މެހެމާން – ޑީޖޭ ހަމްބެ؛ އުއްމީދަކީ، ޓިކްޓޮކްގައި ބައިނަލްއަގުވާމީ ފެންވަރުގައި ދިވެހިން ރާއްޖެ ތަމްސީލު ކުރާތަން ފެނުން!

• ހަމްބެގެ އުއްމީދަކީ ދިވެހި ޑިސްކް ޖޮކީންނަށް ފުރުސަތުތައް ގިނަވުން

• ސަރުކާރުން ޑީޖޭއިންނަށް އަދި ޓިކްޓޮކް އާމެދުވެސް ވިސްނާލާ ރަނގަޅު މަގެއް ފަހިކޮށްދިނުން

ޓިކްޓޮކަކީ މިފަހަކަށް އައިސް ދިވެހިންގެ ތެރޭގައި އެންމެ މަގުބޫލުވަމުން އަންނަ އަދި އެތައް ބައެއްގެ ހިތްހަމަޖެހުމާއި މުނިފޫހިފިލުވައިދިނުމުގެ އެންމެ ގާތް ސޯޝަލްމީޑިޔާ އެކުވެރިޔާއަށް ވަނީ ވެފައެވެ. ކޮންމެ ތަނެއްގައިވެސް، ކޮންމެ ކޮމިއުނިޓީއެއްގައިވެސް ތަފާތު މިޒާޖުގެ ތަފާތު ކަހަލަ ފަރާތްތައް އުޅޭ ގޮތަށް ޓިކްޓޮކްގައިވެސް އެކި މިޒާޖުގެ އެކި ކަަހަލަ މީހުން އުޅޭކަން އެއީ ހަގީގަތެކެވެ. އެހެންނަމަވެސް އޭގެ ބޭނުން އެންމެ ފުރިހަމަ ގޮތުގައި، މުހިންމު މާނައެއްގައި ބޭނުން ކުރާ ދިވެހިންވެސް މިއަދު މަދެއް ނޫނެވެ. ދުނިޔޭގެ އެހެން ހިސާބުތަކުގައި ޓިކްޓޮކަކީ ފައިސާ ހޯދޭ ޕްލެޓްފޯމެއް ނަމަވެސް ދިވެިރާއްޖޭގައި އުޅޭ ފަރާތްތަކަށް މިއީ އެއްވެސް ހާލެއްގައި އަދި ލިބެން އޮތް ފުރުސަތެއް ނޫނެވެ. މިއީ ޓިކްޓޮކް އޭގެ ބޭނުން ރަނގަޅު ގޮތުގައި ހިފަމުން އަންނަ ގިނަ ފަރާތްތަކުގެ އެެންމެ ބޮޑު ކަންބޮޑުވުމެވެ.

އެހެންކަމަށްވުމާއެކު، ހުވަދޫނޫހުން މިރޯދަ މަހަށްހާއްސަކޮށްގެން ގެންނަ މެހެމާނުންގެ ތެރެއިންވެސް ޓިކްޓޮކް ފަންނާނުންނަށް ހާއްސައިސްކަމެއް ދިނީމެވެ. އެގޮތުން ދެވަނަ މެހެމާނަކީ ކުރިން ދެންނެވި ފަދައިން އޭނާގެ ޕްރޮފެޝަނުގެ އިތުރުން ދިރިއުޅުމަށް މާނަކުރެވޭ ގޮތަކަށް ޓިކްޓޮކްގެ ބޭނުން ހިފަމުން އަންނަ ފަރާތެކެވެ، ދިވެހިންގެ ލޯތްބާއި އިތުބާރު ހޯދާފައިވާ މަގުބޫލު ފަރާތެކެވެ. އޭނާގެ ފަހަތުގައި އޮތް ޓީމާއެކު ނުހަނު އުފާވެރި މާހައުލެއްގައި ޓިކްޓޮކް ގޭމް ކުޅުމުގައި ހާއްސަކޮށް ފާހަގަ ކޮށްލެވޭ ފަރާތެކެވެ. އާދެ، ނަން ބުނުމާއެކު އިތުރު އެއްވެސް ތައާރަފަކަށް ބޭނުން ނުވާނޭކަން ގައިމުވާ ފަރާތެކެވެ.

