ރަހިމު ކުއްޔަށް ދެވޭތަ؟

މިމުއާމަލާތާއި ބެހޭގޮތުން މީގެ ކުރީގައި މާބޮޑަށް ވާހަކަދެވިފައި ނުވިނަމަވެސް އަދުގެ ސައިންސް ކުރިއަރައިގޮސް މިފަދަ ހިދުމަތްދޭ ހަސްފަތާލުތަށް ގިނަވެ، މިފަދަ ހަސްފަތާލުތަކުން މުސްލިމުންވެސް ހިދުމަތްހޯދަން ފެށުމުގެ ނަތީޖާއެއްގެ ގޮތުން މިކަމާއި ބެހޭގޮތުން ވާހަކަ ދެއްކުމަށް އިސްލާމީ ދަންނަ ބޭކަލުންނަށް މަޖުބޫރުވެގެން ދިޔައެވެ.

އިސްލާމީ ދަންނަބޭކަލުން ފަތުވާ ދެއްވާ ގޮތުގައި ރަހިމްކުއްޔަށްދިނުމަކީ އެއްވެސް ޝައްކެއްނެތް ގޮތުގައި ހަރާމް ކަމެކެވެ. އެބޭފުޅުން ދަލީތައްވެސް ދައްކައެވެ. އެގޮތުން:  وَالَّذِينَهُمْلِفُرُ‌وجِهِمْحَافِظُونَ ﴿سورة المؤمنون 5﴾ މާނައީ: އެއުރެންނީ އެއުރެންގެ ފަރުޖުތައް ރައްކާތެރިކުރާމީހުންނެވެ. އަދި  إِلَّاعَلَىٰأَزْوَاجِهِمْأَوْمَامَلَكَتْأَيْمَانُهُمْفَإِنَّهُمْغَيْرُ‌مَلُومِينَ ﴿سورة المؤمنون 6﴾، މާނައީ: އެއުރެންގެ އަނބިންގެ މައްޗަށާއި، އެއުރެންނަށް މިލްކުވެގެންވާ އަޅުންގެ މައްޗަށް މެނުއީއެވެ. ފަހެ، ހަމަކަށަވަރުން ، އެއުރެންނީ (އެކަމުގައި) މަލާމާތް ލިބިގެންނުވާ މީހުންނެވެ.

މިއާޔަތުން އެގިގެންދަނީ ތިމާގެ ހަލާލް އަނބިމީހާއާއި އަންހެން އަޅުން މެނުއީ އެހެން ފަރާތަކާއި އެކު ހަލްވަތު ވުމަކީ އިސްލާމް ދީންހުއްދަ ކުރާކަމެއް ނޫންކަމެވެ. އަދި ﷲ ތައާލާ ވަނީ މުއުމިން ފިރިހެނުންނަށް އެބައިމީހުންގެ ދަރިފަސްކޮޅާއި ނަސަބު ރައްކާތެރިކުރުމަށް އަންގަވާފައެވެ. އެހެންކަމުން ކުލީރަހިމުގެ ސަބަބުން ނަސަބު އޮޅިގެންދާނެކަން އެގެން އޮންނާތީ، މިކަމަކީ ހުއްދަވެގެންވާނެ ކަމެއްނޫންކަން އެގެއެވެ. އެހެނީ މިމުއާމަލާތުގެ ނަތީޖާ ކަމުގައިވާ ދަރީގެ ބައްޕަ އަކީ ކޮބައިކަމާއި ހަގީގީ މަންމައަކީ ކޮބައިކަންވަނީ އޮޅުން ގަޑެއްގެ ތެރޭގައެވެ. ދަރި ނިސްބަތްވަނީ އަނބި މީހާއަށް ކަމެއް ރަހިމް ކުއްޔަށްދިން މީހާއަށް ކަމެއް އޮޅުންނުފިލާތީއެވެ. މީގެ ތެރެއިން ކޮންމެވެސް އެއް މަންމަ އަކަށް ނިސްބަތް ކުރި ކަމުގައި ވިޔަސް ހަގީގަތުގައި މިމުއާމަލާތުގެ ސަބަބުން ވަހުމް ތަކެއް އުފެދިގެން ދެއެވެ.

