މި ރޯދަމަހު ރޯދަ ނުހިފައި ދުވާލު ކޭ މީހަކު 10 ދުވަހަށް ބަންދު ކޮށްފިއެވެ.
މިމައްސަލާގައި ބަންދު ކޮށްފައިވަނީ އުމުރުން 39 އަހަރު ފިރިހެނެކެވެ. އޭނާގެ ބަންދުގެ މުއްދަތު ޖަހަން ކޯޓަށް ގެންދިއުމުން އޭނާވަނީ ކުށަށް އިއުތިރާފް ވެފައެވެ.
ކޯޓުގެ ބަންދުގެ އަމުރުގައިވަނީ އޭނާ ބަންދު ކޮށްފައިވަނީ އިޖުރާތުތަކާ އެއްގޮތަށް ކަމަށާއި، އަދި އޭނާގެ އޭނާގެ މައްޗަށް ކުރެވޭ ތުހުމަތުތަކަށް އެކަށީގެންވާވަށް ހެއްކާއި ގަރީނާ ހުށަހަޅާފައިވާ ކަމަށެވެ.
ނަމަވެސް އޭނާ ރޯދަ ދޫކޮށްލާފައިވާ ގޮތުގެ ތަފްސީލު ބަންދު އަމުރުގައި ހިމަނާފައެއް ނުވެއެވެ. އަދި ހައްޔަރުކޮށްފައިވާ ގޮތާގުޅޭ މާ ގިނަ ތަފްސީލްތަކެއްވެސް ބަންދު އަމުރުގައި ނެތެވެ.
މިދިޔަ މަހުގެ 24 ވަނަ ދުވަހު ވެސް ވަނީ ރޯދަ ނުހިފައި އުޅުނު މީހަކު، ހައްޔަރުކޮށްފައެވެ. ފުލުހުން އޭނާ ހައްޔަރުކުރީ ބަނަހެއް ކައިގެން އުޅެނިކޮށެވެ. ކޯޓުން އޭނާގެ ބަންދަށް ޖަހައިދިނީ ދެ ދުވަހެވެ.