ގއ ގެމަނަފުށިން ފެންނަ ނިކަން ހިތްގައިމު މަންޒަރެކެވެ. ތިމާއަށް ލިބިފައިވާ އިލްމު އެއްވެސް އަަގަކާ ނުލައި އެހެން ބަޔަކަށް ފޯރުކޮށްދިނުމަކީ ބޮޑު ހިތެއްގެ ވެރިއަކަށް ނޫނީ ވާނެ ކަމެއް ނޫނެެވެ. ހަމައެކަނި ހުނަރެއް ނުވަތަ އިލްމެއް ނޫނެެވެ. މިހާ ވަގުތު ހަނި ޒަމާނެއްގައި ތިމާގެ ވަގުތު ބަޔަކަށް އަގަކާ ނުލައި ބަދަލަކާ ނުލައި ހުސްކޮށް ދިނުމަކީ ހަމަ ޔަގީނުންވެސް ވަރަށްވެސް އިހުލާސްތެރި، ހެޔޮ މީހަކަށް ނޫނީ ވާނެ ކަމެއް ނޫނެވެ.
ގއ ގެމަނަފުށީ ފެހިފަރުދާގެ އަބްދުލްހަންނާނަކީ މިދެންނެވި ފަދަ މީހެކެވެ. އުމުރުން 40 އަހަރުގެ ހަންނާނުގެ އަމިއްލަ ފުޓްބޯޅަ އެކެޑަމީއެއް ގެމަނަފުށީގައި ހުރި އިރު އެތަނުން އެދުރުވެގެންދާ ކޮންމެ ދަރިވަރަކީ ހިލޭ، އެއްވެސް ފީއެއް ނެތި އުނގެނިގެންދާ ދަރިވަރެކެވެ. 2021 ވަނަ އަަހަރު ހުޅުވި މި އެކެޑަމީއަކީ ހަންނާނު ވަރަށްވެސް މާތް އެހާމެ ހާއްސަ މަގުސަދެއްގައި ހުޅުވި ތަނެކެވެ. ހަންނާނުގެ އަމިއްލަ ދަރިފުޅެކޭ އެއްފަދައިން އެތައް ދިވެހި ދަރިންނަށްޓަކައި އޭގެ ފައިދާ ކުރުވަނިވި، ބޭނުން ހިފޭފަދައަކުން، ނެތެމުންދާ ކުޅިވަރެއް އާލާކުރުމަށްޓަކައި އުފެއްދި އެކެޑަމީއެކެވެ.
"ފަހަކަށް އައިސް ފުޓްބޯޅަ މިދަނީ ފަހަތަށް ޖެހި ނެތެމުން، ފުޓްސަލް އާންމުވެ މަޝްހޫރު ވެގެން އައުމުގެ ސަބަބުން ފުޓްބޯޅަ ފަހަށް ޖެހެން ފެށީ، އެކުޅިވަރުގެ ރޫހު އާލާކުރުމަށްޓަކައި. އަދި އެހެންވެސް ސަބަބުތައް އެބަހުރި،" ހުވަދޫ ނޫހަށް ހަންނާނު މައުލޫމާތު ދިނީ ހުޅުވާލެވިފައިވާ ސޮފްހާތަކަކުންނެވެ. ނުހަނު ސީދާކަމާއި ސާބިތުކަމާއެކުގައި ހަންނާނު ބުނީ ރަށުގައި ފުޓްސަލް ދަނޑެއް އޮތަސް އެދަނޑުގައި ކުޅެވެނީ އެއްފަހަރާ އެންމެ ދިހަ ކުދިންނަށް ކަމަށެވެ. ގެމަނަފުށީ ސްކޫލުގައި ހަތަރު ސަތޭކައެއްހައި ކުދިން ކުޅެން ބޭނުންވެފައި ތިބޭ އިރު، ރަށުގައި ފެންވަރުގެ ފުޓްބޯޅަ ދަނޑެއް ނެތެވެ. ދަނޑެއް އޮތަސް އެދަނޑު އޮތީ ކުޅިވަރުފެ މިއީ ހައްތަހާވެސް ކަންބޮޑުވުންތަކެވެ. މިފަދަ ދަތިކަން އޮތް ރަށެއްގައި ފުޓްބޯޅައިގެ ޖޯޝާއި ފޯރި ނެތެމުންދަނިކޮށް ހަންނާނު އިސްނެގީ އެތައް ގޮތަކުން ވިސްނާފައެވެ.
