ރާއްޖޭގެ އިޤްތިޞާދު އިނދަޖައްސާލައި، ޤައުމު ބަނގުރޫޓްކޮށްލަން ނިމިދިޔަ ސަރުކާރުގެ ވެރިން ރާވާފައިވާކަން ހާމަވެފައިވާކަމަށް މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް މުހައްމަދު ސައީދު ވިދާޅުވެއްޖެއެވެ.
ރައީސުލްޖުމްހޫރިއްޔާ ށ. މިލަންދޫ ރައްޔިތުންނާއި ބައްދަލުކުރެއްވުމަށް އެ ރަށުގައި ބޭއްވި ޖަލްސާގައި ވާހަކަފުޅުދައްކަވަމުން އިކޮނޮމިކް މިނިސްޓަރ ވަނީ ރާއްޖޭގެ އިޤްތިޞާދު ނުރައްކަލަށް ހުށަހަޅަން ނިމިދިޔަ ސަރުކާރުގެ ވެރިން ރާވާފައިވާ ކަންކަމުގެ މައްޗަށް ބައްލަވާލައްވާފައެވެ.
މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް މުހައްމަދު ސައީދު ވިދާޅުވީ ނިމިދިޔަ ސަރުކާރުގެ ވެރިކަން ނިމުނުތާ ގިނަ ދުވަސްތަކެއް ނުވާއިރު، މިއަދު އޮތް ސަރުކާރަށް އެ ބޭފުޅުން ފާޑުކިޔާ މަންޒަރު ފެންނަމުންދާކަމަށެެވެ. ނަމަވެސް ޤައުމު ހަލަބޮލިކުރަން އިދިކޮޅު ފަރާތްތަކުން ދައްކާ ވާހަކަތައް ގަބޫލުކުރާނެ ބަޔަކު ނެތްކަމަށާއި، އެކަން ކާމިޔާބެއްވެސް ނުވާނެކަމަށް ސައީދު ވިދާޅުވިއެވެ.
ސައީދު ވިދާޅުވީ ކުރީ ސަރުކާރުގެ ރައީސާއި ފޮރިން މިނިސްޓަރު ވަނީ ބަޔަކާއި ގުޅިގެން ރާއްޖޭ ބަނގުރޫޓް ކޮށްލުމުގެ ޕްލޭނެއް ވެރިކަމުގައި ތިއްބެވިއިރު ރާވާފައިވާކަމަށެވެ. އަދި މިއަދު އެ ބޭފުޅުން ސަރުކާރާއި ދެކޮޅަށް ވާހަކަ ދައްކަމުންދާ އެންމެ ބޮޑު ސަބަބަކީ ރާއްޖެއަށް ގެއްލުންދިނުމަށް ރޭވި ޕްލޭން ކާމިޔާބުނުވުމުންކަމަށްވެސް ސައީދު ވިދާޅުވިއެވެ.
"އޭރުގެ ފޮރިންގ މިނިސްޓަރާއި އޭރުގެ ރައީސުލްޖުމްހޫރިއްޔާއާ ހިސާބު ޖައްސަވާފަ އޮތީ ރާއްޖެ ބަނގުރޫޓު ކޮށްލަން ވަކި ދުވަސްވަރެއްގައި ވެރިކަން ނުލިބިއްޖެއްޔާ. ދެން ބަނގުރޫޓު ނުވީމަ އެކަމާ ކޯފާ ވެގެން އެކަމާއި ރުޅިއައިސްގެން ރެޖިސްޓަރ ނުކުރާ ނޫސްތަކާއި، ފާޑުފާޑުގެ ހޮޅީގައި ރާއްޖޭގެ ތަސައްވަރު ގޯސްކުރަން ވާހަކަ ދެއްކީމަ އަޅުގަނޑު ހިތަށް އަރާ ސަމުގާގެ ކަށި ކޮންކޮޅަކަށްބާއޭ ދެން އެނބުރޭނީ" ސައީދު ވިދާޅުވިއެވެ.
ސައީދު ވިދާޅުވީ އެމްޑީޕީއަކީ އަބަދުވެސް ރާއްޖޭގެ އިޤުތިޞާދު ފުނޑުފުނޑުކޮށްލުމަށްޓަކައި ރޭވިގެން ކަންތައްތަކެއް ކުރާ ބައެއްކަމަށެވެ. އެގޮތުން ކޮންމެ ފަހަރަކުވެސް ވެރިކަން ލިބުމުން ގައުމު ނާމާންކަމެއްގެ ތެރެއަށް ވައްޓާލައި، ހަރުމުދާ ވިއްކުން ފަދަ ކަންކަން ކުރިއަށްގެންދާކަމަށެވެ. އަދި އެ މަސައްކަތް އެގޮތަށް ކުރިއަށްގެންދިއުމުން ކުރީ ސަރުކާރުގެ ވެރިކަން ނިމުނުއިރު ޤައުމުގެ އިޤްތިޞާދު އޮތީ ނުރައްކާތެރި އަނދަވަޅެއްގައިކަމަށްވެސް ސަޢީދު ވިދާޅުިއެވެ. ނަމަވެސް އެ ހާލަތުން އަރައިގަތުމަށް މިއަދު މަސައްކަތްކުރަމުންދާއިރު، އޭގެ ނަތީޖާވެސް ފެންނަމުންދާކަމަށް ސައީދު ވިދާޅުވިއެވެ.
އަދި ރާއްޖެ މިއަދު ކުރިއަށްދަނީ ތަރައްގީގެ މަގުންކަމަށާއި، އެ މަގުން ދުރަށްގެންދާނެ ބަޔަކަށް ދިވެހި ރައްޔިތުން ދެން ވެރިކަމެއް ހަވާލެއް ނުކުރާނެކަމަށްވެސް ސައީދު ވިދާޅުވިއެވެ.