ރާއްޖޭގެ ކޮންމެ މަސައްކަތްތެރިއަކަށްވެސް، އެމީހަކަށް ހައްގުވާ ކަރާމާތާއި އިހްތިރާމް ލިބިދިނުމަކީ ސަރުކާރުގެ ވަރަށް ބޮޑު އަމާޒެއް ކަމަށާއި މަސައްކަތްތެރިންނަށް ހައްގުވާ އިހްތިރާމް، އޭގެ ފުރިހަމަ މާނާގައި، އެފަރާތްތަކަށް ލިބިދެވޭނެ ގޮތަށް، ސިޔާސަތުތަކާއި އުސޫލުތައް ބައްޓަންކޮށް، އެކަންކަން، އަމަލުން ދެއްކުމަށް ތައުލީމާއި މަސައްކަތްތެރިކަމާއި ހުނަރުތައް ތަރައްގީކުރުމާ ބެހޭ ވަޒީރު ޑރ. މަރިޔަމް މާރިޔާ އިލްތިމާސް ކުރައްވައިފިއެވެ.
ވަޒީރު ޑރ. މަރިޔަމް މާރިޔާ މިގޮތަށް ވިދާޅުވީ މަސައްކަތްތެރިންގެ ދުވަހުގެ މުނާސަބަތުގައި ދެއްވި ބަސްދީގަތުމެއްގައެވެ.
އެ ބަސްދީގަތުމުގައި ވޭތުވެދިޔަ 15 އަހަރު ދުވަހު މަސައްކަތްތެރިކަމަށް ނަޒަރު ހިންގާލާއިރު، މަސައްކަތުގެ މާހައުލުގެ ރައްކާތެރިކަމާއި ސިއްހަތު ކަށަވަރުކުރުމަށް ވަނީ ކުރިއެރުންތަކެއް ލިބިފައިކަން ފާހަގަކުރެއްވުމާއެކު ވަޒީރު މާރިޔާ ވިދާޅުވީ، ގާނޫނީ އޮނިގަނޑުގެ ތެރެއިން މަސައްކަތުގެ މާހައުލުގެ ރައްކާތެރިކަމާއި ސިއްހަތު ކަށަވަރުކުރުމުގެ ހައްގު މިހާރު ލިބިފައިވާ ކަމަށެވެ.
އަދި އެ ގާނޫނުގެ ފޮނިމީރުކަން ދިވެހި މަސައްކަތްތެރިންނަށް ވަރަށް އަވަހަށް ލިބިގެންދާނެ ކަމަށްވެސް މާރިޔާ ވިދާޅުވިއެވެ،
ވަޒީރު މާރިޔާ ވިދާޅުވީ، މަސައްކަތްތެރިންގެ ދުވަހު އެންމެންވެސް ހަނދާނަށް ގެންނަން އެބަޖެހޭކަންތައްތަކެއް އެބަހުރި ކަމަށާއި އޭގެތެރޭގައި، އިންސާފުވެރި އުޖޫރައާއި ރައްކާތެރި މަސައްކަތުގެ މާހައުލު، އަބުރުވެރި ވަޒީފާއެއް ހޯދުމުގެ ފުރުސަތު ހިމެނޭ ގޮތަށް، މަސައްކަތްތެރިންގެ އަސާސީ ހައްގުތައް ހިމާޔަތްކުރުން ފަދަ ކަންްކަމަކީ މިފަދަ ދުވަހެއްގައި ހަނދާނަށް ގެންނަންޖެހޭ ކަންތައްތަކެއްކަން ވަޒީރު މާރިޔާ ވަނީ ފާހަގަކުރައްވާފައެވެ. ރާއްޖޭގައި، މަސައްކަތުގެ އިޖްތިމާއީ އަދުލުވެރިކަމާއި، އިގްތިސާދީ ކުރިއެރުމާއި، ދެމެހެއްޓެނިވި ތަރައްގީ އާލާކުރުމުގައި، އަބުރުވެރި މަސައްކަތްތައް އަދާކުރާ ވަރަށް މުހިންމު ދައުރެއްވާކަމަށް ގަބޫލުކޮށް، ދެނެގަންނަން އެބަޖެހޭ ކަމަށްވެސް ވަޒީރު މާރިޔާ ވިދާޅުވިއެވެ.