ދިވެހިންގެ ލޯތްބާއި އިތުބާރު ހޯދާފައިވާ މަގުބޫލު ފަރާތެކެވެ. އޭނާގެ ފަހަތުގައި އޮތް ޓީމާއެކު ނުހަނު އުފާވެރި މާހައުލެއްގައި ޓިކްޓޮކް ގޭމް ކުޅުމުގައި ހާއްސަކޮށް ފާހަގަ ކޮށްލެވޭ ފަރާތެކެވެ. އާދެ، ނަން ބުނުމާއެކު އިތުރު އެއްވެސް ތައާރަފަކަށް ބޭނުން ނުވާނޭކަން ގައިމުވާ ފަރާތެކެވެ.

މީގެ ދުވަސްކޮޅެއް ކުރިން އިންޑިޔާ އާއި ރާއްޖެ ހޫނުމަސްރަހަކަށް ދިޔަ ދަނޑިވަޅުގައި އިންޑިޔާގެ ނުހަނު މަޝްހޫރު ފަންނާނެއްކަމަށްވާ "ރާކީސާވަންތު"އާއެކު މިިރޭގެ މެހްމާނު ވަނީ ވަރުގަދަ ހިފުމަކުން ގޭމެއް ކުޅެ ރާކީ ބަލިކޮށްލާފައެވެ، މިހާރު ދެން މިއީ ކާކުކަން އެނގިދާނެކަން ހަމަ ޔަގީނެވެ.

ތ ކަނޑޫދޫ އިރުދޭމާގޭ، އަލީ ހަމްދޫނު އެންމެންގެ ރައްޓެހި ނަމުންނަމަ "ޑީޖޭ ހަމްބެ" އަކީ މިހާރު ދިވެހިންގެ މެދުގައި ނުހަނު މަގުބޫލު ޓިކްޓޮކް ހޯސްޓެެކެވެ. އެއްވެސް ފަރުދާއެއް ނެތި ސިއްރުސިއްރު ނަމެއް ނެތި ސާފު ހިތަކާއި ހެވިފައިވާ މޫނަކާއެކު ފޭނުންނާ ބައްދަލުކުރަން އޭނާގެ ހާއްސަ ގޮނޑީގައި އިށީނދެ ގޮވާލުމާއެކު އޭނާގެ ޓީމް ޖަމާވެއެވެ. އަޅުގަނޑު އެންމެ ފުރަތަމަ މި ޕްރޮގްރާމަށް ދައުވަތު ދިނީ އެހާ ފަސޭހައިން ހަމްބެގެ ޖަވާބެއް ލިބޭނެ ކަމަށް ހީނުކުރަމެވެ. އެހެންނަމަވެސް ހަމްބެ މިވީ މާ ބޮޑަށްވެސް ހިތްތިރި އެންމެނާވެސް ގުޅޭ ފަރާތަކަށެވެ.

އަށް އަހަރު ކުރިން ދިރާގު ވަޒީފާގައި އުޅުނު ހަމްބެ އަމިއްލަ ދިރިއުޅުން ތަރައްގީ ކުރުމަށްޓަކައި އޭނާގެ ފުރަތަމަަ ފިޔަވަޅު ނެގީ 2016 ވަނަ އަހަރުގައެވެ. އޭރު އޭނާގެ އަތުގައި މިއަދު އެއިން ފަދަ ސިސްޓަމެއް ނެތެވެ. އެހެން މީހެއްގެ ސާމާނުތަކުން ފުރަތަމަ އަމިއްލަ ފައިމައްޗަށް ތެދުވުމަށްޓަކައި ޑީޖޭ ކުޅެން ފެށީއެވެ.

ހަމައެކަނި ޑީޖޭ އިން އާއިލާއެއް ބެލެހެއްޓޭ ވަރަށް އާމްދަނީ ނުލިބޭނެތީވެ، ހަމްބެ ދިޔައީ އެހެނިހެން ކަންކަން ވެސް ކުރަމުންނެވެ. އިންތިހާއަށް ލޯބިވާ އަންބަކާއި ކުޑަކުޑަ ލޯބި ދަރިފުޅެއްގެ ޒިންމާ އުފުލަމުންދާ ހަމްބެ އަކީ ވަރަށް ރައްޓެހި އެހާމެ ހިތްހެޔޮ މިޒާޖެއްގެ ވެެރިއެކެވެ. އެންމެ ފާހަގަ ކޮށްލެވޭ ކަމަކީ އަޒުމުގައި ހަރުދަނާ ވުމެވެ. ހިތުގައި އެކަމަކަށް ކަނޑަ އެޅުމަށްފަހު އެކަމެއް ހާސިލު ވަންދެން ހަމްބެ ހުއްޓާ ނުލައެވެ.

