އުތުރުގެ ހަތަރު އަތޮޅަކަށް ކުރައްވާ ދަތުރު ފުޅެއްގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ފުރާވަޑައިގެންފިއެވެ.
ރައީސް މުއިއްޒުގެ މި ދަތުރުފުޅުގައި، ހދ، ހއ، ށ އަދި ނ އަތޮޅުގެ ބައެއް ރަށްތަކަށް ވަޑައިގަންނަވާނެއެވެ
ދަތުރުގެ ފުރަތަމަ މަންޒިލެއްގެ ގޮތުގައި ރައީސް މިއަދު މެންދުރު ފުރަތަމަ ވަޑައިގަންނަވާނީ ހއ. ހޯރަފުއްޓަށެވެ. އެއަށްފަހު ހއ. ތުރާކުނާއި ހއ. އިހަވަންދޫ އާއި ހއ. ދިއްދުއަށް ވެސް މިއަދު ވަޑައިގަންނަވާނެއެވެ. އަދި މާދަމާ ހއ. ވަށަވަރާއި ހއ. ކެލާ އާއި ހއ. ބާރަށާއި ހދ. ހަނިމާދޫ އާއި ހދ. ނޮޅިވަރަންފަރަށް ވަޑައިގަންނަވާނެއެވެ.
ހޯމަ ދުވަހު ރައީސް ވަޑައިގަންނަވާނީ ހދ. ނެއްލައިދޫ އާއި ހދ. މަކުނުދޫ އާއި ށ. ކަނޑިތީމާއި ކުޅުދުއްފުށި ސިޓީއަށެވެ. އަންގާރަ ދުވަހު ރައީސް ވަޑައިގަންނަވާނީ ށ. މިލަންދޫ އާއި ށ. ކޮމަންޑޫގެ އިތުރުން ށ. ފުނަދޫއަށެވެ. އަދި ބުދަ ދުވަހު ރައީސް ވަޑައިގަންނަވާނީ ނ. ކެނދިކުޅުދޫ އާއި ށ. މިލަދޫ އާއި ނ. ހޮޅުދޫގެ އިތުރުން ނ. މަނަދޫއަށެވެ.
ރައީސްގެ ދަތުރުފުޅު ނިންމަވައިލެއްވުމަށްފަހު ބުރާސްފަތި ދުވަހު މާލެ ވަޑައިގަންނަވާނީ މާފަރު އިންޓަނޭޝަނަލް އެއާޕޯޓުންނެވެ.
ރައީސްގެ މި ދަތުރުފުޅުގައި، އެ ރަށްރަށުގެ ކައުންސިލްތަކާއި އަންހެނުންގެ ތަރައްގީއަށް މަސަައްކަތްކުރާ ކޮމިޓީ އާއި އެ ރަށްރަށުގެ ރައްޔިތުންނާ ބައްދަލުކުރައްވާނެއެވެ.
ރައީސްގެ މި ދަތުރުފުޅުގައި އެމަނިކުފާނުގެ އަރިހުގައި ކެބިނެޓުގެ ބައެއް ވަޒީރުންނާއި ބައެއް ކުންފުނިތަކުގެ ބައެއް ވެރިން ބައިވެރިވެވަޑައިގަންނަވާނެއެވެ.