ކުޑަކުއްޖަކަށް ވުމީ އަނިޔާވެރިވުމަށް ލިބޭ ލައިސަންސެއް ނޫން!

މަރްޔަމް ޝަފާ ސައީދު ، ހުވަދޫ މީޑިއާ6 Apr 2024

ކުޑަކުއްޖަކަށް ވުމީ އަނިޔާވެރިވުމަށް ލިބޭ ލައިސަންސެއް ނޫން!

(މިއީ ޝިފްޒާ މުސްތަފާ އޭނާގެ ފޭސްބުކް ޕޭޖުގައި، ރޭގައި ހިނގައިދިޔަ ހާދިސާގެ ފަހުން، ލިޔެ ހިއްސާކޮށްފައިވާ ލިޔުމެކެވެ. މިލިޔުން ހިއްސާކޮށްފައި މިވަނީ އެއްވެސް އުނި އިތުރުކުރުމެއް ނެތި ނަކަލެއްގެ ގޮތުގައެވެ.)

މިރޭ (27 ވިލޭރޭ) ސޯޝަލް މީޑިއާއަށް ކުއްލިއަކަށް މި ތިލަވީ ކުޑަކުއްޖަކަށް ލާއިންސާނީ ބޮޑެތި އަނިޔާތަކެއް ކުރާ މަންޒަރު ފެންނަ ވީޑިއޯއެކެވެ. ބަލަން އުނދަގޫ ވަރަށް އަނިޔާވެރިކަން އެކުލެވޭ އެ ވީޑިއޯއިން ފެންނަނީ މިސްކިތެއްގެ ފާޚާނާއެއް ކަމަށް ބެލެވޭ ތަނެއްގެ ތެރޭގައި ކުޑަ ފިރިހެން ކުއްޖަކަށް ހަޑިހުތުރުބަހުން މުޢާމަލާތުކޮށް އިންޒާރުދީ، ޖިސްމާނީ ގޮތުންނާއި ނަފުސާނީ ގޮތުން އިންތިހާއަށް ބޮޑެތި އަނިޔާދޭ މަންޒަރެވެ. ވީޑިއޯ ބަލަން ކެރުނު މީހެއް ވިއްޔާ ހިތެއް އޮތިއްޔާ ވިރިގެން ފައިބާނެއެވެ. ރަހުމުގެ ކަންފުޅެއް ވެސް ނެތް، އެ ބޮޑު ދެ ޝިކާރަވެރިންގެ ކުރިމަތީ ކުޑަކަކޫމައްޗަށް ތިރިވެ އަނިޔާ ނުކޮށް ދޫކޮށްލުން އެދި އެކުއްޖާ އާދޭސް ކުރިއެވެ. އެވަގުތު އެ ކުއްޖާފުޅު ބިރުގަންނާނެވަރާއި ދެމުންދިޔަ އަނިޔާތަކުން ވޭންއަޅާނެވަރު މީހަކަށް އިހުސާސްވެސް ނުކުރެވޭނެއެވެ.

ފުލުހުންގެ ސަމާލުކަމަށް މިކަން އައުމުން ސީރިއަސް މައްސަލައެއްގެ ގޮތުގައި ބަލަން ފަށައި އެކަން އިޢުލާންކުރިއެވެ. މާގިނައިރެއް ނުވެ ވީޑިއޯގައި ފެންނަ ބޮޑު ދެ އަނިޔާވެރިންނަކީ “ކުޑަކުދިން”ކަން ފުލުހުން ވަނީ ހާމަކޮށްފައެވެ. އެކަކަށް 13 އަހަރެވެ. އަނެކަކަށް 14 އަހަރެވެ. މާނައަކީ އެއީ ޤާނޫނުގެ ކުރިމަތީގައި ކުޑަކުދިންނެވެ. މިފަދަ މައްސަލަތަކުގައި އެންމެ ހިތްދަތިވާ ހިސާބަކީ މިއެވެ. ޤާނޫނު ބުނާގޮތުން ކުޑަކުދިން ޖިނާއީ މަސްއޫލިއްޔަތު އުފުލަންޖެހެނީ 15 އަހަރު ވުމުންނެވެ.

ސުވާލަކީ މިރޭގެ ހާދިސާގައި އަނިޔާ ލިބުނު ކުއްޖާއަށް އިންސާފު ލިބޭނެ ދޮރު ބަންދުވީ ހެއްޔެވެ؟ ހަމަ ހިލާ އެހެން ވެގެން ނުވާނެއެވެ. އެ ކުއްޖާފުޅަށް އެދިން އަނިޔާއަށް އިންސާފު ލިބެން ޖެހެއެވެ. ޤާނޫނުގައި ބުނާ އުމުރު ހަމަނުވުމަކީ ތިމާފަދަ އަނެއް އިންސާނާއަށް އަނިޔާވެރިވާން ލިބޭ ލައިސަންސެއް ނޫނެވެ. ކުޑަކުއްޖަކަށް ވިޔަސް ތަސައްރަފު ފުދުމުން އިންސާނުންގެ ދަރަޖައިން ނެއްޓި، ޖަނަވާރުންގެ ދަރަޖައަށް ވެއްޓި، ކުރާ އަމަލުތަކަށް ޒިންމާ ނަގަން ޖެހޭނެއެވެ. އަދި ޒިންމާ ކުރުވެން ވެސް ޖެހެއެވެ.

ޝަރީޢަތާއި ޤާނޫނުގެ ދާއިރާއިން ކިޔަވަމުންދާ ދަރިވަރެއްގެ ހައިސިއްޔަތުން ރާއްޖޭގެ ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނާއި ކުޑަކުދިންގެ ޢަދުލުގެ ޤާނޫނުގެ މައްޗަށް ދާދިފަހުން ދިރާސާއެއް ހެދީމެވެ. ތެދެކެވެ. ދުނިޔޭގައި ނެތް ފެންވަރުގެ ދެ ޤާނޫނެވެ. ނަމަވެސް އެއިން ނުކުތް ނަތީޖާ ހެޔޮކަމަށް ބުނެވޭކަށް ނެތެވެ. ޤާނޫނުގެ ސަބަބުން ބަނދެވުނީ ކުޑަކުދިން ތަރުބިއްޔަތުކުރަން ތިބި ބެލެނިވެރިންނާއި އެދުރުންގެ އަތްތަކެވެ. ނަތީޖާއަކީ ހެޔޮ ތަރުބިއްޔަތަކުން ތަރުބިއްޔަތު ނުކުރެވި، ކުށަށް އަރައިގަންނަ ކުޑަކުދިން އިތުރުވުމެވެ.

މިއީ ސީރިއަސް މައްސަލައެކެވެ. މުޅި ޤާނޫނު އަލުންބަލުން މުރާޖަޢާކޮށް، އިސްލާމީ ޝަރީޢަތާއި މި މުޖުތަމަޢުގެ މިހާރުގެ ހާލަތަށް ފެތޭނެހެން އަވަހަށް ބަދަލުކުރަންޖެހޭ ކަމަށް ދެކެމެވެ.

އެހެން ނޫންނަމަ، ގެއްލި ހަލާކުވަނީ ޤައުމުގެ މުސްތަޤުބަލެވެ. މާދަމާގެ ޖީލެވެ.

ޓެގް