ރ. އަލިފުއްޓާއި ނ. މަނަދޫ ގެ މަގުތައް ޒަމާނީ ފެންވަރަށް ހެދުމުގެ މަޝްރޫއުގެ މަސައްކަތް ބޭނުންވާ ސާމާނާއި ވެހިކަލްގެ އިތުރުން ސައިޓް ހެދުމަށް ބޭނުންވާ މެޓީރިއަލް ލޯޑް ކުރުމާއި ފޮނުވުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އިން ފަށައިފި އެވެ.
ސަރުކާރުން، އަލިފުށީ ބޮޑެތި މަގުތައް ޑިޒައިންކޮށް ހެދުމަށް 90.96 މިލިއަން ރުފިޔާގެ ޕްރޮޖެކްޓްގެ މަސައްކަތް އާރުޑީސީއާ ހަވާލުކުރީ 16 އޭޕްރިލް 2023ގައެވެ، މި މަޝްރޫއަކީ ހަވާލުކޮށްފައި ވަނީ (18 މަސްދުވަސް،) 540 ދުވަހުގެ ތެރޭގައި ނިންމާ ގޮތަށެވެ.
ހަމަ މި މަޝްރޫއުގެ ދަށުން އަލިފުށީގެ 3.8 ކިލޯމީޓަރު މަގުގައި ތާރު އަޅައި، މަގުތަކުގައި ފެން ހިންދާ ނިޒާމު ގާއިމުކޮށް، މަގުތަކުގައި މަގު ބައްތި ޖަހާނެ އެވެ.
ޑިޒައިން އެންޑް ބިލްޑް އުސޫލުން ނ. މަނަދޫ މަގު ހެދުމުގެ މަސައްކަތް އާރުޑީސީއާ ހަވާލުކުރީ 9 މާޗު 2023ގަ އެވެ. މިއީ 75.7 މިލިއަން ރުފިޔާއަށް 540 ދުވަހުގެ ތެރޭގައި ނިންމާގޮތަށް ހަވާލުކުރި މަޝްރޫއެކެވެ.
މި މަޝްރޫއުގެ ދަށުން މަނަދޫގެ 4.2 ކިލޯމީޓަރުގެ މަގުގައި ތާރު އަޅައި، މަގުތަކުގައި ފެން ހިންދާ ނިޒާމު ގާއިމުކޮށް މަގުތަކުގައި މަގު ބައްތި ޖަހާނެ އެވެ.