނައުމުގެ މަސައްކަތް ކުރަމުން އަންނަ ކަމަށާއި މަސްވެރިންގެ އެކައުންޓަށް ފައިސާ ޖަވާމުވުން އެ މައްސަލަވެސް ހައްލުވާނެ ކަމަށެވެ.
މިނިސްޓަރު ވިދާޅުވީ، މަސްވެރިންނަށް ނުދި މިހާރު ހުރީ 280 މިލިޔަން ރުފިޔާ ކަމަށެވެ. އޭގެ ތެރެއިން 100 މިލިޔަން މިމަހު 26 ވަނަ ދުވަހުގެ ކުރިން ދޫކުރުމަށްފަހު ދެން ހުރި ފައިސާ މާޗް ފަހެއްގެ ކުރިން ދޫކުރައްވާނެ ކަމަށްވެސް ވިދާޅުވިއެވެ.
މި ސަރުކާރު ވެރިކަމަށް އައިފަހުން މިފްކޯއިން ބޭރުކުރީ 18،987 ޓަނުގެ މަސް ކަމަށާއި، އެއަށް ލިބުނީ 395 މިލިއަން ރުފިޔާކަމަށްވެސް މިނިސްޓަރު ވިދާޅުވިއެވެ. ނަމަވެސް ނޮވެމްބަރު މަހުގެ 17 އިން ފެށިގެން މިހާތަނަށް، ކްރެޑިޓަށް ދޫކޮށްފައި ހުރި ތެލާއި އައިސް ހިމެނޭ ގޮތުން މަސްވެރިންނަށް ދޫކުރި ފައިސާގެ އަދަދު ޖުމުލަ 435 މިލިއަން ރުފިޔާއަށް އަރާ ކަމަށް ވެސް ވިދާޅުވިއެވެ.
ކިރުވި މަހަށް ފައިސާ ނުދީގެން ކޫޢްޑޫއަށް އެއްވެ މަސްވެރިން މުސާކުރަމުންދާއިރު، އެ މައްސަލަ ހައްލު ކުރުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ.