މި އަހަރުގެ ފުރަތަމަ ބެޗުގެ ގޮތުގައި ގާނޫނީ ވަކީލުކަމުގެ ހުވައި ކުރެއްވި 30 ފަރާތަކަށް އެ ދާއިރާގައި މަސައްކަތް ކުރުމުގެ ހުއްދަ ބާ ކައުންސިލުން ދީފި އެވެ.
ރޭ ބޭއްވި ރަސްމިއްޔާތުގައި ވަކީލުކަމުގެ ހުއްދަ ލިބޭ ފަރާތްތަކަށް ގާނޫނީ ހުވައި ލައިދެއްވީ ހައިކޯޓުގެ ފަނޑިޔާރު މުހައްމަދު ޝަނީޒް އަބްދުﷲ އެވެ. އެ ފަރާތްތަކަށް ގާނޫނީ ވަކީލުގެ ހުއްދަ ހަވާލުކޮށް ދެއްވީ ބާ ކައުންސިލްގެ ނައިބު ރައީސް މިޒުނާ އަހުމަދު އެވެ.
އެ ރަސްމިއްޔާތުގައި މިޒުނާ ވިދާޅުވީ ގާނޫނީ ވަކީލުންނަކީ އަދުލުވެރި، އިންސާފުވެރި، އަދި ގާނޫނީ ވެރިކަން ނެގެހެއްޓުމުގައި ޒިންމާދާރުކަމާއި މިނިވަންކަމާއެކު މަސައްކަތް ކުރަން ބައެއް ކަމަށެވެ. ވަކީލުންގެ ފެންވަރު ރަނގަޅު ކުރުމުގެ އިތުރުން ހުނަރާއި ފަންނު އިތުރަށް ތަރައްގީ ކުރުމަށް މަސައްކަތް ކުރުމަށް މިޒުނާ ވަނީ ނަސޭހަތްތެރިވެފައެވެ.
“ވަކީލުންނަކީ މަސައްކަތަށް ފަރުވާތެރި، ރަނގަޅު ސުލޫކާ އަހުލާގެއްގެ ބަޔަކަށް، ދާއިރާއަށް ވަނުމުގެ ޝައުގުވެރިވާ އެހެން ފަރާތްތަކަށް ނަމޫނާއަކަށް ވާނެ ކަމަށް އުންމީދު ކުރަން” މިޒުނާ ވިދާޅުވި އެވެ.
ގާނޫނީ ފަންނުގެ ގާނޫނު އައި ފަހުން ބާ ކައުންސިލުން ވަނީ ކޮލިފައިންގް ލޯ ޑިގްރީގެ އަސާސީ ޝަރުތު އެކުލަވާލައި، 2022 އިން ފެށިގެން ކޮންމެ އަހަރަކު އެއް ފަހަރު އިންތިޒާމުކުރާ ބާ ކައުންސިލްގެ އިމްތިހާނު ބާއްވައި، މި އަހަރު އަމަލުކުރަން ފަށާ ލައިސަންސިންގް ޓްރެއިނިންގެ އަލްޓަނޭޓިވް ރޫޓުތައް ތައާރަފްކޮށްފަ އެވެ.
މިކަންކަމަކަށް އަލިއަޅުއްވާލައްވައި ގާނޫނީ ފަންނު ކުރިއަރުވައި، ލައިސަންސިންގެ ނިޒާމަކީ ފެންވަރު ރަނގަޅު، ބައިނަލްއަގުވާމީ ދުނިޔެ ބަލައިގަންނަ ނިޒާމަކަށް ހެދުމަށްޓަކައި ބާ ކައުންސިލުގެ ރައީސް އަލްމަރުހޫމު އިސްމާއިލް ވިޝާމް ކޮށްދެއްވި މަސައްކަތްތައް މިޒުނާ ފާހަގަ ކުރެއްވި އެވެ.