ހަތަރު ކިލޯ އަށްވުރެ ގިނަ މަސްތުވާތަކެއްޗާއެކު މާލެސިޓީގެ ގެއަކުން މީހަކު ހައްޔަރުކޮށްފިއެވެ.
މަސްތުވާތަކެތި ބޭނުންކޮށް، އެތަކެތި ގެންގުޅެ ވިއްކާ ވިޔަފާރިކުރި މައްސަލައެއްގައު ހައްޔަރު ކޮށްފައިވަނީ މއ. ސޭބުގޭ، މުހައްމަދު ހަސަން (36އ)އެވެ.
އޭނާ ހައްޔަރުކޮށް ބަންދާމެދު ގޮތެއް ނިންމުމަށް ކުރިމިނަލް ކޯޓަށް ހާޒިރުކުރުމުން ކޯޓުން ވަނީ އޭނާގެ ބަންދަށް 15 ދުވަސް ޖަހާފައެވެ.
ބަންދު އަމުރުގައިވާގޮތުން އޭނާ އާ ދެކޮޅަށް ތުހުމަތެއް ވުޖޫދުވާ ވަރަށް ހެކި ހުށަހަޅާފައި ވެއެވެ. އަދި ކޯޓަށް ހުށަހަޅާފައިވާ ލިޔެކިޔުންތަކުން އޭނާ އާއި ގުޅުންހުރި އެޕާޓުމަންޓުން އެކި ބާވަތުގެ މަސްތުވާތަކެތި ކަމަށް ޝައްކު ކުރެވޭ ތަކެތި ފެނިފައިވާ ކަަމަށާއި އެތަކެތީގެ ވަގުތީ ބަރުދަން ހަތަރުކިލޯއަށްވުރެ ގިނަ ކަމަށްވެސް އަމުރުގައި ވަނީ ބުނެފައެވެ.
މިހެންވުމުން އޭނާ ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކާވެދާނެ ކަމަށްވެސް އަމުރުގައި ވަނީ ބުނެފައެވެ. އަދި މަސްތުވާތަކެތި ފެނުނު އެޕާޓުމަންޓަކީ ގިނަ ބަޔަކު ބައިވެރިވެގެން މަސްތުވާތަކެތީގެ ވިޔަފާރި ކުރުމަށް ބޭނުންކުރަމުންދާ އެޕާޓުމެންޓެއް ކަމަށްވެސް އަމުރުގައި ވަނީ ބުނެފައެވެ.
އަމުރުގައި އިތުރަށް ބުނެފައިވަނީ މަސްތުވާތަކެތީގެ ވިޔަފާރިކުރުމަށް ބޭނުންކުރެވޭނެ ތަކެތިވެސް އެ އެޕާޓުމަންޓުން ފެނިފައިވާ ކަމަށެވެ. އެހެންކަމުން އޭނާއަކީ އަމަލީ ގޮތުން މިކަމުގައި ބައިވެރިވި މީހެއް ކަމަށް ބެލެވޭ ކަމަށްވެސް ކޯޓުން ވަނީ ފާހަގަކޮށްފައެވެ.