ދުނިޔޭގެ ހަލަބޮލި ދިރިއުޅުމަކީ އެއްވެސް މުސްލިމަކު އޭނާގެ އާޚިރަތް މަތިން ހަނދުމަނެތި ކުރުވާ އެއްޗެއް ކަމުގައި ހަދައިގެން ނުވާނެއެވެ. އިލާހީ އަމުރުފުޅުތަކަށް ވަގުތު ނުދެވޭ އެއްވެސް މަސައްކަތެއްގައި މަޝްޢޫލުވާން ހެޔޮ ނުވާނެއެވެ. އެހެނީ އިންސާނުން ޚަލްޤުކުރައްވާފައިވަނީ ޚާލިޤުވަންތަ އިލާހަށް އަޅުކަން ކުރުމަށެވެ.
ޤިޔާމަތް މަޙުޝަރުގައި އެ ކަމަކާ މެދު ސުވާލުވެވޭނެ ކަމަކީ މިއީއެވެ. އޭނާގެ ވެރިރައްބަށް އަދާކުރަންޖެހޭ ޙައްޤުތަކާ މެދުއެވެ. އެކަން ފުރިހަމަ ކުރިތޯއެވެ. އެ ކަމުގައި އެއްވެސް ވަރެއްގެ އިހުމާލެއްވެފައި އޮތްތޯއެވެ.
އަޅުކަމުގެ ތެރެއިން އެންމެ އިސްކަމެއް ދޭންވީ ނަމާދަށެވެ. ނަމާދު ފުރިހަމަވެއްޖެ ނަމަ އޭނާގެ ހުރިހާ ކަމެއް ފުރިހަމަވީއެވެ. ނަމާދު އުނިވެއްޖެ ނަމަ މަޙުޝަރުގައި އޮތީ ކަންބޮޑުވުމާއި ހާސްކަމެވެ. ބިރުވެރިކަމާއި ނާމާންކަމެވެ. އެ ވަގުތު ހިތަށް އަރާނެއެވެ. ދުނިޔޭގެ ހަލަބޮލި ދިރިއުޅުމުގައި ތިމަން މަޝްޣޫލު ނުވި ނަމައެވެ. ނަމާދަށް ވަގުތު ހޯދުނު ނަމައެވެ. ނަމަވެސް އެ ދުވަހުން ކުރާނެ ފައިދާ އެއް ނޯންނާނެއެވެ. ވަގުތު އޮންނާނީ ފާއިތުވެ ގޮސްފައެވެ.
ދުނިޔޭގެ ހަލަބޮލި ދިރިއުޅުމަށް އިންސާނުން ލަވަނީ މުދަލާ ފައިސާއެވެ. ދިރިއުޅުމުގެ ޙާޖާތުތައް ފުއްދުމަށް ކުރާ މަސައްކަތުގައި ބަރަކާތްލެއްވި މުދާ ގިނަވެ ތަނަވަސްކަން އިތުރު ވެއެވެ. އިސާހިތަކު މުދާ ދެއްވި ފަރާތް ހަނދުމަނެތިދެއެވެ. އޭގައި ވާ ފަޤީރުންގެ ޙައްޤާ މެދު ޣާފިލުވެއެވެ. މުދަލު ޒަކާތާ މެދު އިހުމާލުވެއެވެ. އެފަދަ މީހާއަށް އާޚިރަތުގައި ހުރީ ބަދުނަޞީބު ކަމެވެ. އޭނާ އެއްކުޅަ މުދަލާއި ޚަޒާނާތައް އަލިފާނުން ދޮންކޮށް އޭނާގެ ބުރިކަށީގައްޔާއި އަރިކަށީގައި ޖައްސާ ފިއްސާލެވޭ ހުއްޓެވެ. އެ ވަގުތު އޭނާ ހިތަށް އަރާނެއެވެ! ދުނިޔޭގެ ހަލަބޮލި ދިރިއުޅުމުގައި ތިމަންނާ މަޝްޣޫލު ނުވި ނަމައެވެ. ފަރުޟު ޒަކާތް އޭގެ ޙައްޤުވެރިންނަށް ދެވުނު ނަމައެވެ. ނަމަވެސް އެ ދުވަހުން ކުރާނެ ފައިދާ އެއް ނޯންނާނެއެވެ. ވަގުތު އޮންނާނީ ފާއިތުވެ ގޮސްފައެވެ.
ދުނިޔޭގެ ހަލަބޮލިކަމުގައި ރަމަޟާން މަހުގެ ރޯދަ ދޫކޮށްލާ މީހުން ވެސް އިސްލާމީ މުޖްތަމަޢުގައި މިއަދު އެބަ ތިއްބެވެ. ވަރުބަލިކަމާއި ކަރުހިއްކުމުގައި ދިރިއުޅުމަށް މަސައްކަތް ކުރުން ދަތިވާ ކަމުގެ އުޒުރު ދައްކާއިރު، އާޚިރަތުގެ ގަދަ ހޫނުގައި ކަރުހިއްކުން ނުފިލާ ހުންނަން ޖެހިދާނެ ކަން އެފަދަ މީހުން ހަނދާނަކު ނުހުރެވެ. އެ ވަގުތު އޭނާ ހިތަށް އަރާނެއެވެ! ދުނިޔޭގެ ހަލަބޮލި ދިރިއުޅުމުގައި ތިމަންނާ މަޝްޣޫލު ނުވި ނަމައެވެ. ﷲ ގެ ވަޖުހުފުޅު އަދައިގެން ރަމަޟާން މަހުގެ ރޯދަ ހިފުނު ނަމައެވެ. ނަމަވެސް އެ ދުވަހުން ކުރާނެ ފައިދާ އެއް ނޯންނާނެއެވެ. ވަގުތު އޮންނާނީ ފާއިތުވެ ގޮސްފައެވެ.
މުސްލިމް ތަކުންނޭވެ! ދުނިޔޭގެ ހަލަބޮލި ދިރިއުޅުން ތިބާ އާޚިރަތާ މެދު ޣާފިލު ކުރިޔަ ނުދޭށެވެ! ދީނީ ވާޖިބުތައް ފުރުހަމައަށް އަދާކުރާށެވެ! ފަލާޙާ ކާމިޔާބު އޮތީ އާޚިރަތުގައެވެ.
މައުލޫމާތު: الشَّيْخ مُحَمَّدُ أَفْضَل / ދީނުގެމަގު