އިންދިރާގާނދީމެމޯރިއަލްހޮސްޕިޓަލް، އައިޖީއެމްއެޗްގައި މަސައްކަތްކުރައްވާ ޑޮކްޓަރުންގެ ޒިންމާތަކަށް ހުރަސްއެޅޭ ގޮތްގޮތަށް ސޯޝަލް މީޑިއާގައި ފޮޓޯ ބޭނުންކޮށް އެމީހުން ބަދުނާމުވާ ފަދަ ކަންތައްތައް ކުރާ މީހުންނާމެދު ހަރުކަށި ފިޔަވަޅު އަޅާނެ ކަމަށް އެ ހޮސްޕިޓަލުން ބުނެފިއެވެ.
އައިޖީއެމްއެޗުން މިގޮތަށް ބުނެފައި މިވަނީ އެހޮސްޕިޓަލުގައި ވިހެއި ތުއްތު ކުއްޖަކަށް ފަރުވާ ދިނުމުގައި އެ ހޮސްޕިޓަލުގެ މުވައްޒަފުން އަމަލުކޮށްފައި ވަނީ އެކަށީގެން ނުވާ ގޮތަކަށް ކަމަށް ބުނެ ކުއްޖާގެ އާއިލާގެ ބަޔަކާއި އާންމު ބައެއް މީޑިއާތަކުން ޖަހަމުންދާ ޕޯސްޓްތަކާ ގުޅިގެން ނެރުނު ބަޔާނެއްގައެވެ.
އައިޖީއެމްއެޗުގެ ބަޔާނުގައި ބުނީ، އެ ހޮސްޕިޓަލުން ބަލިމީހުންނަށް ފަރުވާދިނުމުގައި ހިތްހަމަނުޖެހޭ ގޮތަކަށް ނުވަތަ ރަނގަޅު ނޫން ގޮތަކަށް ފަރުވާގެ ކަމެއް ކުރިއަށްދާހެން ފާހަގަކުރެވޭނަމަ އެކަންކަން އިތުރަށް ސާފުކޮށް އޮޅުންފިލުވޭނެ އިންތިޒާމުތައް ހަމަޖެހިފައިވާ ކަމަށެވެ. މައްސަލައެއް އޮތްނަމަ އެ މައްސަލައެއް ހޮސްޕިޓަލުގެ ކަމާބެހޭ ފަރާތްތަކަށް ވަގުތުން ވަގުތަށް ހުށަހެޅޭނެ އިންތިޒާމު ހަމަޖެހިފައިވާނެ ކަމަށްވެސް ބުންޏެެވެ.
“އެ ހޮސްޕިޓަލުން ފަރުވާ ދިނުމުގައި އަމަލުކުރަނީ މެޑިކަލް ޕްރެކްޓިސްގައި އަމަލުކުރަމުން އަންނަ އުސޫލުތަކާއި އެއްގޮތަށް. އަދި ސޯޝަލް މީޑިއާގައި ބަލި މީހެއްގެ ހާލަތާއި ފަރުވާއާ ގުޅޭ ގޮތުން ވަކި ގޮތަކަށް ވާހަކަދެއްކި ނަމަވެސް ބަލިމީހާގެ ބަލީގެ ހާލަތާއި ދީފައިވާ ފަރުވާގެ ތަފުސީލުތަކަކީ އާންމުކޮށް ސޯޝަލް މީޑިއާގައި ހޮސްޕިޓަލުން އާންމުކުރާ މައުލޫމާތުތަކެއް ނޫން،” އައިޖީއެމްއެޗް ގެ ބަޔާނުގައި ބުނެފައިވެއެވެ.
ހިތްހަމަނުޖެހޭ ކަމެއް ދިމާވުމުން އެއިން މަގެއް ހިޔާރުކުރުމުގެ ބަދަލުގައި ސޯޝަލް މީޑިއާގައި ކަމުގެ ހަގީގަތް އޮޅޭ ގޮތަށް އެ ހާދިސާއަކާއި ގުޅުވާ ރައްޔިތުންނަށް ހިދުމަތް ދިނުމުގައި މަސައްކަތް ކުރައްވަމުންގެންދަވާ ޑޮކްޓަރުންގެ ފޮޓޯ އާންމުކޮށް އެ ފަރާތްތަކުގެ ޒިންމާ އަދާކުރުމަށް ހުރަސްއެޅޭ ފަދަ އަމަލުތައް އެ ހޮސްޕިޓަލުން ހަރުކަށި އިބާރާތުން ކުށްވެރިކުރާ ކަމަށް ވެސް އެ ބަޔާނުގައި ބުނެފައިވެއެވެ.