ނިމިދިޔަ މޯލްޑިވްސް ޑިމޮކްރަޓިކް ޕާޓީ، އެމްޑީޕީގެ ސަރުކާރުގެ ވެރިކަން ނިމުނުއިރު ރާއްޖޭގެ އޮތީ އިގުތިސާދު އަނދަވަޅަކަށް ވައްޓާލާފައި ކަމަށާއި އިދިކޮޅު އެމްޑީޕީއަށް ވީއިރު މިސްރާބު ހަމަ މަގަށް އެޅުވުމުގެ ވާހަކަ ދެއްކެން ނެތްކަމަށް މަޖިލިސް އިންތިހާބުގެ ޕްރޮގްރެސިވް ކޮންގްރެސްގެ ޗީފް ސްޕޯކްސްޕާސަން އަދި އެންސްޕާގެ ސީއީއޯ ހީނާ ވަލީދު ވިދާޅުވެއްޖެއެވެ.
ހީނާ މިފަދައިން ވިދާޅުވީ ޕީއެންސީން މިއަދު ބޭއްވި މަޖިލިސް އިންތިހާބާއި ގުޅޭ ޕްރެސް ކޮންފަރެންސް ގައި ވާހަކަފުޅު ދައްކަވަމުންނެވެ.
މިއަދުގެ ޕްރެސް ކޮންފަރެންސްގައި ހީނާ ވަނީ ވޭތުވެދިޔަ ފަސްއަހަރު އެމްޑީޕީން ގައުމުގެ އިގްތިސާދާމެދު ކަަންތައް ކޮށްފައިވާ ގޮތަށް އަލިއަޅުވައި ގައުމުގެ އިގުތިސާދު ވެއްޓިފައި އޮތް ޙާލަތު ބަޔާންކޮށްދެއްވާފައެވެ. އެގޮތުން ހީނާ ވިދާޅުވީ އެމްޑީޕީން ވަނީ، ބިލިއަނުން ލޯނު ނަގާފައި ކަމަށާއި އަދު ދިވެހި ރައްޔިތުން އަދި ދަރިންގެ ދަރިން އަންނަން އޮތް ޖީލާ ހިސާބަށްވެސް އޮތީ ދަރަނިވެރިވެފައި ކަަމަށެވެ.
“ވެރިކަން ނިމުނުއިރު އިޤްތިސާދު އޮތީ އަނދަވަޅަކަށް ވައްޓާލާފައި، އެހެންކަމުން އިޤްތިސާދުގެ ވާހަކަ ދައްކަން މިސްރާބު ހަމަ މަގަށް އެޅުވުމުގެ ވާހަކަ އެމްޑީޕީއަށް ދެއްކޭކަށް ނެތް. ބިލިއަނުން ލޯނު ނަގާ ރައްޔިތުން އަދި ދަރިންގެ ދަރިން އަންނަން އޮތް ޖީލަށް ދަރަނިވެރިވެފައި މިއޮތީ،” ހީނާ ވިދާޅުވިއެވެ.
ހީނާ ވިދާޅުވީ، އެމްޑީޕީން ކުރިހާ ވެސް ކަމަކީ ގާނޫނުގައި ތަޅުއަޅުވާ، ފައިސާ ޗާޕުކޮށް، ޤައުމު އަނދަވަޅަކަށް ވައްޓާލުން ކަމަށެވެ. އަދި މިދިޔަ ސަރުކާރުގެ ސިޔާސަތުތައް އޮތީ ބޮޑުތަނުން ފެއިލްވެފައިކަން ފާހަގަކުރައްވާ ހީނާ ވިދާޅުވީ، އެމްޑީޕީން މަސައްކަތް ކުރެއްވީ އަމިއްލަ ފައިދާއަށް ކަމަށާއި ކުޑަ ރަށެއް ބޮޑު ރަށެއް ނުބަލާ އެމްޑީޕީގެ މަޝްރޫއުތައް ވަނީ ފެއިލްވެފައި ކަަމަށެވެ.
މިކަން އެމްޑީޕީ ވެރިކަމަށް ގެނައުމަށް އެންމެ ބޮޑު މަަސައްކަތް ކުރެއްވި ކުރީގެ ރައީސް ނަޝީދު ވަރަށް ރަނގަޅަށް ހާމަކޮށްދީފައިވާ ކަމަށާއި، އެމްޑީޕީގެ ވެރިކަމުގެ އިސްލާމްދީނުގެ ހުރުމަތް ކަނޑާ، އިސްލާމްދީނަށް ފުރައްސާރަ ކޮށްފައިވާ ކަމަށް ވެސް ހީނާ ވަނީ މިއަދުގެ ނޫސްވެރިންގެ ބައްދަލުވުމުގައި ވިދާޅުވެފައެވެ.