ކުރިޔަށް އޮތް ރައްޔިތުންގެ މަޖިލީހަށް ގދ ތިނަދޫ ދެކުނު ދާއިރާއަށް ކުރިމަތިލާފައިވާ ފަސް ކެންޑިޑޭޓުންގެ ތެރޭގައި ހިމެނޭ އެންމެ ޒުވާން ކެންޑިޑޭޓާއި ދިމާވުމުން ކުރި ސުވާލަކަށް ޖަވާބު ދެމުން ފުރަތަމަ ވެސް ބުނީ މިހެނެވެ.
"އަޅުގަނޑުގެ ވިޕްލައިނަކީ ރައްޔިތުން". ގދ ތިނަދޫ ދެކުނު ދާއިރާއަށް އުފަން މުހައްމަދު އަލްސަން އަހުމަދު އާއި، އަޅުގަނޑު ކުރި ސުވާލަކީ މިނިވަން މީހެއްގެ ގޮތުގައި ރައްޔިތުންގެ މަޖިލީހުގައި ދާއިރާ ތަމްސީލު ކުރުމަށް ފުރުސަތު ލިބިއްޖެނަމަ ވިސްނުން ބަހައްޓާނީ ކޮން ގޮތަކަށް ހެއްޔެވެ.
އަލްސަންގެ ސިޔާސީ މަސައްކަތުގައި ދާއިރާގެ އާންމު މިހަކާއި ހިޔާލު ބަދަލުކޮށްލަނީ/ފޮޓޯ: އަލްސަން ކެމްޕެއިން އޮފީސް
އެއްވެސް ބައެއްގެ ނުފޫޒު އަލްސަންގެ މައްޗަށް ހިނގާނެ ހެއްޔެވެ. ކުރިން ބުނި ޖަވާބު ތަކުރާރު ކުރުމަށް ފަހު އޭނާ ބުނީ މަޖިލިސްގެ ނަމަކީ ރައްޔިތުންގެ މަޖިލިސް ކަމަށާއި ތަމްސީލު ކުރާނީ ދާއިރާ ގެ ރައްޔިތުންގެ މަންދޫބެއްގެ ޙައިސިއްޔަތުން ކަމަށާއި އެހެންކަމުން އިއްވާނީ ވެސް ރައްޔިތުންގެ ބަސް ކަމަށެވެ.
އަލްސަން އަކީ ސިޔާސީ ގޮތުން މާ ދަސް ފަރިތަ މޫނެއް ނޫނެވެ. ނަމަވެސް އޭނާއަކީ ޑިމޮކްރަސީގެ އާ ކޮޅިގަނޑުގައި ދިވެހިރާއްޖެ ޖެހެމުން ދިޔައިރު ވަރަށް ގާތުން އެ މަންޒަރުތައް ޝައުޤުވެރިކަމާއެކު ބަލަން ހުރި މީހެކެވެ. ރައީސް ނަޝީދު އިސްވެ ހުންނަވައިގެން މާލޭގެ މަގުމަތީގައި ތަފާތު ސިޔާސީ ހަރަކާތްތައް ކުރިޔަށް ގެންދެވިއިރު އެކަމާ ފިކުރު ކޮށް، އެންމެ ހަރަކާތެއް ވެސް ގެއްލުވާ ނުލާ ބަލަންހުރި މީހެކެވެ.
އަލްސަންގެ ސިޔާސީ ހަރަކާތެއްގެ ތެރެއިން ކެމްޕެއިން ޓީމާއި އެކު/ފޮޓޯ: އަލްސަން ކެމްޕެއިން އޮފީސް
"އޭރު އަޅުގަނޑަކީ ވަރަށް ކުޑަ ކުއްޖެއް. ސިޔާސީ ހަރަކާތްތައް ހިންގާ އިރު އަޅުގަނޑު ހުންނަނީ މަގުމަތީ، އާންމުންގެ ތެރޭގައި ބަލަން. ލޮލަށް ނިންޖެއްވެސް ނާންނާނެ ކަމެއް ހިގާ ނަމަ"
މަދުރަސީ ތަޢުލީމީ އެންމެ ފަހު ދުވަސްތަކަށް ދިޔައިރު ވެސް އަލްސަން ގެ ސިކުނޑީގައި ސިޔާސީ ޝައުޤުވެރިކަން ދިޔައީ އިތުރުވަމުންނެވެ. އެހެންކަމުން ކޮންމެވެސް ދުވަހަކުން ރައްޔިތުންގެ މަޖިލީހަށް މެމްބަރެއްގެ ގޮތުގައި ވަނުމަށް ޢަޒުމު ކަނޑައެޅިއެވެ. ރައްޔިތުންނަށް ޚިދުމަތް ކުރުމުގެ އެ އުއްމީދީ އިހުސާސް އަމިއްލަ އާއިލާގެ ތެރޭގައިވެސް ހިއްސާ ކުރި އެވެ.