ހަންނާނު؛ ރިވާ އެކަޑަމީގެ ކުދިންނާއެކު ….ފޮޓޯ: ހަންނާނުއެފްބީ
އަމިއްލަ ގޮތުން ފުޓްބޯޅައިގެ ކޯޗުކަން ހަންނާނު ކުރަން ފެށީ ނުހަނު މާތް މަގުސަދެއްގައި އިހުލާސްތެރި ނިޔަތެއްގައެވެ. މިފަދަ ތަރައްގީވެފައިވާ ކަމަށް ދައުވާ ކުރާ ތަހުޒީބު ޒަމާނެއްގައި ނެތެމުންދާ ކުޅިވަރުގެ ހަގީގީ މަގުސަދު ދިރުވައި އާލާކުރުމާއެކު އެކަން ކުދިންގެ ގައިގައި އަށަގެންނެވުމަށް ހަންނާނު އަތުކުރި އޮޅާލައި އޭނާގެ "ރިވާ" އެކަޑަމީއާއެކު ކޮޅަށް ތެދުވީ ކުދިންގެ ގައިގައި އަހުލާގާއި ސުލޫކު އަށަގެންނެވުމުގެ މާތް މަގުސަދާއެކުގައެވެ.
ހަންނާނުގެ މި އެކަޑަމީއަކީ ހިލޭސާބަހަށް އެންމެހައި ކުދިންނަށް ހުޅުވާލެވިފައިވާ ތަނެކެވެ. ރަށުތެރެއިން ހަންނާނަށް އެއްބާރުލުން ލިބޭއިރު މިކަމަށް ރަށު ކައުންސިލުން ލިބޭ އެހީތެރިކަން ބޮޑުކަމަށްވެސް ހަންނާނު ވަނީ ބުނެފައެވެ.
2005 އިން ފެށިގެން ޖުވެއިނަލް ކޯޓުގައި އުޅުމަށްފަހު ހަންނާނު ސިޔާސީ ދާއިރާއަށް ނުކުތީ ނުވަ އަހަރު ސަރުކާރަށް ހިދުމަތް ކުރުމަށްފަހުގައެވެ. އޭގެ ފަހުން 2014 އިން 2017 އަށް ރަށު ކައުންސިލް މެންބަރު ކަމުގައި ހުރި ހަންނާނަކީ މިހާރުވެސް ރަށުގެ ފެނަކަ ކޯޕަރޭޝަނުގެ ސީނިއާރ އޮފިސަރެއްގެ ވަޒީފާ އަދާ ކުރަމުންދާ ފަރާތެކެވެ.
ހަންނާނު ގަބޫލު ކުރާ ގޮތުގައި ފުޓްބޯޅައިގައި (ޑިސިޕްލިން) އަދަބާއި ސުލޫކާއި އަހުލާގު ހުންނަން ޖެހޭނެއެވެ. ކުއްޖާއަށް ޅައުމުރުން ފެށިގެން މިއީ ބުނެދީ އަށަގަންނުވަން ޖެހޭ ކަންކަމެވެ. ކުޅިވަރުގެ ތެރެއަށް ނުކުންނައިރު ކުޅުންތެރިއެއްގެ ކިބައިގައި ހުންނަން ޖެހޭ ހުރިހާ ޝަރުތެއް ހަމަވާން ޖެހޭނެއެވެ. ކުޅިވަރުގެ އަދަބާއި އަހުލާގު ކުއްޖާގެ ގައިގައި އަށަގަންނުވަން ޖެހެއެވެ. ކުޅިވަރުގެ ފުރަތަމަ ޝަރުތަކީ އަދި އަސްލަކީވެސް އަދަބާއި އަހުލާގު ކަމަށްވާއިރު ކުދިންގެ ކިބައިގައި މިސިފަ ހުރެގެން ނޫނީ ދަނޑުމަތީގައި ކުއްޖާ ކާމިޔާބު ނުވާނެކަމީ ހަގީގަތެއްވެސްމެއެވެ.
