އިޖްތިމާޢީ ހަމަޖެހުން ގެއްލި، އެއް ބަޔަކު އަނެއް ބަޔަކާ ޖެހި، މޫނުކެނޑޭ އެއް ކަމަކީ، ސިހުރު ހާހޫރަ އާއި ކަހީނުކަމެވެ.
ލަދުވެތި ވުމެއް، ބިރުވެތި ކަމެއް، އަދި ކުޑަ ވެސް ޖެހިލުމެއް ނެތި، ފައިސާ އާއި ޖާހު މަތިވެރި ކުރުމަށް ނުވަތަ ބައެއް ފަހަރު އަޖުމަ ބަލަން ވެސް ކަހީނުކަން ކުރުން މުޖްތަމަޢު ތެރޭ މިއަދު މި ވަނީ ފާޅުވެ އާންމު ވާން ފަށާފައެވެ.
މިފަދަ ކޮންމެ ކަމަކުން ގެއްލުންލިބެނީ މައުސޫމު އެތައް ބަޔަކަށެވެ. ވަކި ވަނީ އެތައް ދެމަފިރިއެކެވެ. ރޫޅެނީ އެތައް ޢާއިލާއެކެވެ. ކެނޑިގެންދަނީ ރަހިމުގެ އެތައް ގުޅުމެކެވެ.
ސިހުރު ހަދާ މީހާއަށް ވެސް މާބޮޑަށް ކަމުގެ ޙަޤީޤަތް ނޭނގި އަޖުމަބަލަން ކުރެވޭ ކަންކަމުގެ ސަބަބުން، އެ ސިހުރުން ގެއްލުންދޭން އޭނާ ގަސްތުކުރި މީހާ ނޫން އެހެން މީހަކަށް ގެއްލުން ލިބޭ ފަހަރު ވެސް މަދެއް ނޫނެވެ. އެކަމުގެ ޝިކާރައަށް މުސްކުޅިންނާއި ކުޑަކުދިން ވުމުގެ ސަބަބުން، ގޮތްހުސްވެ މާޔޫސްވެ ނިކަމެތި ވެފައިވާ އެތައް ޢާއިލާއެއް މިއަދު ދިވެހިރާއްޖޭގައި ތިބި ކަމީ ހިތާމައެކެވެ.
ސިޔާސީ ފޯރިއާއި ވިޔަފާރީގެ ވާދަ ނުވަތަ ގެދޮރުގެ ދަހިވެތިކަމަށް ނޫންވިއްޔާ ލޯބީގެ ނަމުގައި ނަހަމަ އެތައް ކަމެއް ކުރުމަށް، އިންސާނީ ބާރުން އެކަންކަން ނުވާނެ ކަމަށް ބަލައި، ރޫޙާނީ ބާރުވެރިކަން ހޯދުމަށް ޖިންނީންގެ ކިބައިން މަދަދު އެދޭ ބަޔަކު، އެ ކަމެއް އެ ކުރަނީ އޭގެން ލިބިދާނެ ގެއްލުމާއި ނުރައްކާ ނޭނގޭތީއެވެ. އެ ކަމަކީ ޖާހިލިއްޔަ ޒަމާނުގެ ޢަމަލެކެވެ. އޭގެ ސަބަބުން އެ ކަންކުރާ މީހާއަށް ކާފިރުކަން ނޫނީ އިތުރު ނުވެއެވެ. ޖިންނި ސޫރަތުގައި ﷲ ވަޙީކުރައްވަނީ ﴿وَأَنَّهُ كَانَ رِجَالٌ مِّنَ الْإِنسِ يَعُوذُونَ بِرِجَالٍ مِّنَ الْجِنِّ فَزَادُوهُمْ رَهَقًا﴾ (الجن: ٦) މާނައީ: “އަދި އިންސީންގެ ތެރެއިން ފިރިހެން ބަޔަކު، ޖިންނީންގެ ތެރެއިން ފިރިހެން ބަޔެއްގެ ކިބައިން ރައްކާތެރިކަމަށް އެދޭކަމުގައި ވޫއެވެ. ފަހެ (އެކަމުގެ ސަބަބުން) އެއުރެންނަށް (އެބަހީ: ޖިންނީންނަށް) އެއުރެން (އެބަހީ: އިންސީން) ކާފިރުކަމާއި ބޮޑާކަން އިތުރު ކުރޫއެވެ.”
އިންސީންނެކޭ އެއްފަދައިން ޖިންނީންނަކީ ވެސް ﷲ ގެ މަޚްލޫޤުންނެވެ. މަޚްލޫޤުން އެއް ބަޔަކު އަނެއް ބަޔަކަށް އަނިޔާވެރި ވިއެއްކަމަކު، ޚާލިޤު މަޚްލޫޤުންނަށް އަނިޔާވެރިވެވޮޑި ނުގަންނަވާނެތެވެ. ﷲ އީ އޯގާވެވޮޑިގެންވާ ރަޙްމާނުވަންތަ އިލާހެވެ. ކަމަކަށް އެދޭ ނަމަ އެދެންވީ އެ ފަރާތުގައެވެ. ދަންނަވާ ނަމަ ދަންނަވަންވީ އެ ފަރާތުގައެވެ. އެ ނޫން އެހެން ފަރާތްތަކުން ކަންކަމު އެދުމާއި، ހިމާޔަތާއި ވާގިވެރިކަން ހޯދުމަކީ ﷲ ގެ ކޯފާއަށް ހުށައެޅިގަތުމެވެ. ސިހުރު ފަންޑިތަ ހާހޫރައިން ސަލާމަތް ވުމަށް ވެސް އެދިދަންނަވަންވީ ހަމައެކަނި ފަރާތަކީ އެއީއެވެ. އިޚްލާޞްތެރި ހިތަކައިގެން ﷲ އަށް ދަންނަވާ ނަމަ އިޖާބަ ލިބޭނެއެވެ. ހިތްދަތިކަން ފިލާނެއެވެ. ހަމަހިމޭންކަން ވެރިވާނެއެވެ. މުޖްތަމަޢު އަމާންވާނެއެވެ. ❑
هــ ۱٤٤۳ އަހަރު مُحِرَّم މަހުގެ 26 ވީ ހުކުރު ދުވަހު ނެރުނު “ދީނުގެމަގު” މަޖައްލާގެ 35 ވަނަ ޢަދަދުގެ ފުރަތަމަ ޞަފްޙާގައި الشيخ محمد أفضل ލިޔުއްވާފައިވާ މަޒުމޫނު.
މައުލޫމާތު: الشَّيْخ مُحَمَّدُ أَفْضَل / ދީނުގެމަގު