އެގްރިކަލްޗަރ އީކޮންޒޯން އެއް ރާއްޖޭގައި ޑިވެލޮޕްކުރުމަކީ، ދެމެހެއްޓެނިވި ގޮތެއްގައި ބައިނަލްއަޤްވާމީ ފެންވަރުގައި ކުރެވޭ މުހިންމު ނިންމުމެއް ކަމަށް އިކޮނޮމިކް މިނިސްޓރު މުހައްމަުދު ސައީދު ވިދާޅުވެއްޖެއެވެ.
ސައީދު ވިދާޅުވީ ކާބޯތަކެތީގެ ރައްކާތެރިކަން ކަށަވަރުކުރުމަކީ ރައީސުލްޖުމްހޫރިއްޔާގެ ވަރަށް މުހިންމު ވަޢުދެއް ކަމަށެވެ. އެގޮތުން ރާއްޖޭގައި މި ޒޯން ރަނގަޅުގޮތުގައި ފެށިގެން ކުރިއަށްދިއުމަކީ އެތައްބަޔަކަށް އޭގެ ފައިދާކުރާނެ މުހިންމު ނިންމުމެއް ކަމަށްވެސް ވިދާޅުވިއެވެ.
ސައީދު މިހެން ވިދާޅުވެފައިވާއިރު، ކާބޯތަކެތީގެ ރައްކާތެރިކަން ހަރުދަނާކޮށް، އުތުރު ތިލަފަޅުގައި އެގްރިކަލްޗަރ އިކޮނޮމިކް ޒޯނެއް ގާއިމް ކުރަން ވަނީ ނިންމާފައެވެ.
ރާއްޖެއިން ދަނޑުވެރިކަމުގެ ގިނަ ބާވަތްތައް އިމްޕޯޓު ކުރާއިރު، ކޮންމެ އަހަރަކު ވެސް 600 މިލިއަން ޑޮލަރަށް އިތުރުވެ، ރާއްޖޭގެ ކާބޯތަކެތީގެ ރައްކާތެރިކަމަށް ޔަގީން ކުރަން ޖެހޭ ކަމަށާއި، އެހެންކަމުން ކާބޯތަކެތީގެ ރައްކާތެރިކަން ހަރުދަނާކުރުމަށް ސިނާއީ އޮނިގަނޑަށް ބަދަލުތަކެއް ގެންނަން ނިންމާފައިވާ ކަމަށް އެސްޓީއޯ އިން ވަނީ މީގެ ކުރިން ބުނެފައެވެ.
ތަރުކާރީއާއި މޭވާ އަދި ކުކުޅު ރާއްޖޭން ލިބޭނެ ގޮތްހަދާ މުޅި ރާއްޖެއަށް އެތަކެތި ފޯރުކޮށްދިނުމަކީ، ގިނަބަޔަކަށް އޭގެ ފައިދާ ކުރާނެ، ކަމެއް ކަމަށްވެސް މީގެ ކުރިން ވަނީ ފާހަގަ ކޮށްފައެވެ.
ކާބޯތަކެތީގެ ދަތިކަން ނައްތާލުމަށް ދިވެހިރާއްޖޭގެ ޞިނާޢީ އިޤްތިޞާދީ އޮނިގަނޑު ތަރައްޤީކުރުމާއި، ދަނޑުވެރިކަމުގެ ބާވަތްތައް އިމްޕޯޓްކުރުމާއި ޑޮލަރުގެ ރިޒާވް ބޭނުންކުރާ މިންވަރު މަދުކުރުން މިއީ ވެސް މުހިންމު ކަމެއް ކަމަށް ވަނީ ފާހަގަ ކޮށްފައެވެ.
ދިވެހީންގެ ދިރިއުޅުމުގެ ޚަރަދު ކުޑަކުރުމަށްޓަކާއި، މިއީ ދިގު މުއްދަތުގެ ތަރައްޤީއަށް ކުރެވޭ ޤައުމީ މަޝްރޫޢެއް ކަމަށްވެސް ސަރުކާރުން ބުނެއެެވެ.