ހަންނާނު، ސަރުކާރުގެ ވަޒީފާއެއްގެ މަސްއޫލިއްޔަތު އަދާކުރަމުން ގައުމާއި ރަށަށްޓަކައި ކުރާ މަސައްކަތް ތައުރީފު ހައްގު
ހަންނާނު އަދާ ކުރަނީ އިޖުތިމާއީ ބޮޑު އަދި ބުރަ މަސްއޫލިއްޔަތެކެވެ. ނުހަނު ވަރުގަދަ ފަރުދީ ޒިންމާއެކެވެ. އިޖުތިމާއީ ކުޅިވަރުގެ ދާއިރާގެ ތެރެއަށް ކުދިން ވެއްދުމުގެ މަސައްކަތަކީ ފަސޭހަ ކަމަކަށްނުވިޔަސް އުފާވެރި ފަހުރުވެރި ކަމެއްކަން ޔަގީނެވެ. ހަންނާނު ބުނީ ވަރަށް ބޮޑު ތެދެކެވެ. ކުއްޖާ ބޭނުންކޮށްފައި ފުޅިއާއި ދަޅުފަދަ ތަކެތި ދަނޑުމައްޗަށް އެއްލައިލުމުގެ ބަދަލުގައި ދަނޑަކީ ތިމާގެ އަމިއްލަ ތަނެއްގެ ގޮތުގައި ސާފުތާހިރުކޮށް ނަލަކޮށް ގެންގުޅުމަކީ މުހިންމު ކަމެކެވެ. ކުޅޭ ބިން ދެކެ ލޯބިވުމަކީވެސް ކުޅިވަރުގައި ކުރިއަރައިގެން ދިއުމުގެ އެއް ސަބަބުކަން ގައިމެވެ.
ހަންނާނުގެ މަސައްކަތް މިހިސާބަށް ގޮސްފައިވާއިރު އަދު އޭނާގެ އެންމެ ބޮޑު ކަންބޮޑުވުމަކީ އަދިވެސް ކުދިންނަށް ބޭނުންވާ ވަރަށް މެޗްް-ޕްރެކްޓިސް ލިބޭގޮތް ނުވުމެވެ.
ހަންނާނު ގަބޫލު ކުރާ ގޮތުގައި ކުޅުމުގެ ތެރޭގައި ތަފާތު ކުރިއެރުން އައިސްފައިވާ އެކިއެކި އެކެޑަމީތައް ހުރިއިރު، މެޗުތައް ކުޅެން މެޗު ޕްރެކްޓިސް އަކީ އެންމެ މުހިންމު އެއްކަމެވެ. މެޗްޕްރެކްޓިސް ކުދިންނަށް މުހިންމެވެ، ބޭނުމެވެ. ރަސްމީ މުބާރާތެއްގައި ވާދަކުރާއިރު މެޗްޕްރެކްޓިސް ނެތިއްޔާ ވާދަކުރާ ކުއްޖާ ހުންނާނީ ބިރެއްގެ ތެރޭގައެވެ. އޭނާއަށްވުރެ މޮޅު ބޮޑު ފަރާތަކާ ބައްދަލު ކުރަން ޖެހޭތީ އަންނަ ކަންބޮޑުވުން އޭނާގެ ނަފުސަށް އޮންނަ ޔަގީންކަމަށް ހުރަސް އަޅާނެއެެވެ. އެހެންކަމުން އެކި ފެންވަރުގެ ކުދިންނާއެކު ކުޅުމުގެ ފުރުސަތު ލިބުމަކީ ކުއްޖާއަށް ދެވޭ ވަރަށްބޮޑު ތަމްރީނެކެވެ.
ހަންނާނު ދަނީ އެކަމަށްވެސް ހިންމަތާއެކު މަސައްކަތް ކުރަމުންނެވެ. ހަންނާނު ދަނީ އޭނާގެ ރިވާ އެކަޑަމީގެ ކުދިންނަށް އެކިއެކި އެކަޑަމީތަކާއެކު މެޗުތައް ކުޅުމުގެ ފުރުސަތުތައް ހޯދައިދެމުންނެވެ.
"މިދިޔަ ޑިސެމްބަރު މަހު ގއ ވިލިނގިލީ ސުކޫލުގައި އަންޑަރ 14 އާއެކު އަޅުގަނޑުމެންގެ ރިވާ އެކަޑަމީއިން މެޗެއް ކުޅުނު، މިދިޔަ އަހަރު ކުރީކޮޅު ގައްދޫ ސުކޫލުގައި އަންޑރ 14 އާއެކު ފުޓްސަލް މެޗެއް ކުޅުނިން، މި ނިމުނު ހުކުރު ދުވަހު ކަނޑުހުޅުދޫގައި ފުޓްސަލް މެޗެއް ކުޅުނު، ހައްތަހާވެސް ފުޓްސަލްއަށް ފުރުސަތު މި ލިބެނީ. އެއީ ދަނޑުތައް ނެތުމުން ދިމާވާ މައްސަލަ،" ހަންނާނު ކިޔައިދިނީ ކަންބޮޑުވުން އޮތް މައްސަލައެއްގެ ވާހަކައެކެވެ.
