ޒަކާތު ފަންޑުގެ ދަށުން ޣައްޒާގެ އަޚުންނާއި އުޚުތުންނަށް ކާބޯތަކެތީގެ އެހީތެރިކަން ފޯރުކޮށްދެެއްވުމުގެ މަސައްކަތް ކުރައްވަމަުން ގެންދަވާ ކަމަށް އިސްލާމިކް މިނިސްޓަރު ޑރ. ޝަހީމް އަލީ ސައީދު ވިދާޅުވެއްޖެއެވެ.
ޑރ. ޝަހީމް ވިދާޅުވީ، މި ނިންމުމަކީ ރައީސުލްޖުމުހޫރިއްޔާ ޑރ މުޙައްމަދު މުޢިއްޒުގެ އިރުޝާދުގެ ދަށުން ނިންމި ނިންމުމެއް ކަމަށެވެ.
ފަލަސްތީނުގެ ހަނގުރާމައަށް އަހަރެއްވާން ކައިރިވެފައިވާއިރު، ޤައްޒާގެ އެތައް މުސްލިމުންނެއް ވަނީ އިޒްރޭލުގެ ޔާހޫދީންގެ އަނިޔާވެރިކަމުގެ ސަބަބުން ޝަހީދުވެފައެވެ. އަދި އެތައް ކުޑަކުދިންނާއި އެތައް އަންހެނުން ހާލު ޖެހިފައިވާއިރު، މި ހަނގުރާމަ އަދި ވެސް ހުއްޓުމުގެ ކޮޅު މައްޗެއް ނުފެނެއެވެ. މި ހަނގުރާމަ ފެށުނީއްސުރެ ދިވެހިންދަނީ އެކި ގޮތްގޮތުން ފަލަސްތީނުގެ ރައްޔިތުނަށް އެހީތަކެއް ވަމުންނެވެ.
ރައްޔިތުންގެ މަޖިލީހުގެ ހާރިޖީ ގުޅުންތަކާ ބެހޭ ކޮމިޓީއަށް ވަޑައިގެން ފޮރިން މިނިސްޓަރު މޫސާ ޒަމީރު ވެސް ވިދާޅުވީ މަސްދަޅުތައް ފޮނުވުމުގެ މަސައްކަތް ކުރަމުންގެންދާ ކަމަށެވެ. ނަމަވެސް އެ މަސައްކަތަށްވެސް ވަރަށް ބޮޑު އުނދަގޫ އެބައޮތް ކަމަށެވެ.
އެގޮތުން ކާބޯތަކެތި ވައްދާ މަގު ނުވަތަ ބޯޑަރު ބަންދު ކޮށްފައިހުރުމުގެ ސަބަބުން ވެސް ވަނީ އުނދަގޫތަކަކާއި ކުރިމަތިލާން ޖެހިފަކަމަށް ވިދާޅުވިއެވެ. ޒަމީރު ވިދާޅުވީ މިސްރުގެ ސަރުކާރާ ވާހަކަ ދައްކައިގެން ފަލަސްތީނު ރައްޔިތުންނާ ހަމައަށް މަސްދަޅުތައް ފޯރުކޮށްދިނުމަށް މަސައްކަތްތައް މިހާރު ކުރަމުންދާ ކަމަށެވެ.
މި ހަނގުރާމަ ފަށާފައިވަނީ 2023 ވަނަ އަހަރު އޮކްޓޯމަބަރު މަހުގެ 7 ވަނަ ދުވަހުގައެެވެ. މި ހަނގުރާމައަށް މިހާރު މިވަނީ 6 މަސް ދުވަސްވެފައެވެ.