އެމްޑީޕީގެ މިހާރު ގެ ޙާލަތު ރަނގަޅު ކުރެވޭނީ މިހާރު އޮތް ލީޑަރ ޝިޕް ބަދަލުކޮށް ޕާޓީ ރީފޯރމް ކޮށްގެން ކަމަށް ފޮނަދޫ ދާއިރާގެ އިންތިޚާބީ މެންބަރު އަދި ރައީސުލްޖުމްހޫރިއްޔާގެ ހާއްސަ އެޑްވައިޒަރު އަބްދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ.
އަދުރޭ ޕީއެސްއެމް ރާއްޖެ މިއަދު ޕްރޮގުރާމްގައި ވާހަކަދައްކަވަމުން ވިދާޅުވީ އެ،މްޑީޕީގެ ވެރިކަމުގައި ފެނުނީ ރައްޔިތުންނަށް ކަންކަންކޮށްދިނުމުގެ ބަދަލުގައި ގައުމު ނިކަމެތިކަމަކާއި ދިމާލަށް މިސްރާބު ޖެހިތަން ކަމަށެެވެ. އެމްޑީޕީގެ ވެރިކަމުގައި ފެނިގެންދިޔައީ ގައުމުގެ އިގްތިސާދު ވަރަށްބޮޑަށް ވެއްޓީ މިނިވަންކަންވެސް ދީލާލާއިގެން ދިޔަތަން ކަމަށެވެ.
“ގައުމު ނިކަމެތި ކަމާއި ދިމާލަށް މިސްރާބުޖެހުން އެއީ 2023 ގައި ރައްޔިތުން ނޫނެކޭ ބުނަން ޖެހުނު ސަބަބު. އެއްވެސް ބަޔަކު ވިސްނަން ނުޖެހޭނެ ދިވެހި ރައްޔިތުންނަކީ މޫދަށް އެއްލާލާފައި އޮންނަ ގާތަކެކޭ.” އަދުރޭ
އަދުރޭ ވިދާޅުވީ އެމްޑީޕީގެ އެންމެބޮޑު ފޭލިއާރ އަކީ ގައުމާއި ރައްޔިތުންނަށް ފައިދާހުރި ގޮތުގައި ކަންނުކުރެވުން ކަމަށެވެ. އަދުރޭ ވިދާޅުވީ އެމްޑީޕގެ ރައީސަކީ އަބްދުﷲ ޝާހިދު ކަމަށްވި ނަމަވެސް އެކަން ގަބޫލު ކުރާމީހުން އެޕާޓީގައި ނެތް ކަމަށެވެ. އަދި ރައީސް ސޯލިހަކީ ޕާޓީއެއް ހިފަހައްޓާލެވޭނެ ވެރިއެއްވެސް ނޫން ކަމަށެވެ.
މީގެ އިތުރުން އަދުރޭ ފާހަގަ ކުރެއްވީ އަބްދުﷲ ޝާހިދާއި މިހާރުގެ ޗެއާޕާސަންވެސް އެއް އަމާޒަކަށް މަސައްކަތ ކުރެވޭނެ ކަމަށް ގަބޫލު ނުކުރެވޭ ކަމަށެވެ. އެހެންކަމުން އެމްޑީޕީގެ މިހާރު ގެ ޙާލަތު ރަނގަޅު ކުރެވޭނީ މިހާރު އޮތް ލީޑަރ ޝިޕަށް ބަދަލުއައިސް ޕާޓީ ރީފޯރމް ކޮށްގެން ކަމަށްވެސް ވިދާޅުވިއެވެ.