ޚާރިޖީ ވަޒީރު މޫސާ ޒަމީރު އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. އެސް ޖައިޝަންކަރާއި ބައްދަލުކުރައްވައި ދެ ޤައުމުގެ މެދުގައި ރަސްމީ ވާހަކަތައް ބާއްވައިފިއެވެ.
ޚާރިޖީ ވަޒީރު މޫސާ ޒަމީރުއާ އިންޑިއާގެ އެކްސްޓާނަލް އެފެއާޒް މިނިސްޓަރ ޑރ.އެސް ޖައިޝަންކަރާއި ދެބޭފުޅުން ބައްދަލުކުރައްވައި ބައިލެޓްރަލް ބައްދަލުކުރެއްވުން ބާއްވާފައިވަނީ ނިއުދިއްލީގެ އައިޓީސީ މޫރިއާ ހޮޓެލްގައެވެ.
މި ބައްދަލުވުމުގައި ދެ ޤައުމުގެ އެމްބެސަޑަރުންނާއި ވުޒާރާތަކުގެ އިސްވެރިން ބައިވެރިވެވަޑައިގެންނެވިއެވެ. އެއަށްފަހު ދެ ޤައުމުގެ މެދުގައި ރަސްމީ ވާހަކަތައް ވަނީ ބާއްވާފައެވެ. މި ބައްދަލުވުމުގައި ދެ ޤައުމުގެ މެދުގައި އޮތް ޒަމާންވީ ގުޅުން އިތުރަށް ބަދަހިކުރުމާއި، ދެ ޤައުމަށްވެސް ފައިދާވާ ކަންކަމުގައި ގުޅިގެން މަސައްކަތް ކުރުމަށް ވަނީ މަޝްވަރާކުރައްވާފައެވެ.
ޚާރިޖީ ވަޒީރު މޫސާ ޒަމީރު އިންޑިއާއަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން ދިއްލީގައި ހުންނަ ދިވެހި ރާއްޖޭގެ ހައިކޮމިޝަނަށް ޒިޔާރަތްކުރައްވައި އެތަނުގެ މުވައްޒަފުންނާއި ބައްދަލު ކުރެއްވުމަށްވެސް ވަނީ ހަމަޖެހިފައެވެ. އަދި އިންޑިއާގައި ދިރިއުޅޭ ދިވެހިންނާވެސް ވަޒީރުގެ މިދަތުރުފުޅުގައި ބައްދަލު ކުރައްވާނެއެވެ.
އިންޑިއާގެ އެކްސްޓާނަލް އެފެއާޒް މިނިސްޓަރުގެ ދައުވަތަކަށް ރާއްޖޭގެ ޚާރިޖީ ވަޒީރު އެޤައުމަށް ކުރައްވާ މި ދަތުރުފުޅަކީ 3 ދުވަހުގެ ރަސްމީ ދަތުރުފުޅެކެވެ. މިދަތުރުފުޅު ނިންމަވާލައްވާނީ މާދަމާއެވެ.