ހިފްލެޓް ލިސްޓުގައި ހިމެނި، ހިޔާ ފްލެޓް ނުލިބިދިޔަ ފަރާތްތަކަށް މި ސަރުކާރުން އެންމެ ފުރަތަމަ އަޅާ ފްލެޓްތަކުން ފްލެޓް ދޭނެ ކަމުގައި ރައީސް މުއިއްޒު ވިދާޅުވެއްޖެއެވެ.
ރައީސް މުއިއްޒު މިހެން ވިދާޅުވީ ރައީސް އޮފީހުން ކުރިޔަށް ގެންދާ "ރައީސްގެ ޖަވާބު" ސިލްސިލާގެ މިއަދުގެ ސެގްމަންޓުގައި މާލެ ސިޓީ، މމޚ ދަފްތަރު 12152، މުޙައްމަދު ސަލީމް، ހިޔާ ފުލެޓު އަތުލި މީހުންނަށް ފުލެޓު ދިނުމަށް ރައީސް މުއިއްޒު ވެވަޑައިގެންނެވި ވައުދުފުޅާ ގުޅޭގޮތުން ކުރި ސުވާލަށް ޖަވާބު ދެއްވަމުންނެވެ.
އެ ސުވާލަށް މިއަދު ޖަވާބުދެއްވަމުން ރައީސް ވިދާޅުވީ އެމަނިކުފާނު ވައުދުވެވަޑައިގެންނެވި ގޮތަށް އެ ވައުދު ފުއްދަވާނެ ކަމަށާއި މި ސަރުކާރުން އެންމެ ފުރަތަމަ ފަށާ ސޯޝަލް ހައުސިން އިމާރާތްކުރުމުގެ މަޝްރޫއުގެ ދަށުން އެޅޭ ފުލެޓުތަކުން އެމީހުންނަށް ފުލެޓު ހަމަޖައްސައިދޭނެ ކަމަށެވެ.
"ރައީސް ޔާމީންގެ ސަރުކާރު ނިމުނު އިރުގައި ދާއިމީ ލިސްޓުގައި ހިމެނުނު ފަރާތްތައް ރައީސް އިބްރާހިމް މުހައްމަދު ސޯލިހުގެ ސަރުކާރުން އޭގެ ތެރެއިން އެތައް ހާސް ބަޔަކު އެއްވެސް ކަހަލަ ހަމައެއް ނެތި އުނިކޮށްލާފައިވަނީ. އެހެންވީމާ އެ ފަރާތްތަކަށް އަޅުގަނޑު ފުލެޓުދޭނެ ކަމަށް އަޅުގަނޑު ވާނީ ވައުދުވެފައި. އެ ވައުދު ފުއްދާނަން ވީހާވެސް އަވަހަކަށް، އެންމެ އަވަހަށް އެޅޭ ފުލެޓުތަކުން. މިއަހަރު ތެރޭގައި އަޅުގަނޑުމެން އާ މަޝްރޫއުތައް ފަށާގޮތަށް މިވަނީ ނިންމާފައި. ހުޅުމާލެ އާއި ގުޅިފަޅު އަދި ގިރާވަރުފަޅުގައި ވެސް. އެހެންވީމާ މި މަޝްރޫއުތަކުގެ ތެރެއިން އިރާދަކުރެއްވިއްޔާ މައްސަލަ ހައްލުވާނެ،" އެމަނިކުފާނު ވިދާޅުވިއެވެ.