ފިރިހެނާގެ މަނި ނެގު މަށާއި އަންހެނާގެ ބިސް ނަގައި އަދި އެބިހާއި މަނި އެއްކުރުމަށްފަހު ރަހިމް ކުއްޔަށްދޭ އަންހެނާގެ ރަހިމުގައި އިންދުމަށް ޟަރޫރަތަކާއި ނުލައި އައުރަ ކަޝްފުކުރަންޖެހެއެވެ. މިއީ ކަނޑައެޅިގެން އިސްލާމް ދީނުގައި ހަރާމް ކުރައްވާފައިވާ ކަމެކެވެ. قُللِّلْمُؤْمِنِينَيَغُضُّوامِنْأَبْصَارِ‌هِمْوَيَحْفَظُوافُرُ‌وجَهُمْ ذَٰلِكَأَزْكَىٰلَهُمْ ۗإِنَّاللَّـهَخَبِيرٌ‌بِمَايَصْنَعُونَ ﴿سورة النور 30﴾

މާނައީ: “މުއުމިނު ފިރިހެނުންނަށް އެއުރެންގެ ބެލުން ތިރިކުރުމަށާއި، އެއުރެންގެ ފަރުޖުތައް ރައްކާތެރިކުރުމަށް ކަލޭގެފާނު ވިދާޅުވާށެވެ! އެ ގޮތް އެއުރެންނަށްޓަކައި، ތާހިރުކަންބޮޑެވެ. ހަމަކަށަވަރުން ﷲ އީ އެއުރެން ކުރާ ކަންތައް މޮޅަށް ދެނެވޮޑިގެންވާ ރަސްކަލާންގެ” އެވެ.

އިސްލާމް ދީނުގައި މިފަދައިން އަންގަވާފައި ވަނިކޮށް އެއުރެންގެ އައުރަ ކަޝްފުކޮށް ރަހިމް ކުއްޔަށް ދީ ހެދުމަކީ ކަޑައެޅިގެން ހަރާމް ކަމެކެވެ. އަދި މިފަދަ ކަންކަމަކީ ބޮޑުވެގެންވާ ކާރިސާއެއްކަމަށް، ޝޭޚް އަބްދުﷲ އިބްނު އަބްދުއްރަހުމާން އަލް ޖިބްރީން ސިފަކުރައްވާފައި ވެއެވެ.

މިމައުޟޫއަކީ ވަރަށްވެސް ފުޅާމައުޟޫއެކެވެ. އަޅުގަނޑު މަސައްކަތްކޮށްފައިވަނީ ވީހާވެސް ކުރުކޮށް މައްސަލާގެ ހުކުމާއި ހަމައަށް ވާސިލުވުމަށެވެ.

މިމައްސަލާގައި އޯއައިސީގެ ފިޤުހް އެކަޑަމީން ޤަރާރެއް ފާސްކޮށްފައިވާކަން އެގެންނެތެވެ. އެހެން ނަމަވެސް މެލޭޝިއާގެ ފިޤްޙް އެކަޑަމީން ޤަރާރެއް ފާސްކޮށްފައިވެއެވެ. އެނިންމުމުގައިވަނީ ނަސަބް ސާބިތުކުރުމުގައި ޝުބުހަ އޮވެގެންނުވާނެތީ، ހާރިޖީގޮތެއްގައި ދަރިމައިކޮށްގެން ލިބޭދަރިންގެ ނަސަބާއިމެދު ސުވާލުއުފެދޭތީ، ރަހިމް ކުއްޔަށްދިނުމަކީ ހުއްދަވެގެންވާ ކަމެއްނޫންކަމަށެވެ.