ވިހި ވަނަ ރައްޔިތުންގެ މަޖިލީހުގެ އިންތިޚާބުގައި ސަރުކާރު ހިންގާ ޕާޓީ، ޕީއެންސީއަށް ލިބުނު ކާމިޔާބީ ފާހަގަކުރުމަށް ލ.އަތޮޅުގައި ހަވާ އަރުވަން ނިންމައިފިއެވެ.
މިކަން އިޢުލާނު ކުރައްވާފައިވަނީ ލ.އަތޮޅަށް ނިސްބަތްވާ ފަތުރުވެރިކަމާ ބެހޭ ވަޒީރު އިބްރާހިމް ފައިސަލެވެ. ފައިސަލް ވިދާޅުވީ ލ.އަތޮޅުން ސަރުކާރަށް ދިން ވަރުގަދަ ތާޢީދު ފާހަަގަކޮށް ރައްޔިތުންނަށް ޝުކުރުދެންނެވުމާ އުފާ ފާޅުކުރުމުގެ ގޮތުން ލ.އަތޮޅުން ޕީއެންސީގެ ކެނޑިޑޭޓުން ހޮވުނު ދާއިރާތަކުގެ ހުރިހާ ރަށެއްގައި ހަވާ އަރުވަން ނިންމާފައިވާ ކަމަށެވެ.
މީގެ އިތުރުންވެސް އުފާ ފާޅުކުރުމަށް އެކިއެކި ހަރަކާތްތައް ކުރިއަށް ގެންދަން ރާވާފައިވާކަމަށްވެސް ވަޒީރު ވިދާޅުވިއެވެ.
ލާމު އަތޮޅުގެ ތިން ދާއިރާއިން ޕީއެންސީގެ ކެނޑިޑޭޓުން ވަނީ މަޖިލީހަށް އިންތިޚާބުވެފައެވެ. އެއީ އިސްދޫ ދާއިރާ އާއި ފޮނަދޫ ދާއިރާގެ އިތުރުން ގަމު ދާއިރާއެވެ. މި ތިން ދާއިރާގައި ހިމެނެނީ ފޮނަދޫ، މާމެންދޫ، ދަނބިދޫ، މާބައިދޫ، މުންޑޫ، ގަން، އިސްދޫ އަދި ކަޅައިދޫއެވެ.
ހަވާ އަރުވަން ނިންމިކަން އިއުލާންކުރެއްވި ނަމަވެސް ހަވާ އަރުވަނީ ކޮން ދުވަހަކު ކަމެއް ވަޒީރު ވިދާޅެއް ނުވެއެވެ.