ޑީޖޭ ކުޅޭ އެތައް ޅަޒުވާން ކުރިން ތިބި ނަމަވެސް ރާއްޖޭގައި ހަމްބެމެން ފަދަ ޑިސްކް ޖޮކީންނަށް ނުވަތަ ޑީޖޭ އާޓިސްޓުންނަށް ފުރުސަތު ވަރަށް ހަނިވެފައި ދައްޗެވެ. އެހެންނަމަވެސް ރާއްޖެއިން ބޭރުގެ އެތައް ފަރާތަކަށް ރާއްޖެއިން ފުރުސަތު ދީފައިވާކަން ހިތާމައާއެކު ފާހަގަކުރަމެވެ. މިއީ ހަމްބެ ގެ އެންމެ ބޮޑު ކަންބޮޑުވުމެވެ،

"އެންމެ ބޮޑު ކޮންސަރން އެއީ، ރާއްޖޭގައި ދިވެހި ކުދިންނަށް ފުރުސަތު ނެތުން، ބޭރުން ގެންނަ ޑީޖޭ އިންނަށް އެ ފުރުސަތު ދީފައި ދިވެހިންނަށް ނުލިބޭ، އެހެންވާ ސަބަބަކީ، ބޭރުން ގެންނަ ޑީޖޭ އިން ވަރަށް ކުޑަކުޑަ އަގަކަށް މިކުޅެދެނީ، އެކަމަކު ދިވެހިންނަށް އެހާ ކުޑައަގަކަށް ކުޅެގެން ވާން ނުވެސް އޮންނާނެ. ދެން މިއީ ސަރުކާރުގެ އެއްވެސް ދައުރެއް އޮންނަ ކަމެއް ނޫން، ސަރުކާރުން ކުޑަވެސް އެހީއެއް ދޭ ބައެއް ނޫން. ހަމައެކަނި ޑީޖޭ ކަންތަކެއް ނޫން، ޓިކްޓޮކަކީވެސް އަސްލު އެއިން ލާރި ނެގޭނެ ގޮތެއް އޮންނަ ނަމަ އެތައް ކުދިންނަކަށް ފައިސާ ހޯދޭނެ މަންސައެއް،"

ހަމްބެގެ ކަންބޮޑުވުމަކީ ހަގީގަތުގައިވެސް އަލިއަޅުވާލަން ޖެހޭ ކަމެކެވެ. ޓިކްޓޮކް އިން ކުޅޭ ގޭމްތަކާއި އަދި އެހެނިހެން ގޮތްގޮތުންވެސް އެކަކު އަނެކަކަށް އެ ފޮނުވާ "ގިފްޓް" ހަދިޔާތަކަކީ ފައިސާއެވެ. އެކަމަކު އެއީ ބޭންކް އޮފް މޯލްޑިވްސް ނުވަތަ އިސްލާމިކް ބޭންކުގެ އެކައުންޓަކަށް ޖަމާވާ ފައިސާއަކަށް ނުވާތީ އެ ހުންނަނީ ހުރިގޮތަށް ނެގޭނެ ގޮތެއް ނުވެފައެވެ. "ޕެއިޕަލް" މެދުވެރިކޮށް ނެގެން ހުންނަ ފައިސާ ކަމަށް ވުމުން، އެއީ ރާއްޖެއިން ލިބެން ނެތް ހިދުމަތެއްކަމުން ޓިކްޓޮކުން ލިބޭ ފައިސާކޮޅު ޖެހެނީ އޭގައި ބަހައްޓާށެވެ.

