ވޯޓުލުމަކީ ކޮންމެ ރައްޔިތަކަށްވެސް ގާނޫނީ އަސާސީ ލިބިދީފައިވާ ހައްގެއް ކަމަށާއި ކިޔުގެ ފަހުވަގުތަށް މަޑުނުކޮށް، ވީހާވެސް އަވަހަށް ހުރިހާ ރައްޔިތުންވެސް ނުކުމެ ވޯޓުލުމުގެ ހައްގު އަދާ ކުރުމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު އިލްތިމާސް ކުރައްވައިފިއެވެ.
ރައީސް މިހެން ވިދާޅުވީ ތާޖުއްދީނު ސުކޫލުގައި ބަހައްޓާފައި ހުރި މާފަންނު ދެކުނު ދާއިރާގެ ވޯޓު ފޮއްޓަށް ވޯޓުލެއްވުމަށް ފަހުގައި ނުކުމެ ވަޑައިގަންނަވަމުން ނޫސްވެރިންނާ ދެއްކެވި ވާހަކަފުޅުގައެވެ.
ނޫސްވެރިންނާ ވާހަކަފުޅު ދައްކަވަމުން ރައީސް ވިދާޅުވީ ވޯޓުލުމަކީ ކޮންމެ ރައްޔިތަކަށް ވެސް ގާނޫނީ އަސާސީ ލިބިދީފައިވާ ހައްގެއް ކަން ފާހަގަ ކުރައްވައި އެ ހައްގުގެ ބޭނުން ހިފައި ވޯޓުލުމުގައި ބައިވެރިވުމަށެވެ،
“އަޅުގަނޑު ހަމަ ހުރިހާ ރައްޔިތުންނަށް ދަންނަވާލަން ބޭނުންވަނީ ވޯޓުލުމަކީ ކޮންމެ ރައްޔިތަކަށް ވެސް ގާނޫނީ އަސާސީ ލިބިދީފައިވާ ހައްގެއް އަދި ޒިންމާއެއް. އެހެންވީމަ ހުރިހާ ރައްޔިތުން ނުކުމެ ވަޑައިގެން ވީހާ ވެސް އަވަހަށް ވޯޓުލުމުގެ ހައްގު އަދާ ކޮށްދެއްވާށޭ. ކޮންމެހެން ހަވީރުވަންދެން މަޑުނުކުރައްވާ އެބޭފުޅަކު ވޯޓު ލައްވަންޖެހޭ މަރުކަޒަކަށް ވަޑައިގެން ވޯޓު ލެއްވުމަކީ އެބޭފުޅެއްގެ ހައްގެއް އަދި ޒިންމާއެއް ކަމަށްވީމަ އަޅުގަނޑު ހަމަ ވޯޓުލުމަށް އިލްތިމާސްކުރަން،” ރައީސުލްޖުމްހޫރިއްޔާ ޑރ މުޢިއްޒު ވިދާޅުވިިއެވެ.
ރައީސް އެދިވަޑައިގަތީ ހަވީރު ވަންދެން މަޑު ނުކޮށް ނުވަތަ ކިޔުގެ ފަހު ވަގުތަށް މަޑު ނުކޮށް އެ މީހަކު ވޯޓުލާ މަރުކަޒަކަށް ގޮސް ވީހާ ވެސް އަވަހަށް ވޯޓު އެޅުމަށެވެ.
ވޯޓުލުން ހަވީރު 5:30 އާ ހަމަޔަށް ކުރިޔަށްދާނެއެވެ.
މާލެ ސަރަހައްދަން މިއަދު މޫސުން ރަނގަޅުވި ކަމުގައިވިޔަސް ދެކުނުގެ އަތޮޅުތަކަށް މޫސުން ގޯސްކޮށް އުޅޭތީ އީސީން ވަނީ ވީހާވެސް އަވަހަށް ވޯޓު އެޅުމަށް އިލްތިމާސްކޮށްފައެވެ. މޫސުން ގޯސްވިޔަސް، އިންތިހާބުގެ ވަގުތު އިތުރު ނުކުރަން ވަނީ ނިންމައިފައެވެ.