ރާއްޖޭގެ ކޮންމެ މަސައްކަތްތެރިއަކަށްވެސް، އެމީހަކަށް ހައްގުވާ ކަރާމާތާއި އިހްތިރާމް ލިބިދިނުމަކީ ސަރުކާރުގެ ވަރަށް ބޮޑު އަމާޒެއް ކަމަށް ވަޒީރު ވިދާޅުވިއެވެ. އެހެންކަމުން، މިއަދު އެންމެ ބޮޑު އިލްތިމާސަކީ މަސައްކަތްތެރިންނަށް ހައްގުވާ އިހްތިރާމް، އޭގެ ފުރިހަމަ މާނާގައި، އެފަރާތްތަކަށް ލިބިދެވޭނެ ގޮތަށް، ސިޔާސަތުތަކާއި އުސޫލުތައް ބައްޓަންކޮށް، އެކަންކަން، އަމަލުން ދެއްކުން ކަމަށެވެ.
މިއަދު ފާހަގަކުރަނީ މަސައްކަތްތެރިންގެ ބުރަ މަސައްކަތާއި އެފަރާތްތަކުގެ ހިދުމަތް ކަމަށާއި މާލޭގެ ހަލަބޮލި މަގުތަކުން ފެށިގެން، ރީތި ޖަޒީރާ ގޮޑުދޮށްތަކާ ހަމައަށްް ފެންނަ ތަރައްގީއާއި ކުރިއެރުމާއި ތަމައްދުނުގެ މައި މޭސްތިރިންނަކީ މަސައްކަތްތެރިން ކަމަށް ވަޒީރު ވިދާޅުވިއެވެ.
“މަސައްކަތުގެ މާހައުލާއި އެންމެންނަށް އަބުރުވެރި މަސައްކަތެއް ހޯދުމުގައި ދެމިއޮތް ގޮންޖެހުންތައް، އަދިވެސް ވާކަމަށް، އަޅުގަނޑުމެން އެބަ ގަބޫލުކުރަން ޖެހޭ. މަސައްކަތުގެ މާހައުލުގައި ހިތްހަމަނުޖެހޭ ކަންކަން އެބަ ހިނގާ. ތަފާތުކުރުމާއި، ގަނާކުރުމާއި ނުތަނަވަސްކަމުގެ ހާދިސާތަކުގެ ވާހަކަތައް އެބަ އަޑުއިވޭ. މަސައްކަތްތެރިންގެ ހައްގުގައި، މި ފަދަ ތަފާތުކުރުމާއި އަނިޔާވެރިކަމާ ދެކޮޅަށް ކުރިމަތިލައި، އެކަންކަން، މަސައްކަތުގެ މާހައުލުން ނައްތާލުމަށް މަސައްކަތް ކުރުމަކީ، އަޅުގަނޑުމެން އެންމެންގެ ވާޖިބެއްކަމަށް ހައްދަވާ.” ވަޒީރު ވިދާޅުވިއެވެ.
ވަޒީރު ވިދާޅުވީ، އެއްބައިވަންތަކަމާއި އެއްބާރުލުމުގެ ރޫހެއްގައި، ސަރުކާރުގެ އިދާރާތަކާއި، ވަޒީފާދޭ ފަރާތްތަކާއި، ޓްރޭޑް ޔޫނިއަންތަކާއި، މަދަނީ ޖަމްއިއްޔާތައް ގުޅިގެން ރާއްޖޭގައި މަސައްކަތުގެ މާހައުލުގެ ރައްކާތެރިކަމާއި ސިއްހީ ކަންކަން ކަށަވަރުކޮށް، އަބުރުވެރިކަމުގެ މަސައްކަތުގެ މަގްސަދުތައް ކުރިއަށް ގެންދިއުމަށެވެ. އެންމެން އެކުގައި ގައުމު ބިނާކުރެވޭނީ، ކޮންމެ މަސައްކަތްތެރިއަކަށްވެސް، އެމީހެއްގެ ފުރިހަމަ ގާބިލްކަން ހަގީގަތަކަށް ހަދައި، ކަރާމާތާއި ފުރިހަމަ ދިރިއުޅުމެއް އުޅުމަށް، ބާރުވެރިކުރެވޭ މުޖުތަމައެއް ގާއިމުކޮށްގެން ކަމަށް މާރިޔާ ވިދާޅުވިއެވެ.