"މިހާރު ވަރަށް ގިނަ ކުދިން ބޭނުން ކުރޭ ޓިކްޓޮކް، ގޭމު ކުޅުމާއި ކޮންޓެންޓް އުފައްދައި އިޝްތިހާރު ކުޅުމާއި މިހެން ގޮސް އެތައް ކަމެއް ކުރޭ، އެހެންވީމަ އަސްލު ސަރުކާރުން މިކަމަށް ކޮންމެވެސް ކަހަލަ އެހީއެއް ވާން ޖެހޭ ވަރަށް މިހާރު ޓިކްޓޮކް ކޮމިއުނިޓީ ބޮޑުވެއްޖެ،" ހަމްްބެ ހުވަދޫ ނޫހަަށް ހިއްސާ ކުރީ އޭނައަށް އެންމެ މުުހިންމު އެންމެ ހާއްސަ އެއް ވާހަކައެވެ.

ހަމްބެގެ އުއްމީދަކީ "ޓިކްޓޮކް" ދިވެހި ރާއްޖޭގެ ހަނިދާއިރާ ތެރެއިން ނުކުތުމެވެ. ބައިނަލްއަގުވާމީ ފެންވަރުގައި މެޗުތައް ކުޅެ ދިވެހިރާއްޖޭގެ ނަން، ދިވެހިންގެ ނަން ބައިނަލްއަގުވާމީ ފެންވަރުގައި ފެނިގެން ދިއުމެވެ.

"މިއީވެސް އަސްލު ސަރުކާރުން އެހީވާން ވެއްޖެ ކަމެއް، އޭރުން ކިތަންމެ ކުއްޖަކަށް އެހީ ވެވޭނެ،"

ހަމްބެ އަކީ އެއްވެސް ފަރުދާއެއް ނެތި މިފަދަ ކަންތަކާ ބެހޭ ގޮތުން އަނެކުން ހޭލުންތެރި ކުރުވާ މައުލޫމާތު ފޯރުކޮށްދީ ޓިކްޓޮކަށް މީހުންގެ މަގުބޫލުކަން އިތުރުވަމުންދިއުމަށް އެދި އަބަދުވެސް މަސައްކަތް ކުރަމުން އަންނަ ފަރާތެކެވެ. އަދި މިފަހަރު ހަމްބެ މި "އަލިއަޅުވާލާފައި ވަނީ" ނުހަނު މުހިންމު ކަމަކަށެވެ. އަޅުގަނޑުމެން ކޮންމެ މީހަކު ވިސްނާލިއަސް އަދު ޓިކްޓޮކް އަކީ އެތައް ބައެއްގެ ހިތްހަމަޖެހުމާއި އެތައް ވިޔަފާރިއެއްގެ ކުރިއެރުމުގެ އަސްލު، އަދި ރައްޓެހިކަމާއި ގާތް ގުޅުންތައް ބަދަހިވުމުގެ އެހީތެރިއެއް ގޮޮތަށް ހާމަވެގެންދާނެއެވެ. އަދި މިއީ ފައިސާ ނެގޭނަމަ އާމްދަނީ ހޯދުމަށްވެސް ބޭނުންކުރާނެ މަންސައެކެވެ،’

ހަމްބެގެ އުއްމީދު ފުރިހަމަކުރުމަށް އޭނާ އެދަނީ ކުރެވެން އޮތް ހުރިހާ ކަމެެއްހެން ކުރަމުންނެވެ. ހަމްބެ ބުނިގޮތުގައި އެންމެ ފުރަތަމަ ދުވަހުން ފެށިގެންވެސް އޭނާއާއެކުގައި އޮތް ޓީމަކީ އޭނާގެ ބާރެވެ، އެހީތެރިކަމެވެ. އޭނާގެ އެ ހާއްސަ ޓީމަކީ ކޮންމެ ކަމެއްގައިވެސް ހިޔާލު ހޯދާ މަޝްވަރާ ކުރާ ގާތްގަނޑަކަށް ތެދަށް ބުނާނަމަ އެއީ ހަމްބެގެ އާއިލާގެ ބައެކެވެ، ހަމްބެ އޭނާގެ މިޓީމަށް ފަށްފަށުން ޝުކުރު އަދާކުރިއެވެ. ހަމްބެގެ ކާމިޔާބާއި އޭނާގެ ހުވަފެންތައް ސީދާވުމުގެ އެންމެ މުހިންމު ރޯލު އަދާ ކުރާ ބައެއްގެ ގޮތުގައި ފާހަގަކޮށްފައިވަނީ އޭނާގެ ޓީމްގެ އިތުރުން ފޭނުންނާއި ވިވާސްއެވެ. ފޮލޯކުރާ ފަރާތްތަކާއި އޭނާއަށް ސަޕޯޓްކުރާ ފަރާތްތަކެވެ. މިހުރިހާ ފަރާތްތަކަށްވެސް ހަމްބެ ހިތުގެ އަޑިން ވީއެންމެ ފުރިހަމައަކަށް ޝުކުރުއަދާކުރެއެވެ.

