ކުޅުދުއްފުށީ ސިޓީކައުންސިލުގެ ހުއްދަނެތި މަގުތަކުގައި ތަކެތި ބަހައްޓާ ފަރާތްތަކާމެދު ފިޔަަވަޅު އެޅުމަށް ނިންމައިފިން: މޭޔަރ އާތިފް

ކުޅުދުއްފުށި ސިޓީ ކައުންސިލުގެ ހުއްދައާ ނުލައި އެސިޓީގެ މަގުތަކާއި އެހެންވެސް އާންމު އިޖުތިމާއީ ތަންތަނުގައި، އެކިފާޑުގެ އެކިކަހަލަ ތަކެތި ބަހައްޓާ ފަރާތްތަކަށް ނަސޭހަތްތެރިވިނަމަވެސް އެކަންތައްތައް ތަކުރާރުކޮށް ކުރާ ފަރާތްތަކާމެދު "އާންމު އިޖްތިމާޢީ މިންގަނޑުތަކާ ޚިލާފު އަމަލުތައް ހުއްޓުވުމުގެ ޤާނޫނު" ގެ ދަށުން ފިޔަވަޅު އެޅުމަށް ގަސްތުކުރާ ކަމަށް ކުޅުދުއްފުށިސިޓީގެ މޭޔަރ މުހައްމަދު އާތިފް ވިދާޅުވެއްޖެއެވެ.

ކުޅުދުއްފުށީ ސިޓީގެ މޭޔަރ މުހައްމަދު އާތިފް މިފަދައިން ވިދާޅުވެފައި ވަނީ ކުޅުދުއްފުށީ ސިޓީކައުންސިލުން ކޮށްފައިވާ ޕޯސްޓެއް، އަމިއްލަ އެފްބީޕޭޖުގައި ހިއްސާ ކުރައްވައި ލިޔުއްވާފައިވާ ޕޯސްޓެއްގައެވެ.

ކުޅުދުއްފުށީ ސިޓީކައުންސިލުގެ ފޭސްބުކް ޕޯސްޓުގައި ބުނީ، އެ ސިޓީގެ މަގުތަކާއި އާންމު ތަންތަނުގައި، ސިޓީކައުންސިލުގެ ހުއްދަ ހޯދުމަކާނުލާ ބަހައްޓާފައިވާ ތަކެތި ނޯޓިސް މުއްދަތުގެ ތެރޭގައި ނަގާފައި ނުވާ ސަރަހައްދުތަކުން އެ ތަކެތި ނެގުމުގެ މަސައްކަތް އެ ކައުންސިލުން ފަށާފައިވާ ކަމަށެވެ.

އަދި އެ މަސައްކަތަކީ ރަށުގެ މަގުތަކާއި އާންމުތަންތަނުގެ ސާފުޠާހިރުކަން ކަށަވަރުކުރުމާއި، މަގުތައް ބޭނުންކުރާ ފަރާތްތަކަށް އުފުލަންޖެހޭ ތަކުލީފު ކުޑަކުރުމަށްޓަކައި ކުރެވޭ މަސައްކަތެއް ކަމަށްވެސް ސިޓީކައުންސިލުން ބުނެފައިވެއެވެ.

"އަޅުގަނޑުމެންގެ އެދުމަކީ ހުރިހާ ރައްޔިތުންވެސް މިކަމަށް އެއްބާރުލުންދެއްވާ ކުޅުދުއްފުއްޓަކީ ހިތްގައިމު ސާފުތާހިރު ރީތި ސިޓީއެއްގެ ގޮތުގައި ބޭއްވުމަށް މަސައްކަތް ކޮށްދެއްވުން،" ސިޓީކައުންސިލުގެ އެފްބީ ޕޯސްޓުގައި ވަނީ ބުނެފައެވެ.