ގައުމަށް ބޭނުންވަނީ ތަރައްގީކަމަށާއި، ފޯކަސް އޮތީ ނަތީޖާ ނެރެދިނުމަށް ކަމަށްވިޔަސް އެމްޑީޕީން ބޭނުންވަނީ ސަރުކާރު ވައްޓާލުމަށް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ކުރިއަށް އޮތް ރައްޔިތުންގެ މަޖިލީހުގެ އިންތިހާބަށް ތައްޔާރުވުމަށް އައްޑޫ ސިޓީގެ ރައްޔިތުންނާ މިރޭ ބައްދަލުކުރައްވައި ރައީސް މުއިއްޒު ވިދާޅުވީ މަޖިލީހުގެ އައްޑޫގެ ގޮޑިތައް ސަރުކާރަށް ކާމިޔާބުވެއްޖެނަމަ ރައްޔިތުން ބޭނުންވާ ނަތީޖާ ނެރެދެވޭނެކަމަށެވެ.
މިއީ ރައީސް އައްޑޫ ރައްޔިތުންނާއި ބައްދަލުކުރެއްވި ދެވަނަ ފަހަރެވެ. ރައީސް ވަނީ އައްޑޫއަށް ވެސް ވަޑައިގެނފައެވެ. ރައީސް ވިދާޅުވީ އައްޑޫގެ ތަަަރައްގީއަށް ބޭނުންވާ ހުރިހާ ކަމެއް މި ސަރުކާރުން ކުރައްވާނެ ކަމަށާއި، ދައުރު ނިމޭއިރު އެއްވެސް ކަމެއް ނުކުރެވި ނުބާއްވާނެ ކަމަށެވެ. އެގޮތުން ދައުރުގެ ކުރީކޮޅު މަސައްކަތް ފައްޓަވާފައިވަނީ ވެސް އެ ބޭނުމުގައި ކަމަށެވެ.
ރައީސް ވިދާޅުވީ އެމަނިކުފާނު ބޭނުންފުޅުވަނީ ރާއްޖެއަށް ހަމަޖެހުން ގެންނަން ކަމަށާއި ރާއްޖެ ހަނގީގީ މާނައިގައި ތަރައްގީ ގެންނަން ކަމަށެވެ.
“ނަތީޖާ ނެރެދިނުމަށް ފޯކަސް ކުރާ ސަރުކާރެއް އަޅުގަނޑު ބޭނުން ވަނީ ހިންގަން. އެންމެ ދުވަހެއް ވެސް އެންމެ ގަޑިއިރެއް ވެސް މި ސަރުކާރަކުން ބޭކާރެއް ނުކުރަާނަން ރައްޔިތުންނަށް ވީ ވައުދުތައް ފުއްދުމުގައި ނޫނިއްޔާ އަޅުގަނޑުމެންގެ އެއްވެސް ބޭފުޅަކު ވަގުތެއް ހޭދައެއް ނުކުރައްވަވާ،” ރައީސް ވިދާޅުވި އެވެ.
ރައީސް ވިދާޅުވީ މަޖިލީހަށް ސަރުކާރާ ދެކޮޅަށް މަސައްކަތް ކުރާ، އަދި ބަދަލު ހިފުމުގެ ރޫހު ގެންގުޅޭ ބަޔަކަށް ފުރުސަތު ދޭން ނުފެންނަ ކަމަށެވެ. އަދި ދެކޮޅު ހެދުމާއި ހަމަނުޖެހުން ފެންނަން ގޮތަށް ރައްޔިތުން ގޮތް ނިންމައިގެން ނުވާނެ ކަމަށާއި، ކޮންމެ ދުވަހަކު ފެންނާނީ ސަރުކާރަށް ހުރަސް އަޅާތަން ކަމަށެވެ.
ވެރިކަމަށް މިވީ ފަސްވަރަކަށް މަހުގައި ވެސް އެމްޑީގެ އަމަަލުތައް ހުރީ އެގޮތަށް ކަމަށާއި، ފެނުނީ އެ މަންޒަރު، ކަަމަށް ރައީސް ވިދާޅުވިއެވެ.