ރާއްޖޭގެ ގައުމީ ޔުނިވާސިޓީ (އެމްއެންޔޫ)އިން މެޑިސިން ނުވަތަ ޑޮކްޓަރީކަން ކިޔަވަމުންދާ ދަރިވަރު ކިޔެވުމަށް ދަރުމަވަންތަ ހޮސްޕިޓަލުން ދޫކޮށްފައިވާ ދެ ފަންގިފިލާ ހުސްކުރަން ޖެހުމުން، ބޭސްވެރިކަން ކިޔަވަމުންދާ ދަރިވަރުންގެ ކިޔެވުން މައި ކެމްޕަހަށް ބަދަލުކުރި ނަމަވެސް، ދަރިވަރުންގެ ކިޔެވުމަށް ބުރޫ ނާރާނެ ކަމަށް އެމްއެންޔޫ އިން ބުނެފިއެވެ.
އެމްއެންޔޫގެ ފަރާތުން ހިންގާ މެޑިސިން ސްކޫލްގެ ދަރިވަރުންނަށް ކިޔަވައިދިނުމަށް ދަރުމަވަންތަ ހޮސްޕިޓަލްގެ 8 އަދި 12 ވަނަ ފަންގިފިލާ ދޫކޮށްފައި ވެއެވެ. ނަމަވެސް އެތަން ހުސްކުރަން އަންގާފައިވާތީ އެ އެތަނުގައި ކިޔަވަމުންދާ ދަރިވަރުން ދަނީ ކަންބޮޑުވުން ފާޅު ކުރަމުންނެވެ. އެ ދަރިވަރުންގެ ކިޔެވުން ހުއްޓި މަގުމަތިވެދާނެ ކަމަށް އެ ދަރިވަރިން ބުނަމުން ދެއެވެ.
އެމްއެންޔޫއިން މި ފަދައިން ބުނެފައިވަނީ އެމްއެންޔޫއިން ބޭސްވެރިކަން ކިޔަވަމުންދާ ދަރިވަރުން ކިޔެވުމަށް ދަރުމަވަންތަ ހޮސްޕިޓަލުން ދޫކޮށްލައިފައިވާ ދެ ފަންގިފިލާ ހުސްކުރަން އެންގުމާ ގުޅިގެންނެވެ.
އެމްއެންޔޫ އިން މިއަދު ނެރުނު ބަޔާނެއްގައި ބުނެފައިވަނީ މެޑިކަލް ސުކޫލުގެ ވަސީލަތްތައް މައި ކެމްޕަހަށް ބަދަލުކުރަން ނިންމީ ހޮސްޕިޓަލުގެ ޚިދުމަތް ފުޅާކޮށް ޢާްންމު ރައްޔިތުންނަށް ކަންކަން ފަސޭހަ ކުރުމަށް އިތުރު ޖާގަ ބޭނުންވާތީ ކަމަށެވެ. އަދި މި ބަދަލުގެ ސަބަބުން ރާއްޖޭގެ ރައްޔިތުންނަށް ކުރާނެ ފައިދާ ބޮޑުވާނެ ކަމަށް ޤަބޫލު ކުރެވޭ ކަމަށްވެސް އެމްއެންޔޫގެ ބަޔާނުގައި ވެއެވެ.
2018 ވަނަ އަހަރު ޤައުމީ ޔުނިވަރސިޓީގެ މެޑިކަލް ސްކޫލު ދަރުވަމަވަންތަ ހޮސްޕިޓަލުގައި ޤާއިމުކުރީ ވަގުތީ ގޮތުންނެވެ. މިހާރުވެސް ދަރުމަވަންތަ ހޮސްޕިޓަލުގައި ކިޔަވަމުންދާ ދަރިވަރުންގެ ކިޔެވުން މައި ކެމްޕަހަށް ބަދަލުކުރިނަމަވެސް އެ ދަރިވަރުންނަށް ޕްރެކްޓިކަލް ލެބުތަކުން ދޭ ޚިދުމަތްތަކަށް ބުރޫނާރާނެ އިންތިޒާމެއް ހަމަޖައްސަން މަސައްކަތް ކުރަމުންދާކަމަށް އެމްއެންޔޫގެ ބަޔާނުގައި ބުނެފައި ވެއެވެ.
މީގެ އިތުރުން ދަރިވަރުންނަށް ލިބިދޭންޖެހޭ ޢަމަލީ ތަޖުރިބާތައް ކުރިއެކޭވެސް އެއްގޮތަށް ދަރުމަވަންތަ ހޮސްޕިޓަލުން ފޯރުކޮށްދޭނެ ކަމަށްވެސް އެމްއެންޔޫއިން ވަނީ ބުނެފައެވެ.
މިކަމާ ގުޅިގެން ދަރުމަވަންތަ ހޮސްޕިޓަލުގެ ސީއީއޯ އަބްރާހިމް އަބްދުއް ރައްޒާގް ހަލީމް އޮންލައިން ނޫހަކަށް ވިދާޅުވީ އެތަން ހުސްކުރުމަށް އެމްއެންޔޫއަށް އަންގާފައިވާނެ ކަމަށެވެ. އަދި އެކަން އެގޮތަށް ކުރީ އެ ޔުނިވާސިޓީއާއި ގިނަ މަޝްވަރާތަކެއް ކުރުމަށް ފަހުގައި ކަމަށް އޭނާ ވިދާޅުވިއެވެ. އަދި ދަރުމަވަންތަ ހޮސްޕިޓަލުން ދޫކޮށްލައިފައިވާ ދެ ފަންގިފިލާ ހުސްކުރަން އެންގީ ބެޑްކެޕޭސިޓީ އިތުރު ކުރުމަށް ކަމަށާއި އެ ތަނުގައި ކިޔަވަމުންދާ ކުދިން މަގުމަތި ނުވާނެ ކަމަށްވެސް ރައްޒާގު ވަނީ ވިދާޅުވެފައެވެ،