ކޮވިޑް-19 އާ ރައްކާތެރިކޮށް، ސަލާމަތްކޮށްދިނުމަށްޓަކައި ބޭނުން ކުރަމުންދާ "ކޮވިޝީލްޑް ވެކްސިން" އުފެއްދި ބޭސް ކުންފުނި "އެސްޓްރާޒެނެކާ" އިން ވެކްސިނުން ލޭ ގަނޑުވާ ކަމަށް، ފުރަތަމަ ފަހަރަށް އެއްބަސްވެއްޖެއެވެ.
ކޮވިޝީލްޑް ޖަހައިގެން ލޭ ގަނޑުވި ގާތްގަނޑަކަށް 51 މީހުންނާއި، 100 މިލިއަން ޕައުންޑާ ގާތްކުރާ އަދަދަކަށް ލިބުނު ގެއްލުމުގެ ބަދަލު ހޯދުމަށް އިނގިރޭސިވިލާތުގައި އެސްޓްރަޒެނެކާ އާ ދެކޮޅަށް ކުރި ދައުވާގައި ބުނެފައި ވަނީ ކޮވިޝީލްޑްގެ ސަބަބުން މީހުން މަރުވެ، ބޮޑެތި ސިއްހީ ގެއްލުންތަކެއް ލިބިފައިވާ ކަމަށެވެ.
މި މައްސަލައިގައި ކޯޓަށް ހާޒިރުކުރުމުން އެސްޓްރާޒެނިކާގެ ފަރާތުން ބުނީ އެ ވެކްސިނަކީ ރަނގަޅު ވެކްސިނެއް ކަމަށާއި ކޮންމެވެސް ވަރަކަށް ވެކްސިންގެ ސައިޑްއެފެކްޓް ހުންނާނެ ކަމަށެވެ. ލޭގަނޑުވުމަކީވެސް އޭގެ ސައިޑްއެފެކްޓެއް ކަމަށް ވަނީ އެއްބަސްވެފައެވެ. އެހެންނަމަވެސް، އެ ކުންފުނިން ބުނެފައިވަނީ އެއީ ވަރުން މަދުން ބައެއް މީހުންނަށް ދިމާވާ ހާލަތެއް ކަމަށެވެ.
"އެސްޓްރާޒެނެކާ ވެކްސިން އިން، ވަރަށް މަދު ހާލަތްތަކެއްގައި، ޓީޓީއެސް ޖެހިދާނެ ކަމަށް ގަބޫލުކުރެވޭ." ފެބްރުއަރީ މަހު ކޯޓުގެ ލިޔެކިޔުންތަކުގައި އެ ކުންފުނިން ބުނެފައިވާ ކަމަށް ޓެލެގްރާފް އިން ރިޕޯޓްކޮށްފައިވެ އެވެ. ޓީޓީއެސް ނުވަތަ ތްރޮމްބޮސިސް ވިތު ތްރޮމްބޮސައިޓޯޕެނިއާ ސިންޑްރޯމް އަކީ ބްލަޑް ކްލޮޓްސް އުފެދުމާއި (ލޭ ގަނޑުވުން) ލޭގެ ޕްލެޓްލެޓްތައް މަދުވުމުން ފާހަގަކުރެވޭ ހާލަތެކެވެ.
ޓީޓީއެސްގެ އަލާމާތްތަކުގެ ތެރޭގައި ބޮލުގައި ރިއްސުމާއި، ބަނޑުގައި ރިއްސުން ހިމެނޭއިރު މިއީ ފަރުވާ ދިނުމުގައި އެންޓިކޮއެގްޔުލޭޝަން ތެރަޕީ، އައިވީއައިޖީ ހިމެނޭ އެހެންނަމަވެސް ޓީޓީއެސް އަކީ ސީރިއަސް އަދި ފުރާނައަށް ނުރައްކާވާ ނޭދެވޭ ކަމެކެވެ،
އެސްޓްރަޒެނެކާއިން ބުނީ ފުރަތަމަ މަރުހަލާގައި ވެކްސިންގެ ސައިޑް އިފެކްޓް ދެނެގަނެވުނު ކަމަށެވެ. އެހެންނަމަވެސް ވެކްސިންގެ ސަބަބުން ކޮވިޑް ފެތުރުން ކޮންޓްރޯލް ކުރެވެމުންދާތީ އެކަން ހާމަ ނުކުރީ ކަމަށެވެ. އަދި ކުންފުނީގެ ފަރާތުން އެކަމަށް މާފަށްވެސް އެދުނެވެ.
