އެމްޑީޕީގެ ރައީސް އަދި ކުރީގެ ފޮރިން މިނިސްޓަރު އަބްދުﷲ ޝާހިދު، އެބޭފުޅާގެ ބައްޕާފުޅު ޝައިހް މޫސާ ޖަމީލްގެ ޖަނާޒާގެ ކަންކަން ފުރިހަމަކަމާއެކުގައި ކުރިއަށް ގެންދެވީތީ ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ޝުކުރު ދަންނަވައިފިއެވެ.
ޝާހިދު “އެކްސް” ގައި ކުރެއްވި ޕޯސްޓެއްގައި ވިދާޅުވީ ރައީސް ޑރ. މުއިއްޒުގެ ތައުޒިޔާ މެސެޖްގައި ފާޅު ކުރައްވާފައިވާ ހިތްޕުޅު ހެޔޮ ޝުއޫރުތަކަށް އޭނާ އާއި އާއިލާގެ ފަރާތުން އިހްލާސްތެރިކަމާ އެކުގައި ޝުކުރު ދަންނަވާ ކަމަށެވެ. އަދި މުޅި އާއިލާއަށް ދިމާވި ނުހަނު ހިތްދަތި ދަނޑިވަޅުގައި ރައީސް ޑރ މުއިއްޒުގެ އިރުޝާދުގެ މަތިން ބައްޕަގެ ޖަނާޒާގެ ކަންކަން ފުރިހަމަ ކުރުމުގައި ސަރުކާރުގެ އިދާރާތަކުން ކުރެއްވި އިންތިޒާމުތަކަށްވެސް ޝާހިދު ވަނީ ނުހަނު ބޮޑަށް ޝުކުރުއަދާ ކުރައްވާފައެވެ.
“އާއިލާއަށް ދިމާވި ނުހަނު ހިތްދަތި މިދަނޑިވަޅުގައި މަނިކުފާނުގެ އިރުޝާދުގެ މަތިން ބައްޕަގެ ޖަނާޒާގެ ކަންކަން ފުރިހަމަ ކުރުމުގައި ސަރުކާރުގެ އިދާރާތަކުން ކުރެއްވި އިންތިޒާމުތަކަށްވެސް ޝުކުރު ދަންނަވަން.” ޝާހިދު ވިދާޅުވިއެވެ.
ރައީސް ޑރ. މުއިއްޒު މިއަދު ކުރެއްވި ޓުވީޓެއްގައި ވިދާޅުވީ ޝާހިދުގެ ބައްޕާފުޅު ދެމިއޮތުމުގެ އާލަމަށް ދަތުރު ކުރެއްވި ހަބަރު އެހީ ނުހަނު ފުން ހިތާމައާ އެކުގައި ކަމަށެވެ. އަދި މާތް ﷲ މައްޔިތާގެ ފާފަ ފުއްސަވައި ސުވަރުގޭގެ މަތިވެރި ނިއުމަތް މިިންވަރު ކުރެއްވުން އެދި ދުއާ ދަންނަވާފައިވެއެވެ.
ޝާހިދުގެ ބައްޕާފުޅު ޝައިހް މޫސާ ޖަމީލަކީ ހުރަވީ ދަރިކޮޅުން ދުނިޔޭގައި ތިއްބެވި ބޭފުޅުންގެ ތެރެއިން އެންމެ ދޮށީ ބޭފުޅާއެވެ.
މޫސާ ޖަމީލުގެ ހަޔާތުގެ ބޮޑު ބައި ހޭދަ ކުރެއްވީ ކިޔަވައި ދެއްވުމުގައެވެ. މަދަރުސަތުއް ސަލާހިއްޔާގައި ކިޔަވާދެއްވި މޫސާ ޖަމީލަކީ ރާއްޖޭގައި އެންމެ ގިނަ އަދެއްގެ މުދިމުން ތަމްރީނުކޮށް ދެއްވި ހިދުމަތްތެރިޔާއެވެ. ކިޔަވާދެއްވުމުގެ އިތުރުން މޫސާ ޖަމީލު ވަނީ އިސް ފަނޑިޔާރެއްގެ ގޮތުގައި ގިނަގުނަ ހިދުމަތަކެއް ކޮށްދެއްވާފައެވެ.
ރައީސް މައުމޫންގެ ވެރިކަމުން ފެށިގެން ސަރުކާރުގެ އިސް މަގާމުތަކެއް ފުރުއްވި އަބްދުﷲ ޝާހިދު ބައްޕާފުޅު އަވަހާރަވުމާއި ގުޅިގެން ކުރެއްވި ޕޯސްޓްގައި ވިދާޅުވީ އެމަނިކުފާނު ހަޔާތްޕުގައި ދިމާވި ހުރިހާ ކަމެއްގައިވެސް އެންމެ ބޮޑު ހިއްސާއެއް އޮތް ފަރާތަކީ ބައްޕާފުޅު ކަމުގައެވެ.
މޫސާ ޖަމީލްގެ ޖަނާޒާ މިއަދު އޮތީ އިސްލާމީ މަރުކަޒުގައެވެ. ފަސްދާނުލާފައި ވަނީ ގަލޮޅު ސަހަރާގައެވެ.