22 މާރިޗު 2024ވަނަ ދުވަހަށް ތާވަލުކުރެވިފައިވާ ބެޑްމިންޓަން އެސޯސިއޭޝަނުގެ އަހަރީ ޢާންމު ޖަލްސާގެ ކަންކަން ކުރިއަށް ގެންދާނެ އެކަށިގެންވާ މާޙައުލެއް އޮތްކަމަށް އެ އެސޯސިއޭޝަނަށް ނުފެންނާތީވެ، އަހަރީ އާންމު ޖަލްސާ ފަސްކުރެވިފައިވާ ކަމަށް އެ އެސޯސިއޭޝަންއިން ބުނެފިއެވެ.
އެ އެސޯސިއޭޝަންގެ އަހަރީ އާންމު ޖަލްސާ ފަސްކޮށްފައިވާއިރު، ކޮޕަރްޝަންގެ ތުހުމަތުތަކެއް ކުރެވިގެން ލިޔެކިޔުންތަކާއި މައުލޫމާތު ހޯދަން އޭސީސީ އިން ވަނީ މިމަހުގެ 19 ވަނަ ދުވަހު ބެޑްމިންޓަން އެސޯސިއޭޝަނަށް ވަދެފައެވެ.
އޭސީސީން މިއަދު ބުނީ، ބެންމިންޓަން އެސޯސިއޭޝަނަށް ރައްދުވާ ގޮތަށް ކޮރަޕްޝަނާ ގުޅުން ހުރި ގިނަ ތުހުމަތުތަކެއް ކޮށް އެ ކޮމިޝަނަށް މައްސަލަ ހުށަހަޅާފައި ވާ ކަމަށެވެ.
ކޮރަޕްޝަނާ ގުޅުން ހުރި ކޮން ބާވަތެއްގެ މައްސަލައެއް ކަމެއް ހާމަ ކޮށްފައެއް ނުވެއެވެ. އަދި މައްސަލަ ރައްދުވާ ވަކި ފަރާތެއް ވެސް ހާމައެއް ނުކުރެއެވެ.
އޭސީސީން ބެޑްމިންޓަން އެސޯސިއޭޝަނަށް ވަން އިރު އެތާނގެ އެކްސްކޯގެ އިންތިހާބާ ގުޅޭ ގިނަ ޝަކުވާތަކެއް އާންމު އެކިފަރާތްތަކުން ކުރަމުން ދެއެވެ.
ބައެއް ފަރާތްތަކުން މައުލޫމާތު ދީފައިވާ ގޮތުގައި މިހާރު އެ އެސޯސިއޭޝަންގެ ރައީސަކަށް ހުންނެވި މޫސާ ނާޝިދު (މޫސަ)، ގެންދަވަނީ އަމިއްލަ އަމިއްލަ އަށް އިންތިހާބު ބޭއްވުމަށް މަސައްކަތް ކުރަމުންނެވެ. އަދި ވަކިވަކި ފަރާތްތަކުގެ ތާއީދު ހޯދައިގެން އިންތިހާބު އައްޑޫގައި ބާއްވަންވެސް އޭނާ ގެންދަވަނީ މަސައްކަތް ކުރައްވަމުންނެވެ.
އެ އެސޯސިއޭޝަނަށް އެއްޗެހި ގަތުމުގައި އޭނާގެ މަސްލަހަތު އޮންނަ ވިޔަފާރިތަކުން ތަކެތި ގަތުންފަދަ ގިނަ މައްސަލަތަކަކާއެކު އޭނާގެ މައްޗަށް ކޮރަޕްޝަންގެ ތުހުމަތުވެސް ބައެއް ފަރާތްތަކުން ވަނީ ކޮށްފައެވެ.
އޭސީސީން އެ އެސޯސިއޭޝަނަށް ވަން އިރު، އިންތިހާބާ ގުޅިގެން ސްޕޯޓްސް ކޮމިޝަނަރު މުހައްމަދު ތޮލާލް ވެސް ވަނީ ވާހަކަ ދައްކަވާފައެވެ. އޭނާ ވިދާޅުވެފައި ވަނީ ހުރި މައްސަލަތައް ހައްލު ނުކޮށް ބާއްވާ އިންތިހާބެއް ބަލައި ނުގަންނާނެ ކަމަށެވެ.
ބެންމިންޓަން އެސޯސިއޭޝަނުން މަސައްކަތް ކުރަމުން ދިޔައީ އިންތިހާބު މިމަހުގެ 22 ގައި ބޭއްވުމަށެވެ.