މިހަފުތާގެ އާދީއްތަ ދުވަހު، މާރިޗް 24 ވަނަ ދުވަހަކީ މޯލްޑިވްސް އިމިގްރޭޝަންގެ ފަހުރުވެރި 74 (ސައުރަހަތްތަރި ވަނަ) އަހަރީ ދުވަހެވެ. މި ޒަމާންވީ ހިދުމަތް ދެމުން އަންނަތާ ވޭތިވެގެންގޮސްފައިވާ މުއްދަތުގެ ތެރޭގައި އެތަކެއް ތަފާތު ދަތިތަކާއި އުނދަގޫތައް ކުރިމަތިވެފައިވާނެކަމީ އެއްވެސް ޝައްކެއް އޮތް ކަމެއް ނޫނެވެެ. ފެންނަ ކާމިޔާބީ އާއި މަސައްކަތްތަކުގެ ހަވާސާއާއި ސުރުހީ އަކީ އެތަކެއް ގިނަގުނަ ގޮންޖެހުންތަކާއި އަޑިއުސްތަކެއްގެ ނިމުންތައް ކަން ގައިމެވެ.
މޯލްޑިވްސް އިމިގްރޭޝަންގެ މި ސައުރަހަތްތަރި ވަނަ އަހަރީ ދުވަހުގައި ކޮންޓްރޯލަރ ޖެނެރަލް އޮފް އިމިގްރޭޝަން، މުހައްމަދު ޝަމްޢާން ވަހީދު ވަނީ އިންތިހާއަށް ބޮޑު ޔަގީންކަމަކާއި އުއްމީދީ އިތުބާރުތަކެއް ދެއްވާފައެވެ. އަހަރީ ދުވަހުގައި ޝަމްއާން ދެއްކެވި ވާހަކަފުޅުގައި އެމަނިކުފާނު ޔަގީންކަމަކާއި އުއްމީދުުތަކެއް ދެއްވީ މިހާތަނަށް ކުރައްވާފައި ތަޖުރިބާއާއި ގެނެސްދެއްވިފައި ހުރި ގިނަ ހެޔޮ ބަދަލުތަކަށް އަލިއަޅުވައިލައްވަމުންނެވެ.
ޝަމްއާން ވަނީ އެއްވެސް ފަރުދާއެއް ނެތި ނުހަނު ސާފުސީދާކަމާއެކު އެމަނިކުފާނު ކޮންޓްރޯލް ޖެނެރަލް އޮފް އިމިގްރޭޝަންގެ މަގާމާ ހަވާލުވިއިރު، ތަނުގައި އޮތް މާހައުލު ސިފަކޮށްދެއްވާފައެވެ.
އެގޮތުން ދެއްކެވި ވާހަކަފުޅުގައި ޝަމްއާން ވަނީ އެމަނިކުފާނު މަގާމާ ހަވާލުވެވަަޑައިގެންނެވި ވަގުތު ކުރިމަތިވެވަޑައިގެންނެވި އެންމެ ބޮޑު ގޮންޖެހުމަކީ، ޒަމާނުއްސުރެ އެއްބައިވަންތަކަމުގެ ލާމަސީލު ނަމޫނާއެއްގެ ގޮތުގައިި ބަލައިގަންނަ އިމިގްރޭޝަންގެ ތެރޭގައި އެކިއެކި ސަބަބުތަކާހުރެ ގުޅުންތައް ހީނަރުވެ ފަނޑުވެފައިވުން ކަމަށް ފާހަގަކުރައްވާފައެވެ.
