ނަބިއްޔާ صَلَّى اللهُ عَلَيْهِ وَسَلَّم އަޅުގަނޑުމެންނަށް އަމުރުކުރައްވައި ޙަދީޘްކުރެއްވިއެވެ. “عُودُوا الْمَرِيضَ” މާނައީ: “ބަލި މީހުންނަށް ޒިޔާރަތްކުރާށެވެ!” (رواه البخاري) މި ޙަދީޘްފުޅުން އެނގެނީ ބަލިމީހުންނަށް ޒިޔާރަތްކުރާއިރު ޒިޔާރަތްކުރަންވީ ހަމައެކަނި ތިމާ ދަންނަ މީހަކު ބަލިވުމުން ނޫން ކަމެވެ. އިސްލާމީ އުންމަތަށް ނިސްބަތްވާ ކޮންމެ މީހަކު ބަލިވިޔަސް އޭނާއަށް ޒިޔާރަތްކުރުމީ އިންތިހާއަށް ސަވާބާއި އަޖުރު ލިބިގެންދާނޭ ކަމެކެވެ.
ނަބިއްޔާ صَلَّى اللهُ عَلَيْهِ وَسَلَّم ގެ އަންނަނިވި ހަދީޘްގެ މާނައަށް ބައްލަވާށެވެ. “ހަވީރުގެ ވަގުތުގައި މުސްލިމަކު ބަލިމީހަކަށް ޒިޔާރަތްކޮށްފި ނަމަ، ހެނދުނު ވަންދެން ހަތްދިހަ ހާސް މަލާއިކަތުން އޭނާގެ މައްޗަށް ޞަލަވާތް ކިޔުއްވާނެތެވެ. އަދި އޭނާއަށް ޓަކައި ޚަރީފު (އެބަހީ: އެއްކުރެވިފައިވާ މޭވާ) ސުވަރުގޭގައި ލެއްވިގެންވެއެވެ.” (رواه الترمذي) މިއީ އަޖުރުގެ ގޮތުން ވަރަށް ވެސް ހެޔޮކަން ބޮޑު ޢަމަލެކެވެ. އަދިވެސް އެކަލޭގެފާނުގެ ހަދީޘެއްގެ މާނައިގައި ވެއެވެ. “ﷲ ގެ ރުހިވޮޑިގަތުން ލިބިގަތުމަށް ޓަކައި ބަލިމީހަކަށް ނުވަތަ އޭނާގެ މުސްލިމް އަޚާއަށް ޒިޔާރަތްކޮށްފި މީހަކަށް، ނިދާ އިއްވެވޭ އަޑަކުން (އެބަހީ: މަލާއިކަތެއް) ގޮވައިލައްވާނެތެވެ. ތިބާއަށް ހެޔޮކަން ހުއްޓެވެ. އަދި ތިބާގެ ހިނގުމުގައި ހެޔޮކަން ހުއްޓެވެ. އަދި މަތިވެރިވެގެން ވާ މަޤާމެއް ސުވަރުގެއިން ތިބާއަށް ހުއްޓެވެ.” (رواه الترمذي)
ހަމައެހެންމެ އެއް ފަހަރެއްގައި އުއްމުލްޢަލާ ބަލިވެ އުޅުއްވަނިކޮށް އެ ކަމަނާގެ އަރިހަށް ނަބިއްޔާ صَلَّى اللهُ عَلَيْهِ وَسَلَّم ޒިޔާރަތްކުރެއްވިއެވެ. އަދި ހަދީޘްކުރެއްވިއެވެ. “أَبْشِرِي يَا أُمَّ الْعَلاَءِ فَإِنَّ مَرَضَ المُسْلِمِ يُذْهِبُ اللهُ بِهِ خَطَايَاهُ كَمَا تُذْهِبُ النَّارُ خَبَثَ الذَّهَبِ وَالفِّضَّةِ.” (رواه أبو داود) މާނައީ:” އޭ އުއްމުލްޢަލާއެވެ! އުފާކުރައްވާށެވެ! ފަހެ ހަމަކަށަވަރުން މުސްލިމަކު ބަލިވުމަކީ އޭނާގެ ފާފަތައް ފުހެވިގެންދާކަމެކެވެ. އެއީ އަލިފާނުން ރަނާއި ރިހީގެ ދަމިލަ ފިލުވޭ ފަދައިންނެވެ.” މީގެ އިތުރުން ވެސް އެކަލޭގެފާނު ހަދީޘްކުރެއްވިއެވެ. “لا تُصِيبُ المُؤْمِنَ شَوْكَةٌ فَمَا فَوْقَهَا، إِلَّا قَصَّ اللهُ بِهَا مِن خَطِيئَتِهِ.” (رواه مسلم) މާނައީ: “މުއުމިނު އަޅާގެ ފާފަ މާތް ﷲ ފުއްސަވައިދެއްވާނޭހެން މެނުވީ އޭނާގެ ފަޔަށް ކުޑަކުޑަ ކަށްޓެއްހައި މިންވަރު ވެސް ނުހެރެއެވެ.” ނަބިއްޔާ صَلَّى اللهُ عَلَيْهِ وَسَلَّم ބަލިމީހުންނަށް ޒިޔާރަތްކުރައްވައި އެ ބައިމީހުންނަށް ދުޢާކޮށްދެއްވައެވެ. އެއްފަހަރަކު، ސަޢްދު ބިން އަބީ ވައްޤާޞް رَضِيَ اللَّهُ عَنْهُ ބަލިމަޑުކަމެއްގައި އުޅުއްވަނިކޮށް ނަބިއްޔާ صَلَّى اللهُ عَلَيْهِ وَسَلَّم އެކަލޭގެފާނަށް ޒިޔާރަތް ކުރެއްވިއެވެ. އަދި ދުޢާކޮށްދެއްވިއެވެ. “اللَّهُمَّ اشْفِ سَعْدًا” މާނައީ: “ޔާ ﷲއެވެ! ސަޢުދަށް ޝިފާ ދެއްވާނދޭވެ!” (رواه مسلم). މި ގޮތަށް ތިން ފަހަރު އެކަލޭގެފާނު ދުޢާކުރެއްވިއެވެ.
އިސްލާމްދީނުގައި މި ވަނީ ބަލިމީހުންނަށް ޒިޔާރަތް ކުރުމަށް އެތައް އިރުޝާދެއް ދެއްވައިފައެވެ. މިއީ ނަބިއްޔާގެ ސުންނަތެކެވެ. އެހެން ނަމަވެސް، މި ގޮތަށް ޒިޔާރަތްކުރާ ކުރުމުގައި އެހާ ގިނައިރު މަޑުކުރުމީ އެދެވިގެންވާ ކަމެއް ނޫނެވެ. އަދި ޒިޔާރަތްކުރަނީ ހޮސްޕިޓަލުގައި އޮތް ބަލިމީހަކަށް ނަމަ، އެ ތަނުން ކަނޑައަޅައިފައިވާ ޤަވާޢިދުތަކަށް ވެސް ޙުރުމަތްތެރިކޮށް ހިތަން ވާނެއެވެ. އެންމެ އިސްކަމެއް ދޭންވީ، ބަލިމީހާއަށް ހިތްވަރުދިނުމާއި އޭނާއަށް ހިތްހަމަޖެހުން ގެނުވާނޭ ފަދަ ކަންކަން ކޮށްދިނުމަށެވެ. އުންމީދަކީ ދިވެހި މުޖުތަމަޢުން ވެސް އިޚްލާޞްތެރިކަމާ އެކު ސަވާބާއި ދަރުމައަށް އެދި، މި ސުންނަތް ދިރިގެން ދާތަން ފެނުމެވެ.
މައުލޫމާތު: مُحَمَّد سَمُوْح سَعِيْد / ދީނުގެމަގު