ބައިނަލްއަޤްވާމީ ނަރުހުންގެ ދުވަސް ފާހަގަ ކުރުމަށް ގދ ގައްދޫ ސިއްހީ މަރުކަޒުން އިންތިޒާމް ކޮށްގެން ކުރިޔަށް ގެންދާ ހަރަކާތްތަކުގައި އެ މަރުކަޒުގެ ނަރުހުން ގޭގެޔަށް ޒިޔާރަތް ކޮށް، އެނދުމަތިވެފައި ތިބޭ ބަލި މީހުންގެ ޙާލު ބަލާ ދެއްކި ދެއްކި އޯގާތެރިކަމާ ކުލުނުވެރިކަމަކީ ރަށުގެ ރައްޔިތުން ވަރަށް ބޮޑަށް ފާހަގަކުރި ކަމެކެވެ. ނަރުހުންގެ ހިތުގައި ބަލިމީހުންނާމެދު ބާއްވާ ޙަމްދަރުދީ އާއި ލޯބި ފެނިގެން ދިޔަ ކަމެކެވެ.
މިހަރަކާތް ކުރިއަށް ގެންދާން ގައްދޫ ސިއްޚީ މަރުކަޒުން ނިންމާފައިވަނީ ނަރުހުންގެ ދުވަހާއި ގުޅުވައިގެން މިމަހުގެ 12 ވަނަ ދުވަހުގެ ނިޔަލަށް ކުރިއަށް ގެންދަން ރާވާފައިވާ ތަފާތު ގިނަ ކަންތައް ތަކުގެ ތެރޭގައި ހިމަނައިގެންނެވެ.
މި ޕްރޮގުރާމްތައް ކުރިއަށްދަނީ މިމަހުގެ 6 ވަނަ ދުވަހުން ފެށިގެން ކަމަށް އެ މަރުކަޒުން މައުލޫމާތު ދެއެވެ.
ސިއްހީ މަރުކަޒުން ވިދާޅުވީ ބައިނަލްއަޤްވާމީ ނަރުހުންގެ ދުވަސް ފާހަގަ ކުރުމަށް ކުރިއަށް ގެންދާ ހަރަކާތްތަކުގައިރައްޔިތުންގެ ތެރެއިން ބައެއް ފަރާތްތަކުން ވަރަށް ދީލަތި ކަމާއެކު ފައިސާގެ އެހީ ލިބިފައިވާ ކަމަށާއި އެކަން ވަރަށް ބޮޑަށް ފާހަގަ ކުރާ ކަމަށެވެ.
ގައްދޫ މަރުކަޒުން އިންތިޒާމު ކޮށްގެން ކުރިއަށްދާ ހަރަކާތުގެ ތެރޭގައި 6 ވަނަ ދުވަހު ކުރިއަށްގެންދިޔައީ މަރުކަޒުގެ މުވައްޒަފުންގެ ފަރާތުން ނަރުހުންނަށް ދެވިފައިވާ ހެނދުނު ސައެވެ.
7 ވަނަ ދުވަހު ކުރިއަށް ގެންގޮސްފައިވަނީ ސިއްހީ މަރުކަޒުގެ މުވައްޒަފުންގެ ފަރާތުން ނަރުހުންނަށް ދިން ސަޕްރައިޒް މެންދުރު ކެއުމެވެ. 8 ވަނަ ދުވަހު މަރުކަޒުގެ ނަރުހުންވަނީ ބައެއް ގޭގެއަށް ޒިޔާރަތްކޮށް ގޭގޭގައި އެނދުމަތިވެފައިވާ ބަލިމީހުންނަށް ފަރުވާ ދިނުމާއި ހަދިޔާ ދިނުންވެސް ކުރިއަށް ގެންގޮސްފައެވެ. މީގެ އިތުރުން ވެސް ގައްދޫ ސިއްޚީ މަރުކަޒުން ވަނީ ތަފާތު ހަރަކާތްތައް ނަރުހުންގެ ދުވަހާ ގުޅިގެން ހިންގަން ނިންމާފައެވެ.