ކޮންޓްރޯލަރ ޖެނެރަލް އޮފް އިމިގްރޭޝަން، މުހައްމަދު ޝަމްޢާން ވަހީދު
ކަންއެހެން އޮތުމާއެކު ވޭތުވެދިޔަ ހަތަރުމަސް ދުވަހުގެ ތެރޭގައި އެންމެ ފުރަތަމަވެސް އެންމެ ހާއްސަކަމެއް ދީގެން ޝަމްއާން މަސައްކަތްކުރެއްވެވީ މުވައްޒަފުންގެ މެދުގައި ގުޅުން ރަނގަޅުކޮށް، މުއައްސަސާގެ ތެރޭގައި އޮންނަންޖެހޭ އެއްބައިވަންތަކަން އަލުން ދިރުވައި އާލާކުރުމަށް ކަމަށް އެމަނިކުފާނު ވަނީ ހާމަކުރައްވާފައެވެ.
"އަޅުގަނޑު ދެކޭ ގޮތުގައި ރައްޔިތުންނަށް ފެންވަރު ރަނގަޅު ހިދުމަތެއް ދެވޭނީ އެންމެހާ މުވައްޒަފުން އެކަތިގަނޑެއްގެ ގޮތުގައި ތިބެ، އެއް ޖޯޝެއްގައި މަސައްކަތް ކޮށްގެން. މިކަމުގެ ފޮނި ނަތީޖާ މިވީ މަދު ދުވަސްކޮޅުތެރޭގައިވެސް ދަނީ ފެންނަމުން،" ކޮންޓްރޯލަރ ޖެނެރަލް އޮފް އިމިގްރޭޝަން، މުހައްމަދު ޝަމްޢާން ވަހީދު
ރައްޔިތުންނަށް ލުއި ފަސޭހަ އަވަސް ހިދުމަތްތަކެއް ލިބި، މުއައްސަސާގެ ހިދުމަތްތައް ފުޅާވެގެންދިއުމުގެ ސިއްރަކީ މުވައްޒަފުުންގެ އެއްބައިވަންތަކަން ކަމަށާއި އެކަމަށްޓަކައި އެއްވެސް ވަރުބަލިކަމެއްނެތި، ރެޔާދުުވާލު ކުރައްވަމުންދާ ބުރަ ހިދުމަތަށް އެންމެހާ މުވައްޒަފުންނަށް ޝަމްއާން ވަނީ ފަށްފަށުން ޝުކުރު ދަންނަވާފައެވެ.
ޝަމްއާން ވިދާޅުވި ގޮތުގައި، ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ވިސްނުންފުޅާ އެއްގޮތަށް ރައްޔިތުންނަށް ލުއިފަސޭހަ ހިދުމަތްތަކެެއް ފޯރުކޮށްދިނުމަށް، އެމަނިކުފާނު މަގާމާ ހަވާލުވެވަޑައިގެންނެވިފަހުން ވޭތިވެގެން މިދިޔަ މަދުދުވަސްކޮޅުތެރޭޭގައި ގިނަ މުހިންމު މަސައްކަތްތަކެއް ކުރެވިފައިވާނެއެވެ.
ކޮންޓްރޯލަރ ޖެނެރަލް އޮފް އިމިގްރޭޝަން، މުހައްމަދު ޝަމްޢާން ވަހީދު
އެގޮތުން ޝަމްއާން ފާހަގަކުރެއްވި ކަންތައްތަކުގެ ތެރޭގަައި، ދިވެހި ޕާސްޕޯޓާއި ރާއްޖެއިން ބޭރަށް ދަތުރުކުރުމުގައި ދިވެހިން ހޯއްދަވާ ހިދުމަތްތަކަށް ގެނެވިފައިވާ ލުއިފަސޭހަ ބަދަލުތައް ހިމެނެއެވެ. އަދި އަތޮޅުތަކުގެ އިމިގްރޭޝަން އޮފީސްތަކަށް ދެމުން ގެންދާ ދިވެހި ޕާސްޕޯޓުގެ ހިދުމަތްވެސް ދެގުނަ އަވަސްކުރެވިފައިވާނެ ކަމަށް ޝަމްއާން ފާހަގަކުރެއްވިއެވެ.
