މަޖިލިސް އިންތިހާބާ ގުޅިގެން ޖަހާފައި ހުރި ކެމްޕެއިން ކެންވަސްތައް ނަގަން އެޗްޑިސީން އެދިއްޖެއެވެ.
އެޗްޑިސީން ބުނީ އާއްމު އިންތިހާބުތަކާ ގުޅިގެން ހުޅުމާލޭގެ މަގުތަކުގައި ބެނާ އާއި ކެންވަސް ޖެހުމުގެ ފުރުސަތު ހުޅުވާލިކަމުގައި ވިޔަސް، މަގުތަކުގައި ޖަހާ ކެންވަސް އާއި ބެނާތަކުގެ ސަބަބުން، މަގު ބޭނުން ކުރާ އާއްމު ފަރާތްތަކަށް ދަތިކަން ފޯރާ ކަމަށެވެ.
އެގޮތުން 20 ވަނަ ރައްޔިތުންގެ މަޖިލީހުގެ އިންތިހާބާ ގުޅިގެން އެ ކޯޕަރޭޝަނުން ހުރިހައި ކެންޑިޓޭޓުންނަށް ކެމްޕެއިން ކުރުމުގެ ހަމަހަމަ ފުރުސަތު ހޯދައިދިނުމުގެ ގޮތުން ކެމްޕެއިން ބެނާއާއި ކެންވަސް ޖެހުމަށް ހުޅުވާލި ފުރުސަތުގައި ގިނަ އަދަދެގެ ކެންޑިޑޭޓުން ވަނީ ހުޅުމާލޭގެ އެކި ސަރަހައްދުތަކުގައި ބެނާ އާއި ކެންވަސް ޖަހާފައި ކަމަށާއި މިހާރު އިންތިހާޞު ނިމިފައިވާތީ އެ ބެނާ ތަކާއި ކެންވަސްތައް ނަގާދިނުމަށް އެދޭ ކަމަށެވެ.
އެހެންކަމުން މަޖިލިސް އިންތިހާބުގެ ކެމްޕެއިންގެ ބޭނުމަށް ޖަހާފައިވާ ބެނާތަކާއި ކެންވަސްތައް މިއަދުން ފެށިގެން ކުރިއަށް އޮތް 1 ހަފްތާ ތެރޭގައި ނަގައިދިނުމަށް މި ކޯޕަރޭޝަނުން އެދިފައިވެއެވެ.
މިއާ އެކު މިފަދަ ކަންކަމުގައި އެ ކޯޕަރޭޝަންގެ އެދުމާ އެއްގޮތަށް ހުރިހައި ފަރާތްތަކުން ވެސް ދެއްވާ އެއްބާރުލުން ފާހަގަކުރާކަމަށް ވަނީ ބުނެފައެވެ.