ހައްދުންމަތީގެ ބައެއް ރަށްތަކަށް ކުރައްވާ ރަސްމީ ދަތުރުފުޅެއްގައި މިއަދު ހެނދުނު ފުރާވަޑައިގެން، ލ. ކައްދޫއަށް ވަޑައިގެންނެވުމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ލާމު އަތޮޅުން ނުހަނު ހޫނު މަރުޙަބާއެއް ކިޔައިފިއެވެ.
މިއަދު ހެނދުނު ލާމު ކައްދޫން ރައީސް ޑރ މުއިއްޒަށް މަރުޙަބާ ކިޔަން ފޮނަދޫ އަދި ގަމުންވެސް ގިނަ އަދަދެއްގެ މީހުން ޖަމާވިއިރު ކައިރި ރަށްރަށުން ވެސް ބައެއް މީހުން ރައީސަށް މަރުޙަބާ ދަންނަވަން އައިސް ތިއްބެވެ. އެ މީހުންނާ ސަލާމް ކުރައްވަން ރައީސް ވަނީ ދޮޅު ގަޑިއިރު ހޭދަކުރައްވާފައެވެ.
މިއީ ރައީސަކަށް މަރުޙަބާ ދަންނަވަން ލާމު އަތޮޅުން އެންމެ ގިނަ މީހުން ނިކުތް ފަހަރުކަން ފާހަގަކޮށްލެއެވެ.
ރިޔާސީ އިންތިޚާބު ކާމިޔާބު ކުރެއްވިފަހުން ރައީސް ލާމު އަތޮޅަށް ކުރައްވާ ފުރަތަމަ ދަތުރުފުޅުގައި، އަތޮޅުގެ ރަށްރަށުގެ ކައުންސިލްތަކާ ބައްދަލު ކުރެއްވުމުގެ އިތުރުން ރައްޔިތުންނާ ބައްދަލު ކުރައްވާނެއެވެ.
ރައީސުލްޖުމްހޫރިއްޔާގެ މި ދަތުރުފުޅުގައި ހައްދުންމަތީގެ ބައެއް ރަށްތަކަށް ޒިޔާރަތްކުރައްވައި، އެ ރަށްރަށުގެ ރައްޔިތުންނާއި ކައުންސިލްތަކާއި އ.ތ.މ. ކޮމިޓީތަކާ ބައްދަލުކުރައްވައި، އެރަށްރަށުގެ ތަރައްޤީއަށް ބޭނުންވާ ކަންކަމާއި، ރައްޔިތުން އެންމެ އެދޭކަންކަމާ ގުޅޭގޮތުން މަޝްވަރާ ކުރައްވާނެއެވެ.
މި ދަތުރުފުޅުގައި ރައީސުލްޖުމްހޫރިއްޔާގެ އަރިހުގައި ސަރުކާރުގެ މަތީފަންތީގެ ވަފުދެއް ބައިވެރިވެވަޑައިގަންނަވައެވެ.
ހައްދުންމަތީގެ ރަށްތަކަށް ކުރައްވާ ދަތުރުފުޅަށްފަހު، އޭޕްރީލް 12ވަނަ ދުވަހު ނުރަސްމީ ދަތުރުފުޅެއްގައި ރައީސުލްޖުމްހޫރިއްޔާ އައްޑޫ ސިޓީއަށް ވަޑައިގެންނެވުމަށް ވަނީ ހަމަޖެހިފައެވެ.