ހާއްސަގޮތެއްގައި ގަވާއިދާ ހިލާފަށް އުޅެމުންދާ ބިދޭސީންގެ މައްސަަލަ، ވީއެންމެ އަވަސް މުސްތަގުބަލެއްގައި ހައްލުކުރުމަކިީ ރައީސުލްޖުމްހޫރިއްޔާ ޑރ މުހައްމަދު މުއިއްޒު ހާއްސަ އަހައްމިއްޔަތުކަމެއް ދެއްވާ ކަމެއްކަން ފާހަގަކުރެއްވުމާއެކު ޝަމްއާން ވިދާޅުވީ ސަރުކާރުގެ ގުޅުން ހުރި ގިނަ މުވައްސަސާތަކާ ގުޅިގެން މިމައްސަލަ ހައްލުކުރުމަށް ގިނަގުނަ މަސައްކަތްތަކެއް ކުރެވެމުންދާ ކަމުގައެވެ.
އިމިގްރޭޝަނަށް 74 (ސައުރަހަތްތަރިި) އަހަރު ފުރި އަލިމަސް ޔޫބީލްގެ 75 (ފަންސަހަތްތަރި) ވަނައަހަރަށް ގުނަން ފަށާއިރު، މިއީ މުޅިން އައު ފެށުމަކަށް ވެގެންދާނެ ކަމަށް ޝަމްއާން ވަނީ ވިދާޅުވެފައެވެ.
ކޮންޓްރޯލަރ ޖެނެރަލް އޮފް އިމިގްރޭޝަން، މުހައްމަދު ޝަމްޢާން ވަހީދު
"އެއްބައިވަންތަކާއެކު ދެން ފެނިގެންދާނީ މާ އުފާވެރި ދުވަސްތަކެއް، މި އަހަރު ވެގެންދާނީ ސަރުކާރުގެ ގިނަ ޕްރޮޖެކްޓްތަކާއެކު މި މުވައްސަސާއިން ފޯރުކޮށްދޭ ހިދުމަތްތަކަށް ޒަމާނާ އެއްގޮތަށް ބޮޑެތި ލުއި ފަސޭހަބަދަލުތަކެއް އަންނާނެ އަހަރަކަށް، ކުރިއަށް މި އޮތްތަނުގައި މުވައްޒަފުންނާ ގުޅުން ހުރި ގިނަ ކަންތައްތަކަށް އިސްކަންދީގެން މުވައްޒަފުންގެ ކުރިއެރުމަށް މުހިންމު ގިނަ މަސައްކަތްތަކެއް ކުރެވިގެންދާނެކަމުގެ ޔަގީންކަން އަރުވަން!" ކޮންޓްރޯލަރ ޖެނެރަލް އޮފް އިމިގްރޭޝަން، މުހައްމަދު ޝަމްޢާން ވަހީދު
ޝަމްއާން އިތުބާރު ދެއްވީ އެއްބައިވަންތަކަމާއެކު ދެން ފެނިގެންދާނީ މާބޮޑަށްވެސް އުފާވެރި ދުވަސްތަކެއް ކަމުގެ ޔަގީންކަމެވެ. އަދި ޒަމާނާ އެއްގޮތަށް ބޮޑެތި ލުއި ފަސޭހަ ބަދަލުތަކެއް އަންނާނެ އަހަރަކަށް މިއަހަރު ވާނެ ކަމުގެ ޔަގީންކަމެވެ.
(ހުވަދޫނޫހުން އެދެނީ މިޔަގީންކަމާއި މި އިތުބާރަކީ ސީދާވެގެންދާނެ ޔަގީންކަމަކަށްވެ، މޯލްޑިވްސް އިމިގްރޭޝަނަށް ޝަމްއާންގެ ކޮންޓްރޯލަރ ޖެނެރަލްކަމުގެ ދަށުން އެވިދާޅުވިފަދަ އަލިއުޖާލާ އުފައުވެރި، އަދި ހަމައެހެންމެ ފާގަތި ފަހި މުސްތަގުބަލެއް އަބަދުވެސް ލިބިގެންދިއުމެވެ.)