ރޭ ގައި އަލިފާނުގެ ހާދިސާ ހިނގި މާފަންނު ރަބީއުވިލާ ތަޅާލުމުގެ މަސައްކަތް ވަރަށް އަވަހަށް ކުރިއަށް ގެންދަވާނެ ކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް އުމަރު ވިދާޅުވެއްޖެއެވެ.
ވަޒީރު އާދަމް ޝަރީފް މިކަން ހާމަކުރެއްވީ އެކްސްކޮމްގައި ކުރެއްވި ޕޯސްޓެއްގައެވެ. އެޕޯސްޓުގައި ވަޒީރު ވިދާޅުވީ ރޭ އަލިފާނުގެ ހާދިސާ ހިނގި މީހުން ދިރި ނޫޅާތާ ގިނަ ދުވަސް ވެފައިވާ ބޮލަށް ވެއްޓޭ ވަރަށް ބާވެފައިވާ ގެއެއްގައި ކަމަށެވެ.
އެހެންކަމުން މަގުމަތީ ހިނގާބިނގާވެ އުޅޭ ފަރާތްތަކަށް ނުރައްކާތެރި ހާދިސާއެއް މެދުވެރިވެދާނޭ ކަމަށްޓަކައި ސަރުކާރުގެ ކަމާ ގުޅުން ހުރި ފަރާތްތަކާ ވާހަކަ ދައްކައިގެން އެ އިމާރާތް ތަޅާލުމުގެ މަސައްކަތް ވަރަށް އަވަހަށް ކުރިއަށް ގެންދަވާނެ ކަމަށް އާދަމް ޝަރީފް ވަނީ ވިދާޅުވެފައެވެެ.
ފުލުހުން ރޭ ބުނެފައި ވަނީ އަލިފާނުގެ ހާދިސާއަށްފަހު އެ ސަރަހައްދުގެ ރައްކާތެރިކަން ކަށަވަރުކުރެވެންދެން އެ މަގު ދުއްވާ އުޅަނދުތަކަށް ބަންދުކޮށްފައިވާ ކަމަށެވެ.
ފީވެ ބާވެފައިވާ ވީރާނާ ގެތައް މާލޭޭގެ ބައެއް ހިސާބުތަކުން މަދުންނަމަވެސް ފެނެއެވެ. އަދި މިފަދަ ގޭގެ ތަކުން ބައެއް ފަހަރަށް މަގުމަތިން ހިނގާފައިވާ މީހުންގެ ބޮލަށް ކުންޏާއި ސިމެންތި ފޭބުމުގެ މައްސަތަކާއި، ކަރަންޓު ޝޯޓުވުން ފަދަ މައްސަލަތައް ޖެހިގެން އަލިފާނުގެ ހާދިސާތައް ހިނގާފައިވެއެވެ.
ރޭ 8:14 ހާއިރު އަލިފާނުގެ ހާދިސާއެއް ހިނގާފައިވަނީ ރަބީއުވިލާގެ ހަތަރު ވަނަ ފަންގިފިލާގައެވެ. އެ އަލިފާންގަނޑު މާގިނަ އިރުތަކެއް ނުވެ ނިއްވާލާފައިވެއެވެ. އެއ ހާދިސާއާއި ގުޅިގެން އެއްވެސް މީހަކަށް އަނިޔާއެއްވެފައިނުވާ ކަމަށް އެމްއެންޑީއެފް އިން ރޭ ބުނެފައިވެއެވެ.