ހަންނާނު؛ ރިވާ އެކަޑަމީގެ ކުދިންނާއެކު ..ފޮޓޯ: ހަންނާނުއެފްބީ
"އިއްޔެ އައްޑޫ ފޭދޫ ސަޑޭ އެކަޑަމީއާއި އަޅުގަނޑުމެން ރިވާ އެކަޑަމީ އާއެކު، އެކުވެރިކަމުގެ މެޗެއް ކުޅުނިން، އެމީހުންނާއެކު ފުޓްބޯޅައިގެ އެކިއެކި ކަންކަމުގެ މަޝްވަރާވެސް ކުރަމުންމިދަނީ، އެހެންނަމަވެސް ހަގީގަތުގައި ފުޓްބޯޅައަށް ވަރަށް ފުރުސަތު ނުލިބޭ، ދަނޑެއްވެސް ނެތުމާއެކު، މިހިސާބުގައި އޮތީ ވިލިނގިލީ ދަނޑު ފެންވަރަށް ހަދާފައި އޮތް ދަނޑަކަށް، ދަތުރު ކުރާއިރު 22 މޭލު ކަނޑައްތުކޮށްފައި ދާން މިޖެހެނީ، އެހެންވީމަ އެއީ އެހާ ފަސޭހަ ކަމަކަށް ނުވޭ، ދެން ގައްދޫ ދަނޑު ހަދައި ނިމިއްޖެ، އެހެންނަމަވެސް އަދި އެދަނޑުން ހުއްދައެއް އަޅުގަނޑުމެންނަށް ނުލިބޭ، އެކަމަށް އެދިފައި ވާނީ،" ހަންނާނު ކިޔައިދިނެވެ.
ކޮންމެ ގޮތަކަށް އަދުގެ ހާލަތު އޮތް ކަމުގައި ވިޔަސް، ހަންނާނުގެ އުއްމީދުތައް ނުހަނު ބޮޑެވެ. ރަށުގައި އޮތް ބޮޑު ދަނޑު ރަސްމީ ފެންވަރެއްގައި ހަދައިދީ ވަކި ގަވާއިދުތަކެއް އެތަނަށް ކަނޑައެޅިގެން ދިއުމަކީ ހަންނާނުގެ އެންމެ ބޮޑު އެއް އެދުމެވެ، އުއްމީދެވެ. މިހާރުގެ ހާލަތު ބަދަލުވުމަށް އިންތިހާއަށް އޭނާ އެ އެދެނީ ސަބަބެއް ނެތި ނޫނެވެ. ލައިސަންސް ނަގަން ވަންނަ މީހުން ޖެހިލުމެއް ނެތި ދަނޑަށް ވަދެގެން ދާއިރު ކުޅެން ތިބޭ ކުދިންނާމެދުވެސް ވިސްނާލުމެއް ނުބަަހައްޓައެވެ. އެންމެނަށް ބޭނުންގޮތަކަށް ބޭނުންކުރެވޭ ގޮތަށް އޮތުން ބަދަލުވެ އެ ދަނޑަކީ ރަސްމީ ރަނގަޅު ފެންވަރެއްގެ ދަނޑެއްގެ ގޮތުގައި، އަދި ކުޅިވަރުގެ މާހައުލު އޮތް ދަނޑެއްގެ ގޮތުގައި ގާއިމުވެގެން ދިއުމަކީ ހަންނާނުގެ އެންމެ ބޮޑު އެއް އުއްމީދެވެ،
މިއީ ގެމަނަފުށީގެ ހިތްގައިމު މަންޒަރެވެ. ފުޓްބޯޅައަށްޓަކައި ހަންނާނުގެ ހިތުގައި އޮތް ލޯބިން އުފެދުނު "ރިވާ އެކަޑަމީ" އަކީ މިއަދު އަގަކާނުލައި އެންމެނަށް ހިލޭސާބަހަށް ހުޅުވާލެވިފައިވާ ކުޅިވަރުގެ ނަލަ ދުނިޔެއެކެވެ.
ހުވަދޫމީޑިޔާގެ ޓީމުން އެދެނީ ހަންނާނުގެ މި ހިތްގައިމު އެހެނަސް ނުހަނު ބުރަ މަސައްކަތަކީ މުޅި ގައުމު އަދި ސަރުކާރުވެސް ބަލައިގަންނަ މަސައްކަތަކަށްވުމެވެ. އަދި ހަންނާނުގެ ރިވާ އެކަޑަމީއަށް އަބަދުވެސް ފާގަތިކަމާއި ކާމިޔާބު ލިބުމާއެކު ހަންނާނުގެ އުއްމީދުތައް ރޯޝަންވެގެން އައުމެވެ. ހެޔޮނިޔަތަކާއެކު ކުރާ މަސައްކަތެއް ގެއްލިގެނެއް ނުދާނެކަން ގައިމެވެ.