35 އަހަރުންމަތީގެ މީހުނާއި، ސުކޫލު ކުދިންނަށް މިއަދުން ފެށިގެން ސަރުކާރު ހޮސްޕިޓަލްތަކުން މެޑިކަލް ޗެކަޕް ހިލޭ އާސަނދައިގެ ދަށުން ހެއްދޭނެ ކަމަށް އާސަންދަ ކުންފުނިން ބުނެފިއެވެ.
މިއަދުން ފެށިގެން ސަރުކާރުގެ ހޮސްޕިޓަލްތަކުން ހިލޭ އާންމުރައްޔިތުންނަށް ދޭން ނިންމާފައިވާ މި ހިދުމަތަކީ ސަރުކާރުގެ ހަފްތާ 14 މަގު ޗާޓުގައި ހިމަނުއްވާފައިވާ ވަޢުދުގެ ތެރެއިން އެއް ވައުދެވެ. މިއީ ދިވެހި ކޮންމެ ރައްޔިތަކަށް އާސަންދަ ސްކީމްގެ ދަށުން އަހަރަކު 2 ފަހަރު މެޑިކަލް ޗެކަޕް ހެދުމުގެ މަގުފަހިކޮށްދިނުމަށް އެކުލަވާލާ ތަންފީޒުކުރަން ފަށާފައިވާ ޚާއްސަ ސިޔާސަތުގެ ދަށުން ނިނމާފައިވާ މުހިންމު ނިންމެއް ކަމަށް އާސަންދައިން ބުނެއެވެ.
އާސަންދައިން ބުނީ މި ސްކީމުގެ ދަށުން އުމުރުން 35 އަހަރުން މަތީގެ ފަރާތްތަކަށް މެޑިކަލް ޗެކަޕް ހެދުމަށް ބޭނުންވާ ޕެކޭޖް ތައާރަފު ކުރެވިފައިވާ ކަމަށާއި، މިއަދު ތައާރަފް ކުރެވުނު ޕެކޭޖާއިއެކު، ސްކޫލުތަކުގެ ދަރިވަރުންގެ ތެރެއިން (18 އަހަރުން ދަށުގެ އުމުރުފުރައަށް) ޚާއްޞަ ސްކޫލް ސްކްރީނިން ސަރުކާރުގެ ހޮސްޕިޓަލްތައް މެދުވެރިކޮށް ހެދޭނެ އިންތިޒާމް ހަމަޖައްސައިފައިވާ ކަމަށެވެ.
މެޑިކަލް ޗެކަޕް ހެދުމަށް ބޭނުންވާ ޕެކޭޖް ތަޢާރަފްކޮށް އަދި މީގެ އިތުރުން މިނިސްޓްރީ އޮފް އެޑިއުކޭޝަނުން ކަނޑައަޅާފައިވާ ގްރޭޑްތަކުގެ ސްކޫލް ދަރިވަރުން ހަދަން ޖެހޭ ޚާއްޞަ ޓެސްޓްތައްވެސް ސަރުކާރުގެ ހޮސްޕިޓަލްތައް މެދުވެރިކޮށް ހެދޭނެ އިންތިޒާމްވެސް އާސަންދަ ކުންފުނިން ހަމަޖައްސައިފައިވާ ކަމަށް އެކުންފުނިން ބުނެއެވެ.
މީގެ އިތުރުން އެކުންފުނިން ފާހަގަ ކޮށފައިވަނީ ޖަނަވަރީ 2024 ގައި ތަޢާރަފްކުރެވުނު މެޑިކަޕް ޗެކަޕް ޕެކޭޖް ތަންފީޒުކުރުމުގައި ދިމާވި ބައެއް ދަތިތަކަށް ރިޢާޔަތްކޮށް އުމުރުފުރާތަކާއި ޕެކޭޖް ތަކަށްވަނީ ބަދަލުގެނެވިފައި ކަމަށެވެ. އެގޮތުން 19 އަހަރުންމަތީގެ އުމުރު ފުރާތަކަށް ޚާއްޞަ ކުރެވިފައިވާ އަސާސީ ޕެކޭޖްތަކަށް ވަނީ ބަދަލުގެނެވިފައި ކަމަށްވެސް ބުނެއެވެ.
އޭޕްރީލުން 1 އިން ފެށިގެން އިތުރުކުރެވޭ އުމުރު ފުރާއަކީ 35 އަހަރުން މަތީގެ އުމުރުފުރައިގެ އިތުރުން 40 އަހަރުން މަތީގެ އުމުރު ފުރާތަކަށް ޚާއްޞަކޮށް ދުރާލާ ކެންސަރު ބަލި ދެނެގަތުމަށް ހަދަންޖެހޭ ޓެސްޓުތައް އެކުލެވޭ ޕެކޭޖް ކަމަށާއި، ކެންސަރު ސްކްރީނިންގެ ޓެސްޓުތަކުގެ ތެރެއިން ވަކި މުއްދަތެއްގެ ތެރޭގައި ކަނޑައަޅާފައިވާ ޓެސްޓުތައް ފިޔަވާ، އެހެން ޓެސްޓުތައް ސްކީމްގެ ތެރެއިން އަހަރަކު އެއްފަހަރު ހެއްދޭނެ ކަމަށެވެ.
ވަކި މުއްދަތެއްގެ ތެރޭގައި ހެދުމަށް ކަނޑައަޅާފައިވާ ޓެސްޓުތައްވެސް ޑޮކްޓަރު ލަފާދެއްވައިފިނަމަ، ސްކީމްގެ ތެރެއިން ހެދޭނޭ އިންތިޒާމް ހަމަޖެހިގެންދާނެ ކަމަށްވެސް އެ ކުންފުނިން ބުނެއެވެ.