"އާއިލާއަށް އަބަދުވެސް ޝުކުރު އަދާކުރަން، އެއީ އަބަދުވެސް ހަމްބެގެ ކޮންމެ ކާމިޔާބީއެއްގެ ފަހަތުގައި ތިބޭ މީހުން، ދެން ހަމްބެގެ ފޭނުންނާއި ފޮލޯވަރސް، ވިވާސް، އެސަޕޯޓާއި ލޯތްބާއި ނުލައި ހަމްބެ ހަމްބެ މިހުރި ހިސާބަކަށް ނައީސް، ހިތުގެ އަޑިން އެހުރިހާ ފަރާތްތަކަށް ވަރަށް ވަރަށް ބޮޑަށް ޝުކުރިއްޔާ، ދެން ހަމްބެގެ ޓީމް، ފެށުނީއްސުރެ ފުރަތަމަ ދުވަހުންފެށިގެން މިހާތަނަށް ވެސް ބަދަލެއް ނައި ޓީމެއް އެއީ، ޓީމް "ލަޔަންސް" އަށް ވަރަށްވެސް ހާއްސަ ފުރިހަމަ ޝުކުރެއް،" ހަމްބެ ޝުކުރުގެ ލިސްޓު ހާމަކުރަމުން ބުންޏެވެ.

ހަމްބެ މުސްތަގުބަލާމެދު ދެކޭ ހުވަފެނަކީ އަދި ކުރާ އުއްމީދަކީ ކޮބައިތޯ އަހާލުމުން ކުރިންވެސް ހާމަކުރި ގޮތަށް ދެންވެސް ހަމްބެ ބުނީ އޭނާގެ އެންމެ ބޮޑު އުއްމީދަކީ އަދި އެންމެ ބޮޑު ހުވަފެނަކީ ބައިނަލް އަގުވާމީ ފެންވަރުގައި ރާއްޖޭގެ ޓިކްޓޮކް ގޭމްތަކުން ތަމްސީލު ވެގެންދިއުމާއެކު، ރާއްޖޭގައި ތިބޭ ފަރާތްތަކަށް ޓިކްޓޮކުން އާމްދަނީ ހޯދޭނެ ފަދަ ގޮތެއް މެދުވެރިވުން ކަމަަށެވެ.

ހަމްބެ އެދޭ ފަދައިން ހުވަދޫ ނޫހުގެ ފަރާތުންވެސް އެދެނީ ޓިކްޓޮކަކީ ބައިނަލްއަގްވާމީ ފެންވަރުގައި މެޗުތައް ކުޅޭ ޕްލެޓްފޯމަކަށްވުމެވެ. އަދި މިއީ ފައިސާ ރާއްޖެއިން ލިބޭނެ އެކައުންޓެއް ހަމަޖެހިގެން ދިއުމެވެ. ހުވަދޫނޫހުގެ ޓީމާއި އަޅުގަނޑުގެ އަމިއްލަ ނަމުގައި، ވަރަށް ބުރަކޮށް އުޅެމުންވެސް އިންޓަވިއުއަށް ގޮވާލުމުން ހަމްބެ ދިން ފުރުސަތަށް ފަށްފަށުން ޝުކުރުއަދާކުރަމެވެ. އަޅުގަނޑުމެން އެންމެންވެސް އެދެނީ، ޑީޖޭގައިވެސް އަދި ޓިކްޓޮކްގެ ގޭމްކުޅުމާއި އެހެނިހެން ކަންކަމުގައިވެސް ހަމްބެއަށް އަދަށްވުރެ ފަހި މާދަމާއެއް ދެއްވައި ކާމިޔާބީ ދެއްވުމެވެ،

ޝުކުރިއްޔާ!

https://www.tiktok.com/@shaf