މި ވެކްސިން ދުނިޔޭގެ އެކި ކަންކޮޅުތަކަށް ވިއްކައިގެން އެ ކުންފުނިން ވަނީ އެތައް މިލިޔަން ޑޮލަރު ހޯދާފައެވެ. އެގޮތުން 150 ގައުމަކަށް މި ވެކްސިން ވިއްކާފައިވެއެވެ.
ކޮވިޝީލްޑް ވެކްސިނުން ގެއްލުން ލިބުނު މީހުންގެ ތެރެއިން އެކަކު ތުހުމަތު ކުރި ގޮތުގައި ވެކްސިންގެ ސަބަބުން ލޭހޮޅިއެއް ބެދި އެކަމުގެ ސަބަބުން ސިކުނޑިއަށް ދާއިމީ ގެއްލުމެއް ލިބި، އޭނާއަށް މަސައްކަތް ކުރުމާއި ހަރަކާތްތެރިވެއުޅުން ހުއްޓާލަން ޖެހުނު ކަމަށެވެ.
ކޮވިޝީލްޑަކީ އިނގިރޭސިވިލާތުގެ އޮކްސްފޯޑް ޔުނިވާސިޓީއާއި އެސްޓްރާޒެނެކާ ގުޅިގެން ސީރަމް އިންސްޓިޓިއުޓް އޮފް އިންޑިއާ އިން އުފައްދާފައިވާ ވެކްސިނެކެވެ.
ކޮވިޝީލްޑުން މިފަދަ ނޭދެވޭ އަސަރުތަކެއް ކޮށްފާނެ ކަމަށް ދުނިޔޭގެ ސިއްހަތު ޖަމިއްޔާއިން ކުރިންވެސް ވަނީ ބުނެފައެވެ.
ނަމަވެސް ޑަބްލިއުއެޗްއޯއިން އިތުރަށް ބުނެފައިވަނީ ކޮވިޑް-19 އިންފެކްޝަންތަކުން ރައްކާތެރިވުމުގައި ވެކްސިން ދިނުމުން ލިބޭ ފައިދާ "ރިސްކުތަކަށްވުރެ މާ ބޮޑު" ކަމަށެވެ.
ކޮވިޑްގެ ހާލަތުގައި ރާއްޖޭގައިވެސް ގިނަ އަދަދެއްގެ މީހުން ކޮވިޝީލްޑް ވެކްސިން ޖަހާފައިވެއެވެ. އިންޑިއާއިން ކޮވިޝީލްޑް ވެކްސިން ހިލޭވެސް ގިނަ ގައުމުތަކަށް ފޯރުކޮށްދީފައިވާއިރު ރާއްޖެއަށްވެސް ވަނީ އެއް ލައްކައަށްވުރެ ގިނަ ޑޯޒް ހަދިޔާކޮށްފައެވެ.
އަދި ނުހަނު ހިތާމައާއެކު ފާހަގަކޮށްލަން ޖެހޭ ހަގީގަތަކީ މި ވެކްސިންގެ ސަބަބުން ދިވެހިންގެ ތެރެއިންވެސް ބައެއް މީުންނަށް ސިއްހީ އެކިއެކި ނުރައްކާތަކާ ދިމާވެފައި އެބަހުއްޓެވެ. އޭގެ ތެރެއިން އެނގޭ ދެތިން މީހަކުގެ ހާލަތު ވަރަށް ގާތުން ވަނީ ފެނިފައެވެ. ނުހަނު ފުރިހަމަ ސިއްހަތެއްގައި އުފަލުގައި ދިރިއުޅެމުން ދިޔަ އަންހެނެއްގެ ދެ ކިޑްނީ ފެއިލްވެ، ގަދަފަދަ މަސައްކަތް ކުރަމުން ދިޔަ މީހަކަށް ހާޓްއެޓޭކެއް ޖެހިފައިވާ ކަމެވެ. އަދި ނުހަނު ރަނގަޅަށް ހުރި އަންހެނެއފެ ފުއްޕާމޭގެ ކުދި ބޭގްތައް އެއްކޮށް ހަލާކުވެ، މިއަދު އެމީހާ ދިރިއުޅެމުންދަނީ ނުތެދުވެވޭ ހާލު މެޝިނެއްގެއެހީގައި އޮވެގެންކަމެވެ. މިއީ ވެކްސިން ޖެހުމަށްފަހު ދިމާވި ހާލަތެއްކަން އެނގުނުނަމަވެސް ސީދާ ޔަގީންކަމެއް ނުލިބޭތީ މިމީހުން މިވާހަކައެއްވެސް މީހެއް ގާތު ޝައްކެއް ކަމަށްވެސް ހާމަނުކުރެއެވެ.