ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ދެކަނބަލުން ވެރިކަމުގެ ފުރަތަމަ ތިން މަސް ދުވަހު މ. ދިމްޔާތުގައި ދިރިއުޅުއްވި މުއްދަތުގައި ހަރަދުކުރެއްވީ ދައުލަތުގެ ފައިސާއިން ނޫން ކަމަށް ރައީސް ވިދާޅުވެއްޖެ އެވެ.
ރައީސް ޑރ. މުއިއްޒު ވެރިކަމާ ހަވާލުވެވަޑައިގެންނެވި އިރު، މުލިއާގެ ވަރަށް ބޮޑަށް މަރާމާތުކުރަން ޖެހިފައި ހުރުމުން ރައީސްގެ ދެކަނބަލުން ވެރިކަމުގެ ފުރަތަމަ ތިން މަސް ދުވަހު ދިރިއުޅުއްވަމުން އައީ އެ މަނިކުފާނުގެ އަމިއްލަ ގެކޮޅު، ދިމްޔާތުގަ އެވެ. ރައީސް މުއިއްޒުގެ ދެކަނބަލުން މުލީއާގެ އަށް ބަދަލުވެވަޑައިގަތީ މި މަހުގެ ކުރީކޮޅު އެވެ.
ރައީސް ޑރ. މުއިއްޒު ދިމްޔާތުގައި ދިރިއުޅުއްވި ދުވަސްވަރު އެގޭގެ އެކިއެކި ހަރަދުތަކަށް 30 މިލިއަން ރުފިޔާ ދައުލަތުން ހަރަދުކޮށްފައިވާ ކަމަށް މިފަހުން ވަނީ ވަރަށް ގަދަ އަށް އަޑު ފެތުރިފައެވެ. އެވާހަކަަތައް ރައީސް ވަނީ ދޮގުކުރައްވައިފައެވެ.
ރައީސްގެ ޖަވާބު ސެގްމެންޓުގެ ދަށުން ށ. ފުނަދޫ، އާމިނަތު ނަޖްމާ، ރައީސްގެ ދެކަނބަލުންގެ ފަރިއްކޮޅަށާއި، އަމިއްލަފުޅު ގޭގެ ހަރަދުތަކަށް ދައުލަތުން އެތައް މިލިއަން ރުފިޔާ ހޭދަކޮށްފައިވާ ކަމަށް ބުނެ ފަތުރަމުންދާ ވާހަކައިގެ ހަގީގަތާމެދު ދެންނެވި ސުވާލަކަށް ޖަވާބު ދެއްވަމުން ރައީސް މުއިއްޒު ވިދާޅުވީ އެއީ ކަނޑައެޅިގެން ހަގީގަތާ ހިލާފު ވާހަކަތަކެއް ކަމަށެވެ. ރައީސް ވިދާޅުވީ ދިމްޔާތުގައި ހޭދަކުރެއްވި ދުވަސްވަރު ހުރިހާ ހަރަދެއް ބެލެހެއްޓެވީ އަމިއްލަފުޅަށް ކަމަށާއި ދައުލަތުގެ އެއްވެސް ފައިސާއެއްގައި ޖެހިފައިނުވާނެ ކަމަށެވެ.
” މިހާރު އަޅުގަނޑަށް ފެންނަނީ ހަގީގަތާ ހިލާފު ވާހަކަތައް ފަތުރަމުންދާތަން. އެއީ ކަނޑައެޅިގެން ދޮގު ވާހަކަތަކެއް. އަޅުގަނޑުގެ ގޭގެ ހަރަދުތައް ކުރީ އަމިއްލަ އަށް. ސެކިއުރިޓީ އާއި ކެއުމުގެ ހުރިހާ ހަރަދެއްވެސް ކުރީ އަމިއްލަ އަށް. ދައުލަތުގެ އެއްވެސް ފައިސާއެއްގައި ނުޖެހެން. ހަގީގަތުގައި މިކަންތައް އޮންނަނީ ދައުލަތުން ހަރަދުކުރާ ގޮތަށް. އަޅުގަނޑު ވަރަށް ބޭނުންވި އެއްވެސް ކަމެއްގަ ދައުލަތުން އެއްވެސް ހަރަދެއް ނުކުރުމަށް. އެއީ ދުވަހަކުވެސް މީހަކު ތިކަހަލަ ވާހަކައެއް ދެއްކުމުގެ ފުރުސަތު ނުދޭން ވެގެން، ” ރައީސް ވިދާޅުވިއެވެ.
ރައީސް އިތުރަށް ވިދާޅުވީ މުލިއާގޭގެ ބަޖެޓަށް ވެސް އިންނަނީ އަހަރަކަށް 7 ލައްކަ ރުފިޔާ ކަމަށާއި 100 ދުވަސް ތެރޭ 30 މިލިއަން ހަރަދުވި ކަމަށް ފެތުރެމުން އަންނަ ވާހަކަ އަކީ ބުއްދި ގަބޫލުކުރެވޭ ވާހަކަތަކެއް ނޫން ކަމަށެވެ. ރައީސް ވިދާޅުވީ ސަރުކާރުން ކަންކަން ކުރަމުންދަނީ ދެފުށް ފެންނަ ގޮތަށް ކަމަށާއި އެކަންކަން އިދިކޮޅަށް ހަޖަމު ނުކުރެވި ދޮގު ވާހަކަ ފެތުރުމަކީ އިދިކޮޅުން މިހާރު ގެންގުޅެމުން އަންނަ އުކުޅު ކަމަށެވެ.
ސަރުކާރުން ކުރިން ބުނި ގޮތުގައި، މުލިއާގެ މަރާމާތު ކުރަން ޖެހުނީ އެއީ ގިނަ ދުވަސްވެފައި ހުރި ޒަމާންވީ އިމާރާތަކަށް ވުމުން ކޮންމެހެން ކުރަން ޖެހޭ މަރާމާތުތަކެއް ހުރުމުންނެވެ. އެ މަރާމާތުތައް ކޮށްފައިވަނީ އެ ތަނުގެ އަސްލު ސަލާމަތް ކުރުމަށް ކަމަށާއި މުލިއާގެ މަރާމާތުކުރުމުގައި އެ ތާރީހީ ބިނާގެ އަސްލު ގެއްލޭނެ ވަރުގެ އެއްވެސް ބަދަލެއް ނުގެންނާނެ ކަމަށް ސަރުކާރުން ވަނީ ވިދާޅުވެފައެވެ.