އަލްސަން ކެމްޕެއިން އިވެންޓެއްގެ ތެރެއިން/ފޮޓޯ: އަލްސަން ކެމްޕެއިން އޮފީސް
ކިޔެވުން ނިންމާ ބިޒްނަސް މެނޭޖްމެންޓް ގެ ދާއިރާއިން މަތީ ތަޢުލީމް ޙާސިލް ކުރުމަށް ފަހު މިއަދު އަލްސަން އެހެރީ އޭނާގެ ކުޑައިރުގެ އުންމީދު ފުރިހަމަ ވޭތޯ ނުކުމެ އެވެ. ކުޑަ ދުވަސްކޮޅެއް ފަހުން އޮންނަ 20 ވަނަ ރައްޔިތުންގެ މަޖިލިސް އިންތިޚާބުގައި ގދ ތިނަދޫ ދެކުނު ދާއިރާއަށް ވާދަ ކުރުމަށް ކެނޑިޑޭޓުންގެ ސަފަށް އަރައެވެ. ކެނޑިޑޭޓް ނަންބަރު 1 ހިފައިގެން ރޭހުން އެއްވަނަ ލިބޭތޯ ފިސާރި ރަނގަޅަށް ތައްޔާރު ވެގެންނެވެ.
މަޑުމައިތިރި. މިޒާޖެއްގެ ވެރި އަލްސަން އަކީ ވަރަށް ގިނަ ޒުވާނުންނާ ގުޅޭ އިސްލާމް ދީނަށް ލޯބިކުރާ ޒުވާނެކެވެ. އިޚްލާޞްތެރި ހިތަކާ އެކު ޤައުމީ ވިސްނުމަށް އިސްނަގައި ތިނަދޫ ސިޓީ އަށް ތަރައްޤީ ގެނެވޭނެ މިސްރާބެއްގެ މަގު ކޮށުމުގެ ފިކުރުގައި މަޖިލީހަށް ދަތުރު ފެށި ތިނަދޫ ރޫޙު ހުރި ދަރިއެކެވެ.
މުހައްމަދު އަލްސަން އަހުމަދުގެ ކެމްޕެއިން ޕޯސްޓަރެއް/ފޮޓޯ:އަލްސަން ކެމްޕެއިން އޮފީސް
މައިގަނޑު ވިސްނުމަކީ ތަރައްޤީ، ރަށަށް މި ޒަމާނަށް ފެތޭނެ ބަދަލު ގެންނަން ވަކާލާތުކުރުން. އެ މަގަށް ގާނޫނު ހެދުން. ސަރުކާރުގެ އެތެރާއި ބޭރުން ގުޅުން ބަދަހި ކޮށް ޒިންމާދާރު މަސައްކަތެއް ޤައުމަށް ކުރުން. ރައްޔިތުންގެ އެދޭ ކަންކަން ކުރުން"
އޭނާ ބުނީ ތިނަދޫ ދެކުނު ދާއިރާ އަށް ވަރަށް އުންމީދީ ތަސައްވުރެއް އޭނާ ގެ ޕްލޭން ގައި ވާ ކަމަށެވެ. އެ މަޤްޞަދު ޙާޞިލު ކުރުމަށް ސަރުކާރާ އެކު އެއްމޭޒެއްގައި އިނުމަކީ އޭނާއަށް އުނދަގޫ ކަމެއް ނޫން ކަމަށެވެ.
މުހައްމަދު އަލްސަން އަހުމަދު
މުޙައްމަދު އަލްސަން އަހްމަދު ގެ ފަހު ބަހަކީ އެއްވެސް ބަޔަކު ޒާތީ ނުވެ އިޙްތިރާމާ އެކު އިންތިޚާބު ހުރިހާ ކަމެއް ކުރިޔަށް ގެންދިއުމެވެ. ބަސް ބުނާނީ ރައްޔިތުންނެވެ.