ޔޫއެސް މޮންޓާނާ ނޭޝަނަލް ގާޑްގެ ސިފައިންނާއި ދިވެހި އަސްކަރިއްޔާއިން ގުޅިގެން ބާއްވާ އެކްސަސައިޒް “ބްލެކް މާލިން”ގެ ހަތަރު ވަނަ އެޑިޝަން މިއަދު ފަށައިފިއެވެ.
މި ތަމްރީނު ފެށުމަށް ބަންޑާރަކޮށީގައި މިއަދު ބޭއްވި ރަސްމިއްޔާތު ޝަރަފުވެރިކޮށްދެއްވީ ޗީފް އޮފް ޑިފެންސް ފޯސް، މޭޖާ ޖެނެރަލް އިބްރާހީމް ޙިލްމީއެވެ.
މި ރަސްމިއްޔާތުގައި ޗީފް އޮފް ޑިފެންސް ފޯސް، މޭޖާ ޖެނެރަލް އިބްރާހީމް ޙިލްމީގެ އިތުރުން ޔޫއެސް މޮންޓާނާ ނޭޝަނަލް ގާޑުގެ އެޖުޓަންޓް ޖެނެރަލް، މޭޖާ ޖެނެރަލް ޕީޓާ ރޮނެކް ވާހަކަދެއްކެވިއެވެ.
އެކްސަސައިޒް “ބްލެކް މާލިން” ޕުރޮގްރާމް ކުރިއަށް ދާނީ މިއަދުން ފެށިގެން މި މަހުގެ 28 ވަނަ ދުވަހުގެ ނިޔަލަށެވެ. އެ ތަމްރީނުގައި، އިންޓެލިޖަންސް، ލޮޖިސްޓިކް، މެޑިކަލް، އީއޯޑީ، އަދި އިންފެންޓްރީއާ ގުޅުންހުރި ސަބްޖެކްޓް މެޓާ އެކްސްޕާޓް އެކްސްޗޭންޖް (އެސްއެމްއީއީ) ޕްރޮގްރާމް ކުރިއަށްގެންދަން ނިންމާފައިވާކަމަށް އެެމްއެންޑީއެފުން ބުންޏެވެ.
އެސްއެމްއީއީގެ ޕުރޮގްރާމަތަކުގެ ތެރެއިން އިންފެންޓްރީ އެސްއެމްއީއީ ކުރިއަށް ގެންދިއުމަށް ހަމަޖެހިފައިވަނީ ލާމު ކައްދޫގައެވެ. އެހެން ހުރިހާ އެސްއެމްއީއީތަކެއް ކުރިއަށް ދާނީ މާލޭގައި ކަމަށް އެމްއެންޑީއެފުން މައުލޫމާތު ދިނެވެ.
އެމްއެންޑީއެފުން ބުނީ މި އަހަރުގެ އެކްސަސައިޒްގެ ތެރެއިން، “ފީލްޑް ގްރޭޑް އެކްސްޗޭންޖް ޕްރޮގްރާމް”ގެ ނަމުގައި އައު ހަރަކާތެއް އެމްއެންޑީއެފާއި އެމެރިކާ އަސްކަރިއްޔާއާ ދެމެދު ކުރިއަށް ގެންދިއުމަށް ރާވާފައިވާ ކަމަށެވެ.
މީގެއިތުރުން މި ތަމްރީނުން ސްޓާފް އޮފިސަރުންގެ ޒިންމާތަކާއި، މިލިޓަރީ ޕްލޭނިން ޕްރޮސެސްއާއި ޓްރެއިނިން މެނޭޖްމަންޓްގެ ކަންކަން ކުރިއަށްވުރެ ރަނގަޅަށް ދެނެގަތުމަށް މަގުފަހިވާނެ ކަމަށް އެމްއެންޑީއެފުން ބުންޏެވެ.
މި ތަމްރީނު ފެށުމުގެ ގޮތުން ބޭއްވި ރަސްމިއްޔާތުގައި އެމެރިކާއިން ރާއްޖެއަށް ކަނޑައަޅުއްވާފައި ހުންނަވާ އެމްބެސެޑަރު، ހިއުގޯ ޔޮންއާގެ އިތުރުން ވައިސް ޗީފް އޮފް ޑިފެންސް ފޯސް، ބްރިގޭޑިއާ ޖެނެރަލް އަޙްމަދު ޣިޔާޡް އަދި އެމްއެންޑީއެފްގެ ސީނިއާ އޮފިސަރުން ބައިވެރިވެވަޑައިގެންނެވިއެވެ.
އެކްސަސައިޒް ބްލެކް މާލިން ފުރަތަމަ ބޭއްވީ 2021 ވަނަ އަހަރުގެ ފެބްރުއަރީ 24އިން އޭޕްރިލް ފަސް ވަނަ ދުވަހުގެ ނިޔަލަށެވެ. މާފިލާފުށީގައި ބޭއްވި އެ ތަމްރީނުގައި ދިވެހި 30 ސިފައިން ބައިވެރިކުރިއެވެ.